समुदायमा संक्रमण तीव्र, घटेन लापरबाही- सुदूरपश्चिम - कान्तिपुर समाचार

समुदायमा संक्रमण तीव्र, घटेन लापरबाही

भवानी भट्ट

कञ्चनपुर — कञ्चनपुरमा मंगलबार १ सय ८४ जनामा कोरोना संक्रमण पुष्टि भएको छ । जसमध्ये ६३ जना भीमदत्त नगरपालिकाका छन् । ४६ जना गड्डाचौकी नाकामा संक्रमित देखिएका हुन् ।

अन्य संक्रमित कृष्णपुर, पुनर्वास र बेलौरी नगरपालिकाका छन् । सोमबार पनि जिल्लामा १ सय २५ जनामा संक्रमण देखिएको थियो । जसमध्ये भीमदत्त नगरपालिकामा ३७ र गड्डाचौकी नाकामा ५७ जना थिए ।

जिल्लामा कोरोना संक्रमण दिन प्रतिदिन बढ्दो अवस्थामा छ । अझ सदरमुकाम महेन्द्रनगर क्षेत्रमा संक्रमण तीव्र गतिमा बढिरहेको छ । तर संक्रमण रोकथामका लागि स्वास्थ्य मापदण्डको पालना गर्नुको साटो झन्झन् लापरबाही बढिरहेको छ । बजार क्षेत्रमा अहिले पनि मास्क नलगाएरै हिँडडुल तथा सार्वजनिक कार्यक्रममा भीडभाड गर्ने क्रम चलिरहेकै छ ।

जिल्ला प्रशासनले गतसाता २५ जनाभन्दा बढी भेला नहुन आदेश जारी गरेको थियो । मास्क तथा सेनिटाइजरको प्रयोग अनिवार्य गर्नसमेत आदेश जारी गरेको हो । प्रशासनले जारी गरेको आदेश अहिले ठट्टाको विषय बनेको छ । ‘संक्रमण सुमदायमा फैलिइसकेको छ, तर अहिले पनि लापरबाही उस्तै छ,’ महाकाली प्रादेशिक अस्पतालका कोभिड फोकल पर्सन डा. गोविन्द रोकायाले भने, ‘बजारमा भीडभाड उस्तै छ, राजनीतिक दलका कार्यक्रम चलेकै छन् ।’ उनका अनुसार अहिले समुदायमा घरघरै कोरोनासँग मिल्दो लक्षणका बिरामी देखिन थालेका छन् । तर परीक्षणको दायरा कम भएका कारण उनीहरूको परीक्षण हुन सकेको छैन ।

सोमबार महेन्द्रनगर बजार क्षेत्रको एकै घरका ५ जनामा संक्रमण पुष्टि भएको छ । जसमा एक १५ महिने शिशुसमेत देखिनुले संक्रमण समुदायमा तीव्र गतिमा फैलिएको सहजै अनुमान गर्न सकिने डा. रोकायाले बताए । सामाजिक सञ्जाल फेसबुकमा समेत थुप्रैले ज्वरो र रुघाखोकीलगायत जीउ दुख्ने समस्या देखिएको भन्दै सम्पर्कमा रहेका सबैलाई सतर्क रहन आग्रह गरेका छन् । यद्यपि उनीहरूले परीक्षण भने गराएका छैनन् । ‘लक्षण देखिएका सबैको परीक्षण गर्न सकिने अवस्था पनि छैन र सबै संक्रमितको व्यवस्थापन गर्न सकिने पनि देखिँदैन,’ जिल्ला स्वास्थ्य कार्यालय कञ्चनपुरका जनस्वास्थ्य निरीक्षक सिद्धराज भट्टले भने, ‘गाउँघरमा घरघरै संक्रमित छन्, रुघाखोकी सबैमा छ ।’ उनका अनुसार मंगलबार १ सय ४ जनाको पीसीआर परीक्षण गर्दा ९० जनामा संक्रमण देखिनुले पनि संक्रमणको अवस्था भयावह हुन सक्ने देखिन्छ । दोस्रो लहरको संक्रमणको तुलनामा अहिले मृत्युदर कम देखिएका कारण पनि यसप्रति लापरबाही बढेको हुन सक्ने जनस्वास्थ्य निरीक्षक भट्ट बताउँछन् । केन्द्रबाट पनि कुनै किसिमका निर्देशन वा रोकथामका लागि बजेट नआएका कारण केही गर्न सकिने अवस्थासमेत नरहेको उनले बताए ।

