खोप लगाउन बालबालिकाको उत्साह- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

खोप लगाउन बालबालिकाको उत्साह

तृप्ति शाही

बैतडी — बैतडीमा पहिलो चरणमा कोरोनाविरुद्धको कोभिसिल्ड खोप लगाउन स्थानीयले आनाकानी गरेका थिए । स्वास्थ्य, सुरक्षा, सरकारी कर्मचारी, पत्रकारलगायत फिल्डमा खटिनेहरूलाई दिइएको खोप लगाउन कमै मान्छे मात्र खोप केन्द्र पुगेका थिए ।

त्यतिबेला स्वास्थ्य कार्यालयका कर्मचारीहरू खोप लगाइदिनुस् भन्दै हिँड्थे । परीक्षणका लागि लगाइएको खोप लगाउन धेरै मान्छे राजी थिएनन् । धेरै कमले मात्र खोप लगाए । त्यसपछिका खोपहरू पनि सबै सहजै लगाउन राजी भएनन् । पालिकामा गएको खोप स्वास्थ्य कार्यालयमै फिर्ता आउने अवस्था पनि थियो ।

तर अहिले अवस्था फेरिएको छ । जिल्लामा मंगलबारबाट १२ देखि १७ वर्षसम्मका बालबालिकालाई लगाउन लागिएको खोपमा उनीहरू उत्साहित भएर लगाइरहेका छन् । अहिले सबै बालबालिकाहरू खोप लगाउनका लागि पुग्ने गरेका स्वास्थ्य कार्यालयका प्रमुख योगेश प्रसाद भट्टले बताए । उनले भने, ‘पहिले परीक्षणका लागि हो भन्ने थियो र लगाउन मन गरेका थिएनन् ।

अहिले सबैले थाहा पाए यसले जीवन रक्षा गर्छ भनेर । धेरैले लगाइरहेका छन् ।’ जिल्लाका विद्यालयमा बालबालिकालाई खोप लगाइँदै छ । २ सय ५९ वटा खोप केन्द्रबाट बालबालिकाले खोप पाउँदै छन् । पालिकाका पायक पर्ने विद्यालयलाई खोपकेन्द्र बनाएर बालबालिकाहरूलाई विद्यालयमै खोप लगाइँदै छ । १२ देखि १७ वर्षसम्मका बालबालिकाहरू विद्यालय उमेरका भएकाले उनीहरूलाई विद्यालयमै खोप दिइएको स्वास्थ्य कार्यालयले जनाएको छ ।

बैतडीमा ३८ हजार बालबालिकाको संख्या स्वास्थ्य कार्यालयमा पुगेको भट्टले बताए । आफूहरूसँग खोप ३१ हजार जति आएको उनले बताए । हतारमा तथ्यांक आएकाले यो बढी हो भन्ने लागेको उनले बताए । पछिल्लो समय खोपप्रति स्थानीयको सकारात्मक बुझाइ रहेको सिगास गाउँपालिकाको शिवलिंग स्वास्थ्यचौकीका इन्चार्ज भीमसिंह ऐर बताउँछन् ।

समुदायका नागरिकले खोप लगाउनुपर्छ भन्ने सोचेका छन् । मोडर्ना खोप पालिकाअन्तर्गतका स्वास्थ्य संस्थाबाट स्वास्थ्यकर्मीहरू विद्यालयमा पुगेर विद्यार्थीलाई दिइरहेका छन् । डिलासैनी, सिगास गाउँपालिका र पुरचौडी नगरपालिकामा बुधबारबाट खोप अभियान सञ्चालन गरिएको स्वास्थ्य कार्यालयले जनाएको छ । बिहीबार पाटन र दशरथचन्द नगरपालिकामा खोप दिने अभियान सुरु हुनेछ । अन्य १० वटा पालिकामा पुस १० गतेसम्म सक्ने लक्ष्य रहेको स्वास्थ्य कार्यालयले जनाएको छ ।

प्रकाशित : पुस ८, २०७८ ०८:४२
प्रतिक्रिया
पठाउनुहोस्

माओवादी केन्द्र प्रदेश १ अध्यक्षमा नेम्वाङ

देवनारायण साह

माेरङ — माओवादी केन्द्र प्रदेश १ को अध्यक्षमा हर्कबहादुर नेम्वाङ विजयी भएका छन् । अर्थमन्त्री जनार्दन शर्माका प्रमुख स्वकीय सचिव नेम्वाङले १६९ मत ल्याएर विजयी भएका हुन् ।

अध्यक्षका अर्का प्रत्याशी मुक्साहाङ मेन्याङ्बाेले ६४ मत ल्याई पराजित भएका छन् । अध्यक्षमा खसेकाे २४० मतमध्ये ७ मत बदर भएकाे निर्वाचन समितिले जनाएकाे छ ।

तीन जना उपाध्यक्षमा मणिकुमार साम्पाङ १११, देवान चाम्लिङ १२०, र शिवकुमार डाँगी ११३ मत ल्याई विजयी भएका छन् ।

सचिवमा गणेश उप्रेतीले १४८ मत ल्याएर विजयी भए । उनका प्रतिद्वन्द्वी सिपी कडरियाले ८३ मत ल्याए । यस्तै, ३ जना सहसचिवमा कुमारी राई ११४, सागर किराँती ७३ र ऋषिराम ढुंगाना ९५ विजयी भएका छन् ।

काेषाध्यक्षमा ९३ मत ल्याएर रेवतराज पुरी विजयी भएका छन् । उनका निकटतम प्रतिद्वन्दी बन्दना झाँगडले ५७ मत प्राप्त गरिन् ।

९ जना पदाधिकारीका लागि भएकाे निर्वाचन प्रक्रियामा २४० जनाले मतदान गरेका थिए भने २९ जनाले उम्मेदवारी दिएका थिए । मतदान प्रक्रियामा १९ जना अनुपस्थित भएकाे निर्वाचन समितिले जनाएकाे छ ।

माओवादी केन्द्रकाे मंसिर २५ र २६ गते सम्पन्न प्रदेश अधिवेशनले २७१ सदस्यीय कार्य समिति चयन गरे पनि पदाधिकारी चयनका लागि सहमति हुन नसक्दा बुधबार निर्वाचनमा जाने कार्य समितिले निर्णय गरेकाे थियाे ।

प्रकाशित : पुस ८, २०७८ ०८:३१
पूरा पढ्नुहोस्
प्रतिक्रिया
पठाउनुहोस्
×