अस्पताल निर्माण योजना अलपत्र- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

अस्पताल निर्माण योजना अलपत्र

तृप्ति शाही

बैतडी — सरकारले स्थानीय तहमा आधारभूत अस्पताल बनाउने भन्दै गत वर्ष मंसिर १५ गते देशका ३ सय ९६ स्थानीय तहमा एकै दिन शिलान्यास कार्यक्रम गरेको थियो । तत्कालीन प्रधानमन्त्री केपी शर्मा ओलीले अस्पतालहरूको शिलान्यास गरेका थिए । जसअनुरूप बैतडीका ७ वटा स्थानीय तहमा पनि आधारभूत अस्पताल बनाउने योजना थियो ।

जिल्लाका पुर्चौडी र पाटन नगरपालिका, शिवनाथ, पञ्चेश्वर, सुर्नया दोगडाकेदार र डिलाशैनी गाउँपालिकामा अस्पताल निर्माण गर्ने लक्ष्य थियो । तर अहिलेसम्म कुनै पालिकामा पनि आधारभूत अस्पताल बनाउने योजना अघि बढ्न सकेको छैन । अस्पताल कहाँ बनाउने भन्ने विषयमा विवाद हुँदा धेरै पालिकामा काम अगाडि बढ्न सकेको छैन ।

पुर्चौडी नगरपालिका, डिलाशैनी गाउँपालिका र पञ्चेश्वर गाउँपालिकामा जग्गा विवादले काम अगाडि बढ्न सकेको छैन । स्थानीयको माग एकातिर छ भने जनप्रतिनिधि अर्कैतिर बनाउने सुरमा रहदा काम अघि बढ्न नसकेको हो । पालिकाका पहुँचमा पुगेका नेताहरूले पनि आफूलाई पायक पर्ने ठाउँमा अस्पताल बनाउन खोज्दा पनि धेरै पालिकामा विवाद भएको छ ।

कहाँ बनाउने भन्ने विवादले गर्दा नै पञ्चेश्वर गाउँपालिकामा अस्पताल निर्माणको काम अघि बढ्न नसकेको पालिकाका स्वास्थ्य संयोजक रामसागर शाह बताउँछन् । सरकारले स्वास्थ्यचौकीलाई स्तरोन्नती गरेर बनाउने बताए पनि पालिका भएकै ठाउँमा बनाउने एक थरी स्थानीयको माग भएकोले कामै सुरु हुन नसकेको उनले बताए । ‘पहिलो चरणमा सरकारले तोकेका ठाउँमा स्वास्थ्यचौकीकै जमिन थियो । त्यही बनाउने योजना थियो, माटोको परीक्षण पनि भएको हो,’ शाहले भने, ‘तर स्थानीयले नमानेर पालिका भएकै ठाउँमा बनाउने भनेर काम रोकियो ।’ पालिका भएको स्थानमा जमिन छनोट भएकोले त्यही बनाउने कि भन्ने कुरा चलिरहेको उनले बताए ।

दोगडाकेदार गाउँपालिकामा पनि अहिलेसम्म अस्पताल निर्माणको समय जग खन्नमै बितेको छ । पालिकाको वडा—६ को मजगाउँमा जग्गा सम्याउने काम भइरहेको स्थानीय लक्ष्मी जोशीले बताए । डिलाशैनी गाउँपालिकामा पनि नेताको इच्छाअनुसार स्थानीयलाई पायक नपर्ने ठाउँमा अस्पताल निमार्णको काम सुरु भएको भन्दै विवाद भएको छ । सुरुबाटै विवाद भए पनि निर्माणस्थल सम्याउने काम पालिकाले गरेको छ । जिल्लाको सुर्नया गाउँपालिकामा पनि बल्ल डीपीआर तयार गर्ने कार्य सकिएर छनोट प्रक्रियामा छ ।

स्वास्थ्य संयोजक रामसिंह महराका अनुसार अहिलेसम्म सक्नुपर्ने काम सुरु हुने तयारीमा छ । यो योजना शाखाको जिम्मा हुने भएकोले ढिलो हुनुको कारण थाहा नभएको उनले सुनाए । स्वास्थ्य कार्यालयको अधिकारभित्र यो नपर्ने भएकोले आफूहरूलाई जानकारी नआउने स्वास्थ्य कार्यालयले जनाएको छ । मौखिक रूपले जान्न खोज्दा कहीँ पनि कामले तीव्रता पाउन नसकेको जानकारी पाएको स्वास्थ्य कार्यालयका प्रमुख योगेशप्रसाद भट्टले बताए ।

