कञ्चनपुरमा संस्थापनकै दुई प्यानल- सुदूरपश्चिम - कान्तिपुर समाचार
कांग्रेस महाधिवेशन

कञ्चनपुरमा संस्थापनकै दुई प्यानल

कैलालीको अधिवेशन स्थगित
सक्रिय राजनीतिको तीन वर्षमा प्रदेशसभा प्रतिनिधि
भवानी भट्ट, मोहन शाही, मोहन बुडाऐर

कञ्चनपुर, डोटी, धनगढी — कञ्चनपुर कांग्रेसमा जिल्ला अधिवेशनका लागि संस्थापन पक्षकै दुई गुट भिडेका छन् । संस्थापन पक्षका केन्द्रीय सदस्यद्वय रमेश लेखक र एनपी साउदले छुट्टाछुट्टै प्यानल बनाएका हुन् । शनिबार मतदान हुने कार्यक्रम छ । जिल्ला सभापतिका लागि पदम बोगटी र बहादुरसिंह थापाले उम्मेदवारी दिएका छन् । बोगटी लेखकनिकट हुन् भने थापा साउद प्यानलका हुन् । साउदलाई अर्का नेता दिवान बिष्टले पनि साथ दिएका छन् ।

थापा यसअघि दुई कार्यकाल जिल्ला सभापति भइसकेका हुन् । उनी दोस्रो संविधानसभाका सदस्य पनि हुन् । २०७४ मा प्रदेशसभा निर्वाचनमा समेत उनी उम्मेदवार बनेका थिए । बोगटी पछिल्लो स्थानीय तहको निर्वाचनमा भीमदत्त नगरपालिकामा नगर प्रमुखका उम्मेदवार बनेका थिए । साउद र लेखकले पालिकादेखि प्रदेशसभा प्रतिनिधि र क्षेत्रीय समिति तथा महाधिवेशन प्रतिनिधिमा समेत छुट्टाछुट्टै प्यानल बनाएर प्रतिस्पर्धा गरेका थिए ।

देउवा पक्षका साउद र संस्थापन इतरका दिवान बिष्टले भने सहकार्य गर्दै आएका छन् । जसका कारण नेता लेखक कमजोर बनेका छन् । दुई नेताबीचको गुटबन्दीले जिल्लामा पुराना नेतादेखि जिल्ला सभापति र लामो समय जिल्ला समितिमा पदाधिकारी बसेकाहरूसमेत महाधिवेशन प्रतिनिधिमा पराजित भएका छन् ।

कांग्रेस डोटी जिल्ला कार्यसमिति संस्थापन पक्षकै पकडमा गएको छ । जिल्ला सभापतिदेखि सदस्यसम्मका अधिकांश पदमा संस्थापन पक्षले हात पारेको छ । १ सचिव र १ सहसचिवबाहेक सबै पदमा संस्थापन पक्ष आएका छन् । पार्टी सभापतिका लागि दोस्रो चरणको मतदानमा संस्थापनका नरेन्द्रबहादुर सिंह विजयी भएका छन् । दोस्रो चरणको मतदानमा उनले भूमिराज बडुलाई १ सय ७१ मतअन्तरले पराजित गरेका थिए । सिंहको ५ सय ६८ मत आउँदा बडुको ३ सय ९७ मत आएको थियो ।

नेपाली कांग्रेस कैलालीको जिल्ला अधिवेशन स्थगित गरिएको छ । जिल्ला कार्यसम्पादन समितिको बैठकले शुक्रबारका लागि तोकिएको जिल्ला अधिवेशन तयारी नपुगेको भन्दै स्थगित गरेको हो । जिल्ला प्रचारप्रसार समितिका संयोजक नृपबहादुर सुनारले धनगढीमै मंसिर १६ र १७ गते प्रदेशस्तरीय अधिवेशन भएकाले जिल्ला अधिवेशन गर्न समय अपुग भएको बताए । ‘१० गते अधिवेशन गरेपछि निर्वाचन परिणाम घोषणा गर्दा ३/४ दिन जान सक्छ,’ उनले भने, ‘सर्वसम्मतको अवस्था छैन । चुनाव हुने त्यो पनि दोस्रो चरणमा जाने स्थिति देखिन्छ ।’

उनले दोस्रो चरणको चुनाव भएपछि प्रदेश अधिवेशनका लागि तयारी नपुग्ने भएकाले जिल्ला अधिवेशनलाई पछाडि सार्ने निर्णय गर्नुपरेको बताए । जिल्ला सभापति नरनारायण शाहले विज्ञप्ति जारी गर्दै जिल्ला अधिवेशन अर्कौ सूचना जारी नभएसम्मका लागि स्थगित गरेको बताएका छन् ।

नेपाली कांग्रेसको १४ औं महाधिवेशनअन्तर्गत विभिन्नस्तरका अधिवेशनहरू धमाधम भइरहेका छन् । वडादेखि पालिका हुँदै प्रदेशसभा प्रतिनिधि, क्षेत्रीय समिति र महाधिवेशन प्रतिनिधिसम्मका अधिवेशनहरू सम्पन्न भइसकेका छन् । वडादेखि महाधिवेशन प्रतिनिधिसम्म पुग्दा कांग्रेसमा लामो समयदेखि राजनीति गरिरहेका र कांग्रेसमै जीवन गुजारेकाहरूसमेत पराजित भएका छन् । जिल्ला कार्यसमितिका पदाधिकारीदेखि जनप्रतिनिधिहरूसमेत पराजित भएका छन् ।

