संक्रमण नियन्त्रणमा पालिकाहरू कमजोर- सुदूरपश्चिम - कान्तिपुर समाचार

संक्रमण नियन्त्रणमा पालिकाहरू कमजोर

स्थानीय तहले समन्वय नगर्दा सार्वजनिक सवारीसाधनको प्रयोग गरेरै संक्रमितहरु घर पुग्छन्
तृप्ति शाही

बैतडी — जिल्लामा अहिले दैनिकजसो कोरोना संक्रमित देखिरहेका छन् । २० दिनअघिसम्म कोरोना संक्रमितको संख्या शून्य रहेको जिल्लामा मंगलबारसम्म ४६ सक्रिय संक्रमित पुगिसकेका छन् । मंगलबार मात्र १० जनामा कोरोना पुष्टि भएको छ ।

संक्रमित दिनहुँ बढ्दै गइरहेको स्वास्थ्य कार्यालयले जनाएको छ । १/२ जनाबाहेक सबै जना बैतडीस्थित नेपाल—भारत सीमानाका झुलाघाटमा गरिएको एन्टिजेन परीक्षण क्रममा पोजिटिभ देखिएका हुन् । स्थानीय तहले बेवास्ता गर्दा सबै संक्रमितहरू आफ्नो तरिकाले सीमानाकाबाट सिधै घर गएका छन् । यसले गर्दा समुदायमा संक्रमण धेरै फैलिन सक्ने सक्ने स्वास्थ्य कार्यालय बैतडीका प्रमुख योगेशप्रसाद भट्टले बताए । भारततर्फ आवागमन बढी हुने सीमानाकाको कारण कैलाली र कञ्चनपुरपछि सुदूरपश्चिमका ९ जिल्लामध्ये कोरोना धेरै जोखिम भएको बैतडी पनि हो । ‘हाम्रो जिल्लाको अवस्था पनि जटिल नै छ,’ स्वास्थ्य कार्यालय प्रमुख भट्टले बताए । झुलाघाट नाकाबाट अहिले दैनिक रूपमा सयौंको संख्यामा भारतका विभिन्न सहरबाट नेपाली घर फर्किरहेका छन् । दैनिक ६० देखि ७० जनाको कोरोना परीक्षण भइरहेको छ । भारतबाट भित्रिने धेरैजसोमा कोरोना पोजिटिभ देखिरहेको छ । कोरोना संक्रमण देखिए पनि उनीहरू सिधै घर जाने गरेका छन् ।

स्थानीय तहले समन्वय नगर्दा सार्वजनिक सवारीसाधनको प्रयोग गरेरै संक्रमितहरू घर पुग्छन् । उनीहरूको बसोबास पनि घरमै हुने गरेकाले समुदायमा पनि संक्रमणको जोखिम बढिरहेको स्वास्थ्य कार्यालयका प्रमुख भट्ट बताउँछन् । जिल्लामा कोरोना बढ्दै गएपछि मंगलबार जिल्ला कोराना रोकथाम व्यवस्थापन समितिको बैठक बस्यो । प्रमुख जिल्ला अधिकारी संयोजक रहेको समितिको बैठकमा जिल्लास्थित स्वास्थ्य कार्यालय, अस्पताललगायत सम्बन्धित कार्यालय र स्थानीय तहका प्रमुख वा उपप्रमुखलाई बैठकमा उस्थितिका लागि आग्रह गरिएको थियो । जिल्ला सदरमुकाममा रहेको दशरथचन्द नगरपालिकाबाहेक अरू कुनै पनि पालिकाका प्रतिनिधि बैठकमा सहभागी भएनन् ।

जिल्लाका प्रायः सबै पालिकामा संक्रमित देखिए पनि स्थानीय जनप्रतिनिधिहरूले संक्रमणको समस्या बारे वास्तै गरेका छैनन् । आइसोलेसनबारे सोधपुछ गर्दा सबै पालिकाले आइसोलेसन केन्द्र छन् भन्ने गरे पनि संक्रमितहरू घरै जानुपर्ने अवस्था रहेको स्वास्थ्य कार्यालयले जनाएको छ । पहिलो र दोस्रो चरणको कोरोना संक्रमणका बखतमा पालिकाहरूले संक्रमितको व्यवस्थापनमा धेरै चासो दिएका थिए ।