प्रकाशित : पुस १०, २०७८ १२:००
प्रतिक्रिया
पठाउनुहोस्

ओमिक्रोनबाट संक्रमित १० मध्ये ९ जनाले खोप लगाएका थिए, खोप मात्र पर्याप्त छैन : भारत सरकार

'चाडपर्व र नयाँ वर्षमा सतर्क रहनूस् । यसले पनि ओमिक्रोन फैलिन सक्छ । हामी निकै जिम्मेवार बन्नुपर्छ । मास्क अनिवार्य लगाउनुस् र हात सफा राख्नुहोस् ।'
कान्तिपुर संवाददाता

काठमाडौँ — भारत सरकारले कोरोना संक्रमण रोकथाम तथा न्यूनीकरणका लागि खोप अभियान मात्र पर्याप्त नहुने बताएको छ । शुक्रबार भारतको केन्द्र सरकारले एउटा तथ्यांक सार्वजनिक गर्दै खोपले मात्र कोरोना नरोकिने उल्लेख गर्दै मास्क र निगरानी आवश्यक भएको बताएको हो ।

कोरोना भाइरसको नयाँ भेरिएन्ट ओमिक्रोनको १८३ केसको विश्लेषणपछि भारतीय स्वास्थ्य तथा परिवार कल्याण मन्त्रालयले यस्तो जानकारी दिएको हो । स्वास्थ्य मन्त्रालयका सचिव राजेश भूषणले प्रस्तुत गरेको तथ्यांकमा ओमिक्रोनबाट संक्रमित १० मध्ये ९ जनाले खोप लगाएको पाइएको छ । त्यस्तै २७ प्रतिशत संक्रमित भारत नछाडेका व्यक्ति रहेका छन् । यसबाट पनि ओमिक्रोन स्थानीय स्तरमा फैलिइसकेको अनुमान गर्न सकिन्छ ।

त्यस्तै ओमिक्रोनबाट संक्रमितमध्ये ९१ प्रतिशतले कोरोनाको पूर्ण मात्राको खोप लगाएका थिए । विश्लेषण गरिएका १८३ जनामध्ये केवल ७ जनाले मात्र खोप नलगाएको भेटिएको थियो । तीमध्ये तीन जनाले त बुस्टर डोजसमेत लगाएका थिए । ७३ जनाले खोप लगाएको/नलगाएको स्पष्ट नभएको र १६ जना खोप लगाउन चिकित्सकीय तरिकाले अयोग्य रहेको मन्त्रालयले जनाएको छ । कोभिड टास्क फोर्सका प्रमुख डा. भीके पालले डेल्टाको तुलनामा ओमिक्रोन बढी संक्रामक भएकाले सतर्क रहन चेतावनी दिएका छन् ।

डा. पालले मास्क नलगाई बाहिर निस्कने व्यक्तिहरूले घरमा ओमिक्रोन भित्र्याइरहेको बताए । त्यसकारण घरका अन्य व्यक्तिलाई पनि संक्रमणको जोखिम हुनाले आवश्यक सतर्कता अपनाउनुपर्ने उनको भनाइ छ । डा. पालले भने, 'मैले अत्यन्तै जोड दिएर भन्छु कि चाडपर्व र नयाँ वर्षमा सतर्क रहनूस् । यसले पनि ओमिक्रोन फैलिन सक्छ । हामी निकै जिम्मेवार बन्नुपर्छ । मास्क अनिवार्य लगाउनुस् र हात सफा राख्नुहोस् । सकेसम्म भीडभाडमा नजानुस् । अनावश्यक यात्रा स्थगित गर्नुहोस् ।'

त्यस्तै मन्त्रालयको विश्लेषणअनुसार ओमिक्रोनबाट संक्रमितमध्ये ७० प्रतिशतमा कुनै लक्षण देखिएको छैन । अहिले पनि भारतमा डेल्टाकै संक्रमण बढी रहेको छ । भारतमा अहिलेसम्म ४१५ जनालाई ओमिक्रोनबाट संक्रमित भएका छन् । त्यसमध्ये सबैभन्दा बढी महाराष्ट्रमा १०८, दिल्लीमा ७९, गुजरातमा ४३, तेलंगाना ३८ केरलमा ३७ र तमिलनाडुमा ३४ जनामा संक्रमण देखिएको छ ।

प्रकाशित : पुस १०, २०७८ ११:५९
पूरा पढ्नुहोस्
प्रतिक्रिया
पठाउनुहोस्
×