ठूलठूला हस्तीहरू पराजित भइरहँदा कञ्चनपुरकी २४ वषीया प्रेरणा पाण्डेय (टिकेश्वरी) भने प्रदेशसभा प्रतिनिधिमा खुलातर्फ सर्वाधिक मत ल्याएर विजयी भइन् । गत साता भएको प्रदेशसभा प्रतिनिधिको निर्वाचनमा खुलातर्फ कञ्चनपुरको क्षेत्र नं. २ (१) बाट कुल खसेका २ सय मतमध्ये उनले १६१ मत प्राप्त गरिन् । खुलातर्फ ५ जना प्रतिनिधिका लागि ६ जनाको उम्मेदवारी परेको थियो । उनी कांग्रेसमा संलग्न भएको ५ वर्ष भयो । सक्रिय राजनीतिमा लागेको ३ वर्ष मात्रै भएको छ । विभिन्न एफएम र टेलिभिजनमा काम गरिरहेकै बेला ग्रामीण भेगमा पुग्दा राजनीतिक दलमा लागेका बूढापाकाहरू मात्रै देखेर उनलाई कताकता उत्सुकता जाग्थ्यो । बूढापाकाहरू मात्रै राजनीतिमा लागेका कारण युवा लक्षित कार्यक्रमहरू नआउने गरेको उनको बुझाइ छ ।

प्रकाशित : मंसिर ११, २०७८ ०८:५०
प्रतिक्रिया
पठाउनुहोस्

पाका पराजित, युवा निर्वाचित

तृप्ति शाही, मेनुका ढुंगाना

बैतडी र अछाम — बैतडीमा मन्त्री–सांसद भइसकेका र पार्टीको जिल्ला नेतृत्वमा पुगिसकेकालाई पराजित गर्दै युवाहरू कांग्रेसको महाअधिवेशन प्रतिनिधि चयन भएका छन् । संस्थापन र इतर समूहको दुवै गुटबाट लडेका युवाहरूले जित हासिल गरेका छन् । जिल्लामा भ्रातृ संगठनको वर्षौं नेतृत्व गरेका महिलालाई पछ्याउँदै संस्थापनइतर समूहबाट २७ वर्षीया लक्ष्मी शाह चन्द महाधिवेशन प्रतिनिधि निर्वाचित भएकी छन् । उनी ट्रेड युनियन कांग्रेस महिला संघकी प्रदेश सहसचिव हुन् ।

यस्तै संस्थापन पक्षका नेविसंघ जिल्ला अध्यक्ष २९ वर्षीय कपिल केसी पनि महाधिवेशन प्रतिनिधिमा छनोट भएका छन् । ३२ वर्षीया पुनम पाल बम, ३४ वर्षीय तेजबहादुर चन्द, ३६ वर्षीय सुरत पार्की, तुलसी ठगुन्नालगायतका युवायुवतीहरू महाधिवेशन प्रतिनिधिमा छनोट भएका छन् । विद्यालय उमेरबाटै नेविसंघको राजनीतिमा जोडिएकी सिगास गाउँपालिकाकी लक्ष्मी अहिले जिल्लामा सबैभन्दा कम उमेरकी महाधिवेशन प्रतिनिधी हुन् । राजनीतिप्रति परिवारिक आबद्धताका कारण सानैबाट रुचि बढेको उनले बताइन् ।

पछिल्लो समय युवाहरूको राजनीतिक यात्रामा बलियो सहभागिताका साथ अगाडि बढिरहेकोमा उनले खुसी व्यक्त गरिन् । ‘यो चुनावले पुरानो भएर मात्र राजनीति सम्भव छैन भन्ने देखाएको छ,’ युवा नेता तेजबहादुरले भने । महाधिवेशन प्रतिनिधिमा पूर्वराज्यमन्त्री नरबहादुर चन्द, सचेतक रहिसकेका विनयध्वज चन्द, पूर्वजिल्ला सभापति नरेन्द्र विष्टलगायतका नेताहरू पराजित भएका छन् । यसपालि युवा पुस्ताका उम्मेदवार धेरैले जितेका छन् । डेढ दशक बढी पत्रकारितामा सक्रिय ३५ वर्षीय वेदप्रकाश तिमिल्सेना महाधिवेशन प्रतिनिधिमा विजयी भएका छन् ।

पत्रकारिता गर्दा देखिएका समस्या र कमजोरी पूरा गर्न राजनीतिक क्षेत्र उपयुक्त लागेर होमिएको उनको भनाइ छ । ‘पत्रकारिता गर्दा त विषय उठान गर्ने हो, राजनीति त्यसलाई समाधान गर्न सकिने निकाय हो,’ उनले भने, ‘पार्टीमा या जनप्रतिनिधि भएर त्यसको समाधान गर्न अघि बढ्न म राजनीति लागे ।’

प्रकाशित : मंसिर ११, २०७८ ०८:४८
पूरा पढ्नुहोस्
प्रतिक्रिया
पठाउनुहोस्
×