बेमौसमी वर्षाले कृषिमा साढे ३ अर्बको क्षति- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बेमौसमी वर्षाले कृषिमा साढे ३ अर्बको क्षति

कान्तिपुर संवाददाता

कञ्चनपुर — कञ्चनपुरमा बेमौसमी वर्षाले खेतीपातीमा साढे ३ अर्ब रुपैयाँभन्दा बढीको क्षति भएको छ । पालिकाहरूमार्फत संकलन गरिएको तथ्यांकअनुसार धानवाली, तोरी, आलु, तरकारी र केरालगायतमा ३ अर्ब ६३ करोडको क्षति भएको हो । सबैभन्दा बढी धानबालीमा क्षति भएको कृषि ज्ञान केन्द्रले जनाएको छ । जिल्लाका नौवटै स्थानीय तहमा १६ हजार ३०२ हेक्टरको धानबाली नष्ट भएको छ । जुन जिल्लामा धानखेती हुने क्षेत्रफल ४६ हजार ४९६ हेक्टरको ३३ प्रतिशतभन्दा बढी हो । यहाँ धानको उत्पादकत्व ४ मेट्रिक टन प्रति हेक्टर छ । धानखेतीमा मात्रै १ अर्ब ८२ करोडको क्षति भएको छ ।

जिल्लामा सबैभन्दा बढी शुक्लाफाँटा नगरपालिकामा ३३ सय ६८ हेक्टर, कृष्णपुर नगरपालिकामा ३ हजार हेकटर, बेदकोटमा २२ सय हेक्टरको धान नष्ट भएको ज्ञान केन्द्रले जनाएको छ । बेलौरी नगरपालिका र लालझाडी गाउँपालिकामा १८/१८ सय हेक्टर, भीमदत्त नगरपालिकामा १६ सय ७२, पुनर्वासमा १३ सय, बेलडाडी गाउँपालिकामा ९ सय र दोधारा चाँदनीमा २५० हेक्टर धान खेतीमा नोक्सान पुगेको विवरण संकलन भएको छ ।

ज्ञान केन्द्रका अनुसार ८ हजार ५९९ हेक्टरको तोरी, १४ सय ६६ हेक्टरको आलु, १२ सय १५ हेक्टरको तरकारी र ४१० हेक्टरको केराखेतीमा समेत नोक्सान पुगेको छ । ज्ञान केन्द्रका कृषि अर्थ विज्ञ नित्यानन्द जोशीका अनुसार आलुमा ६० करोड, तरकारीमा ६६ करोड, केरामा १४ करोड र तोरीमा ४१ करोड बढीको क्षति भएको छ । ‘धानको क्षतिको विवरण पालिकाहरूले घर घरै पुगेर संकलन गरेका हुन्,’ जोशीले भने, ‘तरकारीलगायत अन्यको विवरण भने अनुमानित हो ।’ उनका अनुसार पालिकाहरूबाट पूर्ण विवरण आएपछि क्षति थोरै तलमाथि हुन सक्ने देखिन्छ ।

पालिकाहरूमार्फत धानको क्षतिको विवरण संकलन भए पनि राहत तथा क्षतिपूर्तिका लागि भने तत्काल कुनै बजेट तथा योजना नआएको जोशीले बताए । ‘विवरण संकलन गरेर पठाइएको छ, राहतका लागि बजेट आएको छैन,’ उनले भने ।

कात्तिक पहिलो साता आएको अविरल वर्षाका कारण धानबालीसँंगै अन्य खेतीपातीमा ठूलो क्षति पुगेको थियो । कृषकहरूले काटेको धान खेतमै कुहिएको थियो । काटेर थुपारेको धान समेत वर्षाले कुहिएको थियो ।

महाकाली लगायत चुरे क्षेत्रबाट बग्ने खोलानालाहरूको बाढीका कारण पनि नदी किनारको धानबाली खेतमै पुरिएको थियो । ‘अब एक/डेढ हप्तामा कृषकहरूलाई राहत वितरणका लागि रकम आउनेछ,’ कृषि ज्ञान केन्द्रका प्रमुख डा. दिलबहादुर विष्टले भने, ‘कृषकको खातामै राहत तथा क्षतिपूर्ति दिने योजनामा छौं ।’ उनले जिल्ला प्रशासन कार्यालयमार्फत वा पालिकामार्फत राहत रकम वितरण गरिने बताए ।