जिल्लामा फैलिरहेको कोरोनाबारे धेरै पटक खबर गर्दा पनि पालिकाबाट बैठकमै सहभागी नहुने गरेको प्रमुख जिल्ला अधिकारी राजेन्द्रदेव पाण्डे बताउँछन् । ‘आइसोलेसनको व्यवस्थापन गर्नुस् । संक्रमितलाई पनि व्यवस्थापन गर्नुपर्छ भनेर पत्र धेरै पटक पठाएको छु,’ उनले भने, ‘मौखिक रूपमा पनि सबैलाई भनेको छु । अझै काम हुन सकेको छैन ।’ आफूले समन्वय र जिल्लामा आइसोलेसन केन्द्र बनाउने कार्यको सुरुवात गरेको उनले बताए । अबदेखि सीमानाका झुलाघाटमा देखिएका संक्रमितलाई एम्बुलेन्समार्फत ल्याएर सदरमुकामस्थित दशरथचन्द नगरपालिकाका निर्माण भएको आइसोलेसनमा राख्ने जिल्ला प्रशासनले जनाएको छ । जुन ठाउँका स्थानीय हुन् त्यसै पालिका र जिल्लालाई खबर गरेर सुरक्षित रूपमा त्यही नै पुर्‍याउने निर्णय मंगलबारको विपद् व्यवस्थापन समितिको बैठकले गरेको छ । जिल्लामा कोरोनाको अवस्था बुझ्नका लागि घुम्ती परीक्षण पनि गरिने प्रमुख जिल्ला अधिकारी पाण्डेले बताए । २५ जनाभन्दा बढी नागरिकलाई भेला हुन नदिने पनि प्रशासनले जनाएको छ । बैतडीमा फ्रन्टलाइनरलाई लगाइने खोप कार्यक्रम अझै सुरु भएको छैन । प्रदेशको आपूर्ति केन्द्रबाट खोप प्राप्त भएपछि सुरु गरिने स्वास्थ्य कार्यालयले जनाएको छ ।

प्रकाशित : माघ ५, २०७८ ०९:१७
प्रतिक्रिया
पठाउनुहोस्

कर्णालीमा बुस्टर डोज अभाव

खोप पर्याप्त नभएपछि अझै लगाउन सुरू भएको छैन
ज्योति कटुवाल

सुर्खेत — कर्णाली प्रदेशमा बुस्टर डोजको अभाव देखिएको छ । खोपको दुवै डोज लगाइसकेका १ लाख ४४ हजार २ सय २२ जनालाई बुस्टर डोज अभाव भएको हो । खोप पर्याप्त नभएपछि बुस्टर डोज लगाउन सुरु भएको छैन । केही जिल्लामा कोरोनाविरुद्धको दोस्रो मात्रा पनि लगाउन समस्या भएको छ ।

पहिलो खोप लगाएकामध्ये अझै ३ लाख ४५ हजारले अझै खोपको दोस्रो मात्रा नपाएको निर्देशक डा. रविन खड्काले बताए । उनका अनुसार तत्कालका लागि प्रदेशभरि १ लाख १५ हजार ७ सय ८६ डोज कोभिसिल्ड र २८ हजार डोज भेरोसिलको अभाव छ । कर्णालीमा ९ लाख ४१ हजार ६ सय ६१ जनाले पहिलो चरणको खोप लगाए पनि ५ लाख ९६ हजार ३ सय ३९ जनाले मात्र दोस्रो चरणको खोप पाएका छन् । प्रदेश सरकारको लक्ष्यअनुसार अझै ३ लाख जनाले पहिलो चरणको खोप लगाएका छैनन् । पहिलो, दोस्रो र बुस्टर डोज गरी अझै कर्णालीमा ९ लाख डोज खोप आवश्यक पर्ने उनले जानकारी दिए ।

निर्देशनालयका अनुसार अहिलेसम्म ३३.६ प्रतिशतले पूर्णमात्रामा खोप पाएका छन् । ४५.४ प्रतिशतले खोपको पहिलो मात्रा लगाएको निर्देशनालयले जनाएको छ । अहिले कर्णालीका विभिन्न जिल्लामा २ सय २८ जना सक्रिय संक्रमित छन् । उनीहरू सबै होम आइसोलेसनमा बसेको निर्देशनालयले जनाएको छ ।

