एमाले कञ्चनपुरको अध्यक्षमा विष्ट निर्वाचित- सुदूरपश्चिम - कान्तिपुर समाचार

एमाले कञ्चनपुरको अध्यक्षमा विष्ट निर्वाचित

भवानी भट्ट

कञ्चनपुर — नेकपा (एमाले) कञ्चनपुरका अध्यक्षमा सुरेन्द्र विष्ट विजयी भएका छन् । विष्टले वर्तमान अध्यक्ष वीरबहादुर थापा पातललाई ९८ मतान्तरले पराजित गरेका हुन् । 

बुधबार अबेर सार्वजनिक मत परिणामअनुसार विष्टले २८१ र थापाले १८३ मत प्राप्त गरेका छन् । अन्य पदाधिकारीमा पनि विष्ट प्यानलका सबै उम्मेदवार विजयी भएका छन् । विष्ट भीमदत्त नगरपालिका नगर प्रमुख हुन् । उनी वर्तमान कार्यसमितिका सचिवसमेत हुन् ।

उपसभापतिमा लक्ष्मी बुढा, सचिवमा पल्लवराज भट्ट र उपसचिवमा कर्णबहादुर चन्द तथा फैरु तामाङ विजयी भएका छन् ।

पुस २३ गते आठौं जिल्ला अधिवेशन उद्घाटन भएको थियो । त्यसपछि सहमतिका लागि ४ दिनसम्म प्रयास गर्दा पनि असफल भएपछि मतदानबाट नेतृत्व चयन गरिएको हो । मंगलबार राति भएको मतदानमा ४९९ मतदाता भए पनि ४७० मत खसेको थियो ।


प्रकाशित : पुस २८, २०७८ २१:०९
प्रतिक्रिया
पठाउनुहोस्

देशभर एकै दिन आठ जना मृत भेटिए

रासस

काठमाडौँ — काठमाडौंमा दुईसहित देशभर बुधबार आठ जना मृत फेला परेका छन् । काठमाडौंसहित सङ्खुवासभा, नवलपरासी (पश्चिम), ताप्लेजुङ, तेह्रथुम, सिरहा, नवलपरासी (पूर्व) मा यसरी मानिसको मृत्यु भएको हो ।


प्रहरीका अनुसार काठमाडौं महानगरपालिका–२६ मित्रनगरस्थित गेष्ट हाउसमा सिन्धुपाल्चोक मेलम्ची नगरपालिका–९ बस्ने ५० वर्षीय हर्कबहादुर गिरी बुधबार मृत भेटिएका हुन् । सोमबारदेखि गेष्ट हाउसमा बस्दैआएका गिरी आफू बसेकै कोठाभित्र मृत फेला परेका थिए ।

यस्तै काठमाडौं महानगरपालिका–३२ कोटेश्वरमा पार्किङ गरी राखिएको पुरानो माइक्रोबसभित्र २२ वर्षीय एक पुरुष पनि मृत भेटिएको प्रहरीले जानकारी दिएको छ ।

यसैबीच सङ्खुवासभाको खाँदबारी नगरपालिका–१ डडारे बस्ने ४० वर्षीय महेश राई पनि मृत भेटिएका छन् । बिरामी भई डडारेस्थित जगत राईको घरमा सुतेका उनको शव बरण्डामा फेला परेको प्रहरीले जनाएको छ । उक्त घटनाको अनुसन्धानका लागि प्रहरीले एक जनालाई पक्राउ समेत गरेको छ ।

यस्तै नवलपरासी (पश्चिम), बर्दघाट नगरपालिका–५ बस्ने २८ वर्षीय दिनेश थारु घर नजिकैको खेतमा मृत भेटिए भने नवलपरासी (पूर्व), मध्यबिन्दुस्थित नारायणी नदीको भङ्गालोमा अर्का एक पुरुष मृत भेटिएको प्रहरी प्रधान कार्यालयले जानकारी दिएको छ ।

ताप्लेजुङ, सिरिजङ्घा गाउँपालिका–५ पेदाङ बस्ने ६७ वर्षीय टीकाराम राई पनि आफ्नै घर नजिकै मृत भेटिएको प्रहरीले जनाएको छ । मिलमा गएका राई बेलुका अबेरसम्म नफर्किएपछि खोजी गर्ने क्रममा शव फेला परेको बताइएको छ।

सिराहामा पनि यस्तै अर्को घटना भएको छ । सिरहाको मिर्चैया नगरपालिका–७ भालुखोलाको किनारमा परिचय खुल्न नसकेकी करिब ४० वर्षीया महिला मृत अवस्थामा फेला परेको प्रहरीले जनाएको छ । सबै घटनाबारे अनुसन्धान भइरहेको प्रहरीको भनाइ छ ।

प्रकाशित : पुस २८, २०७८ २०:४२
पूरा पढ्नुहोस्
प्रतिक्रिया
पठाउनुहोस्
x
×