अस्पताल निर्माण योजना अलपत्र- सुदूरपश्चिम - कान्तिपुर समाचार

अस्पताल निर्माण योजना अलपत्र

तृप्ति शाही

बैतडी — सरकारले स्थानीय तहमा आधारभूत अस्पताल बनाउने भन्दै गत वर्ष मंसिर १५ गते देशका ३ सय ९६ स्थानीय तहमा एकै दिन शिलान्यास कार्यक्रम गरेको थियो । तत्कालीन प्रधानमन्त्री केपी शर्मा ओलीले अस्पतालहरूको शिलान्यास गरेका थिए । जसअनुरूप बैतडीका ७ वटा स्थानीय तहमा पनि आधारभूत अस्पताल बनाउने योजना थियो ।

जिल्लाका पुर्चौडी र पाटन नगरपालिका, शिवनाथ, पञ्चेश्वर, सुर्नया दोगडाकेदार र डिलाशैनी गाउँपालिकामा अस्पताल निर्माण गर्ने लक्ष्य थियो । तर अहिलेसम्म कुनै पालिकामा पनि आधारभूत अस्पताल बनाउने योजना अघि बढ्न सकेको छैन । अस्पताल कहाँ बनाउने भन्ने विषयमा विवाद हुँदा धेरै पालिकामा काम अगाडि बढ्न सकेको छैन ।

पुर्चौडी नगरपालिका, डिलाशैनी गाउँपालिका र पञ्चेश्वर गाउँपालिकामा जग्गा विवादले काम अगाडि बढ्न सकेको छैन । स्थानीयको माग एकातिर छ भने जनप्रतिनिधि अर्कैतिर बनाउने सुरमा रहदा काम अघि बढ्न नसकेको हो । पालिकाका पहुँचमा पुगेका नेताहरूले पनि आफूलाई पायक पर्ने ठाउँमा अस्पताल बनाउन खोज्दा पनि धेरै पालिकामा विवाद भएको छ ।

कहाँ बनाउने भन्ने विवादले गर्दा नै पञ्चेश्वर गाउँपालिकामा अस्पताल निर्माणको काम अघि बढ्न नसकेको पालिकाका स्वास्थ्य संयोजक रामसागर शाह बताउँछन् । सरकारले स्वास्थ्यचौकीलाई स्तरोन्नती गरेर बनाउने बताए पनि पालिका भएकै ठाउँमा बनाउने एक थरी स्थानीयको माग भएकोले कामै सुरु हुन नसकेको उनले बताए । ‘पहिलो चरणमा सरकारले तोकेका ठाउँमा स्वास्थ्यचौकीकै जमिन थियो । त्यही बनाउने योजना थियो, माटोको परीक्षण पनि भएको हो,’ शाहले भने, ‘तर स्थानीयले नमानेर पालिका भएकै ठाउँमा बनाउने भनेर काम रोकियो ।’ पालिका भएको स्थानमा जमिन छनोट भएकोले त्यही बनाउने कि भन्ने कुरा चलिरहेको उनले बताए ।

दोगडाकेदार गाउँपालिकामा पनि अहिलेसम्म अस्पताल निर्माणको समय जग खन्नमै बितेको छ । पालिकाको वडा—६ को मजगाउँमा जग्गा सम्याउने काम भइरहेको स्थानीय लक्ष्मी जोशीले बताए । डिलाशैनी गाउँपालिकामा पनि नेताको इच्छाअनुसार स्थानीयलाई पायक नपर्ने ठाउँमा अस्पताल निमार्णको काम सुरु भएको भन्दै विवाद भएको छ । सुरुबाटै विवाद भए पनि निर्माणस्थल सम्याउने काम पालिकाले गरेको छ । जिल्लाको सुर्नया गाउँपालिकामा पनि बल्ल डीपीआर तयार गर्ने कार्य सकिएर छनोट प्रक्रियामा छ ।

स्वास्थ्य संयोजक रामसिंह महराका अनुसार अहिलेसम्म सक्नुपर्ने काम सुरु हुने तयारीमा छ । यो योजना शाखाको जिम्मा हुने भएकोले ढिलो हुनुको कारण थाहा नभएको उनले सुनाए । स्वास्थ्य कार्यालयको अधिकारभित्र यो नपर्ने भएकोले आफूहरूलाई जानकारी नआउने स्वास्थ्य कार्यालयले जनाएको छ । मौखिक रूपले जान्न खोज्दा कहीँ पनि कामले तीव्रता पाउन नसकेको जानकारी पाएको स्वास्थ्य कार्यालयका प्रमुख योगेशप्रसाद भट्टले बताए ।

प्रकाशित : पुस १०, २०७८ १२:००
प्रतिक्रिया
पठाउनुहोस्

दुर्घटना घटाउन ‘दुई मिनेट चालकसँग’

सवारी दुर्घटनामा गत वर्ष ३४ र यो वर्ष १३ जनाले ज्यान गुमाएका छन्
तृप्ति शाही

बैतडी — बैतडीको पाटन नगरपालिकाको सकारमा गत मंसिर २० गते जिप दुर्घटना हुॅदा ५ जनाले ज्यान गुमाए । ५ जना घाइते भए । सिमसिमे पानीमा कच्ची सडकमा कुदिरहेको जिप उकालोमा चिप्लिएर तल खस्दा दुर्घटनामा परेको थियो ।