कर्णाली प्रदेशका मुख्यमन्त्री जीवनबहादुर शाहीले जतिसक्दो छिटो सबै प्रकारका खोप उपलब्ध गराउने गरी पहल थालिएको बताए । उनले माघ ७ गतेबाट सबै स्थानीय तहमा बुस्टर डोज लगाउन अभियान सुरु गरिने जानकारी दिए । ‘अहिले प्रदेश अस्पताल र मेहेलकुना अस्पतालबाट सुरु गरेका छौं,’ उनले भने, ‘एक हप्तामै सबै स्थानीय तहमा खोपको व्यवस्थापन हुन्छ ।’

स्वास्थ्य सेवा कार्यालय सुर्खेतका प्रमुख चेतनिधि वाग्लेले खोपको दोस्रो मात्रा लगाएको ६ महिना कटेका र अग्रपंक्तिमा खटिएकाहरूलाई बुस्टर डोज लगाउन थालिएको बताए । उनका अनुसार प्रहरी, स्वास्थ्यकर्मी, पत्रकार र कर्मचारीका लागि ८ हजार ५ सय ८९ डोज बुस्टर खोप लगाउन थालिएको बताए ।

प्रदेश सरकारले थाल्यो तयारी
कोभिड–१९ को ओमिक्रोन भाइरस संक्रमण दर बढेसँगै कर्णाली प्रदेश सरकारले नियन्त्रणका लागि तयारी थालिएको जनाएको छ । मुख्यमन्त्री शाहीले तेस्रो लहरको कोरोना संक्रमण रोकथाम गर्न ८ जिल्लामा १ सय देखि ५ सय एलपीएम क्षमताको प्लान्ट स्थापना गरेको बताए । उनका अनुसार गत वर्ष सञ्चालन गरिएका क्वारेन्टिन र आइसोलेसन पुनः सञ्चालन गर्ने तयारी थालिएको छ । ‘नाकामा हेल्थ डेस्क राखी बाहिरबाट आउनेको निगरानी गर्न थालेका छौं,’ उनले भने, ‘भारतबाट आउनेहरूलाई कोरोना परीक्षण गरेर मात्र घर जाने व्यवस्था मिलाइएको छ ।’ कर्णालीका ६६ वटा सामुदायिक स्वास्थ्य इकाइहरूबाट कोरोना उपचारको व्यवस्था मिलाउन ३ करोड रुपैयाँ विनियोजन गरिएको उनले जानकारी दिए ।

प्रदेश सरकारले प्रदेश अस्पताल सुर्खेतमा विभिन्न उपकरण खरिद गर्न ३५ लाख रुपैयाँ छुट्याइएको जनाएको छ । कर्णाली भित्रिने नाका भेरीगंगा नगरपालिकामा सरुवा रोग अस्पताल र होल्डिङ सेन्टरको काम सुरु गरिएको मुख्यमन्त्री शाहीले बताए । उनका अनुसार प्रदेश अस्पतालमा संक्रमितहरूको चाप घटाउन भेरीगंगा, गुर्भाकोट, पञ्चपुरी र सल्यानको कपुरकोटमा आइसोलेसन स्थापनाको तयारी गरिएको छ ।

सुर्खेत, दैलेख र जाजरकोट जिल्ला अस्पताललाई एम्बुलेन्स खरिद गर्न ८० लाख रुपैयाँ विनियोजन गरिएको छ । शव वाहन खरिद गर्न ४८ लाख रुपैयाँ छुट्याइएको छ । कर्णाली प्रदेश सरकारले १० वटै जिल्लामा कोभिड विशेष एम्मुलेन्स राख्ने भएको छ । तेस्रो चरणको कोरोना महामारीलाई ध्यान दिँदै विशेष एम्बुलेन्स तयारी अवस्थामा राख्न मुख्यमन्त्री तथा मन्त्रिपरिषद् कार्यालयले निर्देशन दिएको हो ।

प्रकाशित : माघ ५, २०७८ ०९:०७
पूरा पढ्नुहोस्
प्रतिक्रिया
पठाउनुहोस्
×