मुख्य नाकाबाहेकमा परीक्षण छैन- सुदूरपश्चिम - कान्तिपुर समाचार

मुख्य नाकाबाहेकमा परीक्षण छैन

तीव्र संक्रमण भएको भारतका विभिन्न ठाउँबाट आउने स्थानीय कोरोना परीक्षण नगरी सिधै गाउँ पसेका छन् 
मनोज बडू

दार्चुला — भारतसित सीमा जोडिएका जिल्लाका ६ नाकामध्ये दार्चुलाको पुलघाट नाकामा मात्र कोरोना परीक्षण भइरहेको छ । अन्य ५ नाकामा परीक्षण नहुँदा संक्रमितहरू सिधै घर पुगिरहेका छन् । यसले समुदायमा संक्रमण फैलन थालेको छ ।


जिल्लामा सबै नाकाबाट नेपाल–भारत आवतजावत निर्बाध रूपमा भइरहेको छ । जिल्ला प्रशासनले स्थानीय तहलाई भारतसितका सीमा नाकामा कोरोनाको परीक्षण गर्न भने पनि स्थानीय तहहरूले अहिलेसम्म व्यवस्था गरेको छैन । जिल्ला प्रशासनले कोरोनाको तेस्रो लहर जिल्लामा पनि फैलिन थालेपछि स्थानीय तहलाई सबै सीमा नाकाहरूमा अनिवार्य कोरोना परीक्षणको व्यवस्थापन गर्न भनिएको छ ।

जिल्लाको सदरमुकामस्थित पुलघाट नाकाबाहेक ब्यास गाउँपालिकाको सीतापुल तिग्रम, महाकाली नगरपालिकाको दत्तु, मालिकार्जुन गाउँपालिकाको जौलजिवी र लेकम गाउँपालिकाको लाली नाकामा कोरोना परीक्षण नभएको स्थानीय बताउँछन् । भारतमा तीव्र संक्रमण भएको ठाउँबाट आउने स्थानीय कोरोना परीक्षण नगरिकनै सिधै गाउँ पसिरहेका छन् ।

अहिलेको अवस्थामा भारतबाट आउने जोकोहीलाई पनि सीमामा सञ्चालित हेल्थ डेस्कमा अनिवार्य जाँच गर्नुपर्ने हो । सीमा नाकामा निःशुल्क कोरोना परीक्षणको पोस्टर लगाएका छन् ।

तर, स्वास्थ्यकर्मीको उपस्थिति देखिँदैन । प्रहरीले नेपाल–भारत आवतजावत गर्ने नागरिकलाई खोप लगाएको वा नलगाएको भनी सोध्ने गरेको स्थानीय जमनसिंह कुँवरले बताए । कोरोनाको परीक्षण नहुँदा गाउँभरि कोरोना संक्रमित भरिरहेका छन् । उनले भने ‘गाउँका अधिकांश मानिसहरूमा कोरोनाको लक्षण जस्ता बिरामी धेरै छन् ।’

सदरमुकामको पुलघाटमा दैनिक भारतका विभिन्न ठाउँहरूबाट नेपाल प्रवेश गरिरहेका कोरोना लक्षण देखिएकाको परीक्षण भइरहेको छ । भारतका विभिन्न ठाउँबाट दैनिक ५०/६० जना भित्रिने गरे पनि थोरैको मात्र परीक्षण हुने गरेको खलंगाका स्थानीय पुरनसिंह साहुले बताए ।

उनका अनुसार पारिबाट आउने झोला भिरेको मानिसहरूलाई मात्र खोजपुछ गरिन्छ । खलंगा पुलघाट सीमानाका र जौलजीवी सीमानाकामा कोरोना परीक्षणको व्यवस्थापन भइसकेकाले सबै सीमानाकामा सो व्यवस्था गर्न आग्रह गरिएको स्वास्थ्य कार्यालयका जनस्वास्थ्य अधिकृत जयराज भट्टले बताए ।

त्यस्तै जिल्ला विपद् व्यवस्थापन समितिको बुधबारको बैठकमा सम्बन्धित स्थानीय तहका प्रमुखहरूलाई सम्बन्धित सीमानाकामा कोरोना परीक्षणको व्यवस्थापन गर्न आग्रह गरिएको जनस्वास्थ्य अधिकृत भट्टले जानकारी दिए । छिटो सीमानाकामा कोरोना परीक्षणको व्यवस्थापन नगरिए नाकामा आवागमन बन्द गरिनेसम्मको बैठकमा छलफल भएको उनको भनाइ छ ।

कैदीबन्दीसँग भेटघाट बन्द

कोरोना संक्रमणको जोखिम बढेपछि जिल्ला कारागारका कैदीबन्दी भेटघाट बन्द गरिएको छ । कारोना जोखिमलाई ध्यानमा राखेर कैदीबन्दी भेटघाटलाई बन्द गरिएको कार्यालय प्रमुख वीरेन्द्रसिंह धामीले बताए । धामीका अनुसार दुई महिला कैदी, १ महिला थुनुवा र ५८ पुरुष थुनुवा छन् ।

एक नाबालकसमेत आमासँगै कारागारभित्र छन् । क्षमताभन्दा बढी कैदी तथा थुनुवाहरू राख्नुपर्ने बाध्यता सिर्जना भएकाले कैदी तथा थुनुवाहरूलाई समस्या छ । कारागारमा १५ महिला र २५ पुरुषको क्षमता छ ।