विवाह, व्रतबन्धलगायत धार्मिक कार्यमा ठूलो भीड देखिन्छ । विभिन्न किसिमका खेलकुद प्रतियोगिता सञ्चालनमै छन् । सार्वजनिक स्थलमा ठूलो भीड देखिन्छ । सरकारी कार्यालयहरूमा पनि भौतिक दूरी कायम राखेको देखिँदैन । अझ बैंक तथा वित्तीय संस्था र विद्युत् प्राधिकरण, आन्तरिक राजस्व कार्यालय र यातायात व्यवस्था कार्यालयमा सर्वसाधारणको भीड घटेको छैन । ‘हामीले मास्क लगाउन र भीडभाड कम गर्न पटक पटक सचेत पारिसकेका छौं,’ कञ्चनपुरका प्रमुख जिल्ला अधिकारी रामप्रसाद पाण्डेयले भने, ‘अब अटेरी गर्नेलाई सिधै कारबाही गर्ने गरी अघि बढ्छौं ।’

प्रकाशित : माघ ५, २०७८ ०९:२०
प्रतिक्रिया
पठाउनुहोस्

संक्रमण नियन्त्रणमा पालिकाहरू कमजोर

स्थानीय तहले समन्वय नगर्दा सार्वजनिक सवारीसाधनको प्रयोग गरेरै संक्रमितहरु घर पुग्छन्
तृप्ति शाही

बैतडी — जिल्लामा अहिले दैनिकजसो कोरोना संक्रमित देखिरहेका छन् । २० दिनअघिसम्म कोरोना संक्रमितको संख्या शून्य रहेको जिल्लामा मंगलबारसम्म ४६ सक्रिय संक्रमित पुगिसकेका छन् । मंगलबार मात्र १० जनामा कोरोना पुष्टि भएको छ ।

संक्रमित दिनहुँ बढ्दै गइरहेको स्वास्थ्य कार्यालयले जनाएको छ । १/२ जनाबाहेक सबै जना बैतडीस्थित नेपाल—भारत सीमानाका झुलाघाटमा गरिएको एन्टिजेन परीक्षण क्रममा पोजिटिभ देखिएका हुन् । स्थानीय तहले बेवास्ता गर्दा सबै संक्रमितहरू आफ्नो तरिकाले सीमानाकाबाट सिधै घर गएका छन् । यसले गर्दा समुदायमा संक्रमण धेरै फैलिन सक्ने सक्ने स्वास्थ्य कार्यालय बैतडीका प्रमुख योगेशप्रसाद भट्टले बताए । भारततर्फ आवागमन बढी हुने सीमानाकाको कारण कैलाली र कञ्चनपुरपछि सुदूरपश्चिमका ९ जिल्लामध्ये कोरोना धेरै जोखिम भएको बैतडी पनि हो । ‘हाम्रो जिल्लाको अवस्था पनि जटिल नै छ,’ स्वास्थ्य कार्यालय प्रमुख भट्टले बताए । झुलाघाट नाकाबाट अहिले दैनिक रूपमा सयौंको संख्यामा भारतका विभिन्न सहरबाट नेपाली घर फर्किरहेका छन् । दैनिक ६० देखि ७० जनाको कोरोना परीक्षण भइरहेको छ । भारतबाट भित्रिने धेरैजसोमा कोरोना पोजिटिभ देखिरहेको छ । कोरोना संक्रमण देखिए पनि उनीहरू सिधै घर जाने गरेका छन् ।

