अवस्थीको हत्या आरोपमा थप एक पक्राउ- सुदूरपश्चिम - कान्तिपुर समाचार

अवस्थीको हत्या आरोपमा थप एक पक्राउ

कान्तिपुर संवाददाता

बैतडी — सूर्नया गाउँपालिका—६ खर्काधारका डम्मर अवस्थीको हत्या आरोपमा नियन्त्रणमा लिएका स्थानीय नवराज अवस्थीले पनि घटनामा संलग्न रहेको स्वीकार गरेका छन् । प्रहरीले आइतबार नवराजलाई नियन्त्रणमा लिएको थियो । सोधपुछका क्रममा नवराजको पनि हत्यामा संलग्नता रहेको खुलेको जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले बताए ।

मंगलबार अदालतबाट २ दिनको म्याद थपेर उनीमाथि अनुसन्धान भइरहेको ओझाले बताए ।

यसअघि सोही ठाउँका हरिश अवस्थीले पनि डम्मरको हत्यामा संलग्न रहेको स्वीकार गरिसकेका छन् । उनीमाथि पनि अदालतबाट म्याद थप गरेर प्रहरीले अनुसन्धान गरिरहेको छ । मंसिर १४ गतेबाट घरबाटै हराएका डम्मरको शव गत बुधबार स्थानीय धुरा जंगलको गुफामा गाडेको अवस्थामा फेला परेको थियो । उनको हत्या गरेर शव गुफामा गाडेको अवस्थामा फेला परेको हो ।

शव पोस्टमार्टमपछि अहिले पनि जिल्ला अस्पतालमै छ । उनको हत्यामा संलग्न सबै पक्राउ नपर्दासम्म शव नबुझ्ने आफन्तहरुले अडान लिएका छन् । डम्मर नेत्रविक्रम चन्द समूहका कार्यकर्ता हुन् । चन्द समूहले पनि हत्यामा संलग्न सबैको पहिचान गरी कारबाही हुनुपर्ने, उचित क्षतिपूर्ति दिनुपर्ने र सहिद घोषणा गर्नुपर्ने माग गरेको छ । घटनाबारे अनुसन्धान भइरहेको प्रहरीले जनाएको छ ।


प्रकाशित : माघ ४, २०७८ १८:५७
प्रतिक्रिया
पठाउनुहोस्

प्रदेश १ को नाम हिउँदे अधिवेशनबाट टुंगो लगाउँछौं : मुख्यमन्त्री राई

रासस

काठमाडौँ — प्रदेश १ का मुख्यमन्त्री राजेन्द्रकुमार राईले प्रदेशको नामकरण प्रदेशसभाको आउँदो हिउँदे अधिवेशनबाट टुंगो लगाउने बताएका छन् । 

मुख्यमन्त्रीको कार्यालयमा मंगलबार सञ्चारकर्मीसँग कुराकानी गर्दै उनले भने, 'प्रदेशको नाम प्रदेशसभाले नै टुंगो लगाउँछ ।' मुख्यमन्त्री राईले आफूहरू सरकारमा आएपछि सभाको एउटा पनि बैठक नबसेको सन्दर्भ उल्लेख गर्दै उनले अब छिट्टै हिउँदे अधिवेशन आरम्भ गरेर प्रदेशको नामकरण गर्ने प्रक्रिया अगाडि बढाउने जानकारी दिए ।

उनले यही माघ २० गतेभित्र हिउँदे अधिवेशन सुरु गरेर प्रदेशको नाम टुंगो लगाउनेतर्फ आवश्यक प्रक्रिया अघि बढाइने बताए ।

प्रकाशित : माघ ४, २०७८ १८:५१
पूरा पढ्नुहोस्
प्रतिक्रिया
पठाउनुहोस्
×