कैलाली र कञ्चनपुरमा अधिकांश अधियाँ गरेर गुजारा चलाउनेहरू छन् । तर पालिकाहरूले तिनको विवरण नै संकलन गरेनन् । राहत वितरणका क्रममा जग्गाधनीले पाउने र वास्तविक पीडित अधियाँ गर्नेहरूले नपाउने स्थानीय बताऊँछन् । ‘जग्गाधनी र अधियाँ गर्ने दुवैले आधा आधा राहत पाउने गरी वितरण गरिनेछ,’ विष्टले भने, ‘सकभर विवरण संकलन भएको होला नभए पनि अधियाँ गर्नेलाई राहतबाट वञ्चित गरिने छैन ।’

प्रकाशित : मंसिर १०, २०७८ १०:३९
प्रतिक्रिया
पठाउनुहोस्

अछाममा सांसद र मेयर नै पराजित

मेनुका ढुंगाना

अछाम — नेपाली कांग्रेसको १४ औं महाधिवेशन अन्तरगत भइरहेको प्रतिनिधि चयनमा स्थानीय तहका जनप्रतिनिधिदेखि संघीय सांसदसम्म पराजित भएका छन् । अछाम क्षेत्र नं. २ को महाअधिवेशन प्रतिनिधिमा २२ जना संस्थापन पक्षका विजयी भएका छन् । संस्थापन इतरका ३ जना विजयी भए ।

क्षेत्र नम्बर १ मा भने खसेभन्दा बढी मत भेटिएपछि गणना स्थगित भएको छ । क्षेत्र नम्बर २ मा भने पटकपटक सांसद भएकाले नै पराजय भोग्नु परेको छ । प्रतिनिधि सभा सदस्यसमेत रहेका सांसद रामबहादुर विष्ट गोला प्रथाबाट पराजित भएका हुन् । निवर्तमान क्षेत्रीय सभापति लक्ष्मण शाह र सांसद विष्टले ३ सय ८७ मत पाएका थिए । शाह १३ औं महाधिवेशनमा पनि क्षेत्रीय सभापतिमा बराबर मत पाएपछि गोला प्रथाबाट विजयी भएका थिए । यस्तै निर्वाचन क्षेत्र नं. २ बाट महाअधिवेशन प्रतिनिधिमा पराजित हुनेहरूमा पञ्चदेवल विनायक नगरपालिकाका प्रमुख देवराज देवकोटा र ढकारी गाउँपालिकाका उपाध्यक्ष लक्ष्मी साउँद रहेका छन् ।

क्षेत्र नम्बर २ मा शेरबहादुर देउवा पक्षका दुइ टिम बनेका थिए । देउवानिकट पूर्व पार्टी सभापति पुष्पबहादुर शाहले रामचन्द्र पौडेल पक्षका सांसदसमेत रहेका रामबहादुर विष्टसंँग चुनावी तालमेल गरेका थिए । देउवा पक्षका अर्का नेता गणेशबहादुर विष्टले छुट्टै प्यानल बनाएर चुनावी मैदानमा होमिएका थिए । क्षेत्र नम्बर २ का दुई वटा प्रदेश र क्षेत्रमा पनि गठबन्धनले नै विजयी भयो । जसमा देउवा निकट शाह पक्षले ४ जना पौडेल निकटका नेतालाई महाधिवेशन प्रतिनिधि उम्मेदवार बनाएको थियो ।

अहिले जिल्लाबाट ३ जना पौडेल निकटमा महाधिवेशन प्रतिनिधिमा विजयी भए भने २२ जना देउवा पक्षका महाधिवेशन प्रतिनिधि भए ।

प्रकाशित : मंसिर १०, २०७८ १०:३४
पूरा पढ्नुहोस्
प्रतिक्रिया
पठाउनुहोस्
×