स्थानीय तहले समन्वय नगर्दा सार्वजनिक सवारीसाधनको प्रयोग गरेरै संक्रमितहरू घर पुग्छन् । उनीहरूको बसोबास पनि घरमै हुने गरेकाले समुदायमा पनि संक्रमणको जोखिम बढिरहेको स्वास्थ्य कार्यालयका प्रमुख भट्ट बताउँछन् । जिल्लामा कोरोना बढ्दै गएपछि मंगलबार जिल्ला कोराना रोकथाम व्यवस्थापन समितिको बैठक बस्यो । प्रमुख जिल्ला अधिकारी संयोजक रहेको समितिको बैठकमा जिल्लास्थित स्वास्थ्य कार्यालय, अस्पताललगायत सम्बन्धित कार्यालय र स्थानीय तहका प्रमुख वा उपप्रमुखलाई बैठकमा उस्थितिका लागि आग्रह गरिएको थियो । जिल्ला सदरमुकाममा रहेको दशरथचन्द नगरपालिकाबाहेक अरू कुनै पनि पालिकाका प्रतिनिधि बैठकमा सहभागी भएनन् ।

जिल्लाका प्रायः सबै पालिकामा संक्रमित देखिए पनि स्थानीय जनप्रतिनिधिहरूले संक्रमणको समस्या बारे वास्तै गरेका छैनन् । आइसोलेसनबारे सोधपुछ गर्दा सबै पालिकाले आइसोलेसन केन्द्र छन् भन्ने गरे पनि संक्रमितहरू घरै जानुपर्ने अवस्था रहेको स्वास्थ्य कार्यालयले जनाएको छ । पहिलो र दोस्रो चरणको कोरोना संक्रमणका बखतमा पालिकाहरूले संक्रमितको व्यवस्थापनमा धेरै चासो दिएका थिए ।

जिल्लामा फैलिरहेको कोरोनाबारे धेरै पटक खबर गर्दा पनि पालिकाबाट बैठकमै सहभागी नहुने गरेको प्रमुख जिल्ला अधिकारी राजेन्द्रदेव पाण्डे बताउँछन् । ‘आइसोलेसनको व्यवस्थापन गर्नुस् । संक्रमितलाई पनि व्यवस्थापन गर्नुपर्छ भनेर पत्र धेरै पटक पठाएको छु,’ उनले भने, ‘मौखिक रूपमा पनि सबैलाई भनेको छु । अझै काम हुन सकेको छैन ।’ आफूले समन्वय र जिल्लामा आइसोलेसन केन्द्र बनाउने कार्यको सुरुवात गरेको उनले बताए । अबदेखि सीमानाका झुलाघाटमा देखिएका संक्रमितलाई एम्बुलेन्समार्फत ल्याएर सदरमुकामस्थित दशरथचन्द नगरपालिकाका निर्माण भएको आइसोलेसनमा राख्ने जिल्ला प्रशासनले जनाएको छ । जुन ठाउँका स्थानीय हुन् त्यसै पालिका र जिल्लालाई खबर गरेर सुरक्षित रूपमा त्यही नै पुर्‍याउने निर्णय मंगलबारको विपद् व्यवस्थापन समितिको बैठकले गरेको छ । जिल्लामा कोरोनाको अवस्था बुझ्नका लागि घुम्ती परीक्षण पनि गरिने प्रमुख जिल्ला अधिकारी पाण्डेले बताए । २५ जनाभन्दा बढी नागरिकलाई भेला हुन नदिने पनि प्रशासनले जनाएको छ । बैतडीमा फ्रन्टलाइनरलाई लगाइने खोप कार्यक्रम अझै सुरु भएको छैन । प्रदेशको आपूर्ति केन्द्रबाट खोप प्राप्त भएपछि सुरु गरिने स्वास्थ्य कार्यालयले जनाएको छ ।

प्रकाशित : माघ ५, २०७८ ०९:१७
पूरा पढ्नुहोस्
प्रतिक्रिया
पठाउनुहोस्
×