जनगणना-२०७८ : जन्ममिति र बिहेको उमेरमा अनभिज्ञता- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

जनगणना-२०७८ : जन्ममिति र बिहेको उमेरमा अनभिज्ञता

कान्तिपुर संवाददाता

कञ्चनपुर — जन्म मिति, विवाह हुँदाको उमेर र जातजाति जनगणनाका क्रममा सोधिने मुख्य प्रश्न हुन् । तर कतिपयले यसबारे भने अनभिज्ञता प्रकट गर्ने गरेका छन् । जन्म मिति सोध्दा चुनाव भएका बेला वा राजा आएका बेलालगायत उत्तर आउने गरेका छन् । विवाह भएको मितिबारे सोध्दा पनि सानैमा गरेको वा बाढी आएको वर्ष गरेको जस्ता उत्तर आउने गरेका गणकहरूको भनाइ छ । 

खासगरी ग्रामीण भेगमा निरक्षर व्यक्तिहरू मात्रै घरमा रहेको अवस्थामा यस्तो समस्या आउने गरेको छ । जसका कारण प्रश्नावली भर्न ढिलो मात्रै हुँदैन, वास्तविक मिति नै थाहा नहुने अवस्थासमेत आउँछ । ‘विवाह हुँदाको उमेरबारे सोध्दा धेरैले सानैमा भएको बताउँछन्,’ कञ्चनपुरको बेलौरी नगरपालिका–७ का गणक अनिल चौधरीले भने, ‘ठिक्क उमेर बताउन सक्ने निकै कम भेटिन्छन् ।’

उनका अनुसार कतिपयले जातजातिका विषयमा पनि बताउन सक्दैनन् । जसका कारण जनगणनाका प्रश्नावली भर्न निकै समस्या हुने गरेको छ । चौधरी बेलौरी नगरपालिका–७ कै स्थायी बासिन्दा हुन् । उनको वडामा थारू समुदायसँगै पहाडी र राना थारू समुदायको बसोबास छ । स्थानीय भएका कारण अलिअलि सबै भाषा बुझे पनि कतिपय विषयमा सबै कुरा बुझाउन समस्या हुने गरेको उनले बताए । ‘सुरुमा रानाथारू र पहाडी समुदायमा कुरा बुझाउन केही समस्या भयो,’ चौधरीले भने, ‘एक/दुई दिनपछि भने सहज हुन थाल्यो ।’ उनको गणना क्षेत्र वडा ७ को क्षेत्र ३ हो । उक्त क्षेत्रमा उनले गणना गर्नुपर्ने २ सय ११ परिवारमध्ये २/३ परिवारको मात्रै गणना गर्न बाँकी छ ।

राना थारू र डगौरा थारू समुदायमा परिवार निकै ठूलो हुन्छ । विगतमा एक/डेढ सयसम्म सदस्यहरू एउटा घरमा बसोबास गर्ने भए पनि हालका वर्षमा परिवार संख्या कम हुँदै गएको छ । चौधरीले एउटा घरमा ३० जनासम्म सदस्य भेटिएको बताए । घरमा प्रश्नावली भर्न दुई घण्टासम्म लागेको उनले बताए ।

लालझाडी गाउँपालिका–४ की गणक धनाकुमारी धानुकलाई जनगणनाबारे सम्झाउनै मुस्किल हुन्छ । जनगणनाको प्रश्नावली बोकेर घरघर पुग्दा उनलाई भोट माग्न आएको समेत भन्ने गरेका छन् । ‘भोट माग्न आएको भन्दै झर्केर बोल्ने गर्छन्,’ धानुकले भनिन्, ‘धेरैबेर सम्झाएपछि विवरण बताउन तयार हुन्छन् ।’

प्रकाशित : मंसिर ८, २०७८ १३:५७
प्रतिक्रिया
पठाउनुहोस्

काठमाडौंमा प्रकाशमान–गगन गठबन्धन हाबी, आठ निर्वाचन क्षेत्रमा जिते

कान्तिपुर संवाददाता

काठमाडौँ — काठमाडौंका १० वटै निर्वाचन क्षेत्रको परिणाम आएको छ । जिल्ला सभापति सबुज बाँनियाका अनुसार सबै क्षेत्रमा क्षेत्रीय अधिवेशन भइसकेको छ । क्षेत्रीय अधिवेशनमा पनि नेता प्रकाशमान सिंह र गगन थापा गठबन्धन हाबी भएको छ । सिंह–थापा गठबन्धनले ८ निर्वाचन क्षेत्रमा सभापति जितेको छ ।

बहुसंख्यक महाधिवेशन प्रतिनिधिहरू पनि आफूहरूको समूहकै भएको सिंहनिकट एक नेताले बताए ।

काठमाडौं क्षेत्र नम्बर २ मा सभापति शेरबहादुर देउवानिकट कविर शर्मा निर्वाचित भएका छन् भने क्षेत्र नम्बर ६ मा नेता कृष्णप्रसाद सिटौला पक्षका श्याम खड्गी दोस्रोपटक निर्वाचित भएका छन् । यसबाहेक आठवटै क्षेत्रमा सिंह–थापा गठबन्धन विजयी भएको ती नेताले बताए ।

काठमाडौं क्षेत्र नम्बर १ को क्षेत्रीय सभापतिमा सिंह–थापा गठबन्धनका उम्मेदवार रविन्द्रविक्रम राणा सर्वसम्मत निर्वाचित भएका छन् । त्यस्तै, थापाको आफ्नै क्षेत्र काठमाडौं क्षेत्र नम्बर ४ मा पनि सर्वसम्मत नेतृत्व चयन भएको छ । क्षेत्रीय सभापतिमा श्यामकृष्ण संगत सर्वसम्मत निर्वाचित भएका छन् ।

क्षेत्र नम्बर ३ मा सन्तोष चालिसे क्षेत्रीय सभापति बनेका छन् । उनी गोकणेश्वर नगरपालिकाका मेयर हुन् । क्षेत्र नम्बर ५ मा श्याम खड्का, क्षेत्र नम्बर ७ मा मुकुन्द रिजाल, क्षेत्र नम्बर ८ मा राजेशकुमार श्रेष्ठ, क्षेत्र नम्बर ९ मा जयकृष्ण महर्जन र १० मा पुकार श्रेष्ठ निर्वाचित भएका छन् ।

प्रकाशित : मंसिर ८, २०७८ १३:५६
पूरा पढ्नुहोस्
प्रतिक्रिया
पठाउनुहोस्
×