यसअघि मंसिरकै ५ गते जिल्ला सदरमुकाम गोठलापानी नजिकै कलुवाड मोडमा जिप सडकबाट करिब ७ सय मिटर तल खस्दा भएको दुर्घटनामा ६ जनाले ज्यान गुमाए । यस्तै वैशाख २१ गते जिल्लाको पञ्चेश्वर गाउॅपालिका –६ को गणमेश्वरमा जिप दुर्घटना हुदा ६ जनाको मृत्यु भयो । ४ जना घाइते भए । ग्रामीण क्षेत्रको कच्ची सडकको मोडमा जिप दुर्घटनामा परेको थियो ।

जिल्लामा पछिल्लो समय सवारी दुर्घटना बढिरहेका छन् । चालु आर्थिक वर्षको अहिलेसम्म मात्र २६ वटा सवारी दुर्घटना भएका छन् । दुर्घटनामा १३ जनाको मृत्यु भएको जिल्ला ट्राफिक प्रहरी कार्यालय बैतडीले जनाएको छ । ५६ जना घाइते भएका छन् । पक्की सडकमा १२ वटा दुर्घटना भएका र कच्चीमा ८ वटा भएको जिल्ला ट्राफिक प्रहरी प्रमुख आकाश रावलले बताए । उनले भने, ‘पक्की सडकमा एक/दुई बाहेक सामान्य दुर्घटना भएका छन् । कच्चीमा भएका दुर्घटनाले मृत्यु हुने र घाइते हुने बढी छन् ।’

गत आर्थिक वर्षमा जिल्लामा सवारी दुर्घटनामा परि ३४ जनाले ज्यान गुमाएका थिए । ७४ जना घाइते भए । ठुला दुर्घटनाहरू कच्ची सडकमै भएको प्रहरीको तथ्यांक छ । बिना इस्टमेट स्थानीय तहले खनेका सडकमा जथाभावी सवारीसाधन चलाउदा दुर्घटनाहरू बढ्दै गइरहेका छन् ।

बैतडीमा चालक, सडक र यान्त्रिक कारणले दुर्घटना भइरहेका बुभिएको जिल्ला प्रहरी कार्यालयका प्रवक्ता प्रहरी निरीक्षक दर्शन खड्का बताउॅछन् । ‘सवारीसाधन चलाउॅदा चालकको लापरवाही र सहचालकले चलाउॅदा दुर्घटना भएका छन् । कच्ची सडकहरू साॅघुरा छन् । मोडहरू असजिला र धेरै छन्’ उनले भने, ‘सडकको अवस्था पनि कमजोर छ । सवारीसाधनहरूको अवस्था चेकजाॅच नभएकोले ब्रेक फेल भएर पनि दुर्घटनाहरू बढिरहेका छन् ।’

ग्रामीण क्षेत्रमा जथाभावी काटिएका सडकहरू भएकोले दुर्घटना बढिरहेका छन् । स्थानीय तहहरूले नामका मात्र सडक काटेकोले यात्रुहरूले ज्यान गुमाइरहेका स्थानीय बताउछन् । गुणस्तरविहीन सडकका कारण दुर्घटना हुने पञ्चेश्वर गाउॅपालिका—१ का केशव घटालले बताए । उनले भने,‘बाध्यताले चालकले गाडी चलाउनै पर्ने छ । सडक काटिएका छन् । स्तरोन्नती हुॅदैन । डोजर चालकले सडक काटिदिएका छन् । दुर्घटना बढिरहेका छन् ।’

अनुमती नलिइ ग्रामीण क्षेत्रमा सडकहरू संञ्चालनमा रहेको पुरचौडी नगरपालिका—१ का गणेश धामीले बताए । ‘सडक साॅघुरा छन् । एक गाडी आयो भने अर्को गाडीलाई समस्या हुन्छ । कुन सडकमा गाडी चल्ने कुनमा नचल्ने भन्ने पनि केहि छैन,’ उनले भने, ‘चालकले चलाउने आँट गरेका सबै सडकमा गाडी चलेका छन् । दुर्घटना बढिरहेका छन् ।’

चालकले मादक पदार्थ सेवन गरेर र यात्रुहरू क्षमता भन्दा बढी राखेर पनि दुर्घटना हुने गरेको उनले बताए । जिल्लामा सवारी दुर्घटना बढेपछि प्रहरीले जाॅचमा कडाइ गरेको छ । जिल्ला ट्राफिक प्रहरी कार्यालय बैतडीले ‘दुई मिनेट चालकसॅंग’ कार्यक्रम सञ्चालन गरेको छ । जिल्ला ट्राफिक प्रहरी कार्यालयका प्रमुख रावलले सवारी दुर्घटना न्यूनिकरण गर्ने उद्देश्यले दुई मिनेट चालकसंॅग कार्यक्रम सञ्चालन गरेर सवारी चालकलाई सम्झाइ बुझाइ गर्ने गरिएको बताए ।

प्रकाशित : पुस ९, २०७८ ११:३१
पूरा पढ्नुहोस्
प्रतिक्रिया
पठाउनुहोस्
×