प्रकाशित : माघ ९, २०७८ १०:५६
प्रतिक्रिया
पठाउनुहोस्

दुई सातामा पनि भेटिएन नरभक्षी बाघ

नारायण शर्मा

पूर्वी नवलपरासी — दुम्किवास आसपासमा मान्छे खाने बाघ समात्न गरिएको प्रयास दुई साता भइसक्दा पनि सफल हुन सकेको छैन । 

दुई साताअघिदेखि विनयी त्रिवेणीको विनयी सामुदायिक वनमा चितवन राष्ट्रिय निकुञ्जको हात्तिसहितको टोलीले बाघको खोजी कार्य सुरु गरे पनि अझै समात्न सकेको छैन । क्यामराबाट नरभक्षी बाघ पत्ता लगाएर यकीन गर्नुपर्ने भएकाले समस्या भएको हो ।

आइतबार बिहानसम्म बाघ हेर्न राखिएको क्यामेरामा बाघ हिँडेको पाइला प्रशस्तै देखिएको छ । बाघ नियन्त्रणमा लिने टोली प्रमुख तथा घढियाल प्रजनन तथा वन्यजन्तु उद्धार शाखाका प्रमुख सरोजमणी पौडेलले नरभक्षी बाघ भेटिएपछि हात्ती र प्राविधिक थपिने जानकारी दिए ।

बाघ खोजीमा खटिएका सहायक वन अधिकृत अमृत ज्ञावालीका अनुसार हाल दुई महिनाअघि बाघले मान्छे खाएको स्थान दुम्किबास र अरुणखोलाबीचमा रहेको विनयी सामुदायिक वनमा बाघको खोजी भइरहेको छ । त्यहाँ बाघको पाइला धेरै नै भेटिएको छ ।

क्षेत्र ठुलो भएकाले कुन स्थानमा बसेको छ भन्ने पत्ता लगाउन समस्या भएको छ । ४ हजार हेक्टरभन्दा धेरै क्षेत्रफलमा फैलिएको जंगल भएकाले पत्ता लगाउन समस्या भएको छ । मान्छे खाएको स्थान आसपासमा फेरि बाघको मुभमेन्ट देखिएकाले खोजी त्यतै केन्द्रित गरिएको ज्ञवालीले जानकारी दिए । बाघ रहेको क्षेत्र नारायणी नदीको किनारबाट उत्तरतर्फको ठुलो क्षेत्र भएकाले खोजीमा समस्या भएको छ ।

चितवन राष्ट्रिय निकुञ्जका सहायक वार्डेन राजु घिमिरेले तीनवटा हात्तीसहित १५ जना प्राविधिकको सहयोगमा नरभक्षी बाघको खोजी सुरु गरिएको दुई साता बितिसक्दा पनि बाघ पत्ता नलागेर हैरान भएको बताए ।

मान्छे खाएको स्थानमा देखिएको बाघका पाइला र अहिले फेला परेको बाघको पाइलामा अध्ययन गरेर एउटै हो वा फरक फरक बाघ हो भन्ने यकीन गर्न सकिने उनले जानकारी दिए । ५ साताअघि बाघले मान्छे खाएको स्थान र हाल बाघ हिँडेको क्षेत्र एउटै भएकाले अब पत्ता लाग्नेमा प्राविधिकहरू भने आशावादी छन् । दुवै पटक भेटिएको बाघको पाइला अध्ययनपछि मात्र त्यो यकीन गर्न सकिने उनको भनाइ छ । बाघको यकीन भएपछि हात्ती र बाघ खोज्ने प्राविधकको संख्या थप्ने दाउमा निकुञ्ज प्रशासन रहेको छ ।

‘हात्ती परिचालन भएको सुइँको पाएपछि जोडी बाघ अन्यत्र हिँडेको अनुमान छ । ठुलो जंगलमा बाघको खोजी कार्य जटिल र खर्चिलो छ । तीनवटा हात्ती र १५, १६ जना प्राविधिकको खर्च दैनिक रुपमा ६५ हजार आसपास खर्च हुन्छ,’ सहायक वार्डेन घिमिरेले भने त्यसैमा मान्छे खाएकै बाघ पत्ता लगाउने काम झन जटिल र जोखिमपूर्ण छ ।

दुम्किवास आसपासको क्षेत्रमा गत साढे २ महिनाको अवधिमा बाघले दुई जनाको ज्यान लिएको छ भने अर्का एक जना गम्भीर घाइते छन् । बाघ आतंकपछि स्थानीय जंगल जान छाडेका छन् । ‘पछिल्लो समय त्यहाँ बाघले तीन दिनअघि दुईवटा गाईवस्तु खाएको छ । हाल खोजी भइरहेको ठुलो क्षेत्रमा धेरै बाघ हिँडेको देखिन्छ‚ त्यसैबाट नरभक्षी बाघ पत्ता लगाउने काम जटिल छ‚’ ज्ञवाली भन्छन्‚ ‘प्रयास जारी छ ।’

प्रकाशित : माघ ९, २०७८ १०:०९
पूरा पढ्नुहोस्
प्रतिक्रिया
पठाउनुहोस्
×