१७.१२°C काठमाडौं
काठमाडौंमा वायुको गुणस्तर: १५७

फेरि बढ्यो कोरोना, खोप लगाएकामै संक्रमण

नाकामा भारतबाट घर फर्किनेहरुले समेत मास्कको प्रयोग गरेको देखिँदैन
भवानी भट्ट

कञ्चनपुर — कञ्चनपुरको बेलडाँडी गाउँपालिकाकी ७० वर्षीया एक महिलालाई गत साता महाकाली प्रादेशिक अस्पताल भर्ना गरियो । निमोनियाले ग्रस्त उनलाई एन्टिजेन परीक्षण गर्दा संक्रमण पुष्टि भयो । अस्पताल भर्ना भएको तेस्रो दिन उनको उपचारकै क्रममा मृत्यु भयो । महाकाली प्रादेशिक अस्पतालमा उपचारका क्रममा संक्रमितको लामो समयपछि मृत्यु भएको हो । अघिल्लो साता कञ्चनपुरकै एक पुरुषको कैलालीको धनगढीस्थित सेती प्रादेशिक अस्पतालमा उपचारका क्रममा मृत्यु भएको थियो ।

फेरि बढ्यो कोरोना, खोप लगाएकामै संक्रमण

स्वास्थ्य मापदण्ड पालनामा देखिएको लापरवाही र परीक्षणको दायरा घटाएसँगै संक्रमण फेरि बढ्न थालेको छ । अहिले पनि जिल्लामा दैनिक १०/१५ जनामा संक्रमण पुष्टि भइरहेको छ । जसमध्ये अधिकांश ज्येष्ठ नागरिक र दीर्घरोगीहरू छन् । ‘कोरोना संक्रमण फेरि बढ्न थालेको छ, लापरबाही बढेको छ, परीक्षण घटेको छ,’ महाकाली प्रादेशिक अस्पतालका कोरोना फोकल पर्सन डा. गोविन्द रोकायाले भने, ‘समुदायमा कोरोना संक्रमण दर बढेजस्तो देखिन्छ ।’ उनका अनुसार दैनिक ५/६ जना संक्रमितहरू अस्पताल आउने गरेका छन् । तर उनीहरू होम आइसोलेसनमै बसिरहेका छन् ।

अहिले संक्रमित देखिनेमध्ये अधिकांश दुवै डोज खोप लगाएकाहरू छन् । ५०/५५ वर्षभन्दा माथिको उमेरकाहरूमा बढी संक्रमण देखिएको डा. रोकायाले बताए । उक्त उमेर समूहकालाई साउन भदौमै कोरोनाविरुद्धको खोप लगाइसकिएको छ ।

जिल्ला स्वास्थ्य कार्यालयका अनुसार हालसम्म १ लाख १४ हजार ६ सय ६८ जनालाई पहिलो मात्रा र १ लाख ३४ हजार ६ सय ६३ लाई दोस्रो मात्रा खोप लगाइसकिएको छ । हालसम्म ४५ वर्षभन्दा माथिको उमेरसमूह, सुरक्षाकर्मी, जनप्रतिनिधि, स्वास्थ्यकर्मी, सञ्चारकर्मी, सुदूरपश्चिम विश्वविद्यालयका विद्यार्थीलगायतलाई कोरोनाविरुद्धको खोप लगाइसकिएको छ । ‘अहिले लक्षणसहितका संक्रमित बढी देखिन थालेका छन्,’ जिल्ला स्वास्थ्य कार्यालय कञ्चनपुरका जनस्वास्थ्य निरीक्षक सिद्धराज भट्टले भने, ‘खोप लगाएका र नलगाएका सबैमा संक्रमण देखिएको छ ।’ माथिल्लो उमेरसमूह संक्रमित देखिएकाले खोप लगाएकाहरू नै बढी रहेको उनले बताए ।

दसैं र तिहारलगायतका चाडपर्वका बेला बजारमा किनमेल गर्नेदेखि यात्रा गर्नेलाई मास्क तथा सेनिटाइजरगायतको प्रयोग गरेको देखिएन । नाकामा भारतबाट घर फर्किनेहरूले समेत मास्कको प्रयोग गरेको देखिँदैन । स्वास्थ्य सुरक्षाको मापदण्ड पालनामा भइरहेको लापरबाहीले संक्रमण बढ्न सक्ने स्वास्थ्यकर्मीहरू बताउँछन् ।

पछिल्लो समय राजनीतिक दलका वडादेखि गाउँ, नगर र जिल्लास्तरका कार्यक्रमहरूमा समेत भीडभाड बढेको छ । यसले समेत संक्रमण बढाउने जोखिम बढेको छ । मंसिरमा विवाह व्रतबन्धलगायतका गतिविधिहरूसमेत सुरु हुनेछन् । सावधानी अपनाउन नसके संक्रमणको जोखिम झन् बढ्न सक्ने स्वास्थ्यकर्मीहरू बताउँछन् । ‘भित्रभित्रै संक्रमण धेरै बढिसकेको छ, तर परीक्षण नहुँदा कम देखिएको छ,’ कोरोना फोकल पर्सन डा. रोकायाले भने, ‘अहिले एन्टिजेनसमेत सीमित भएकाले लक्षण देखिएकाहरूको मात्रै परीक्षण भइरहेको छ ।’ उनका अनुसार महाकाली अस्पतालमा आउनेमध्ये लामो समयदेखि खोकी लागेका र निमोनिया देखिएकाको मात्रै एन्टिजेन परीक्षण भइरहेको छ । पीसीआर परीक्षण गर्नेको संख्या पनि निकै कम छ ।

कञ्चनपुरमा हालसम्म कोरोना संक्रमणबाट २ सय ३ जनाको मृत्यु भइसकेको छ । जसमध्ये पहिलो लहरमा १६ जनाको मात्रै मृत्यु भएको थियो । वैशाखयता मात्रै १ सय ८७ जनाको मृत्यु भएको हो । अहिले जिल्लामा सक्रिय संक्रमितको संख्या ४६ छ । अस्पतालमा कोरोनासंँग लक्षण मिल्ने खालका बिरामीहरू पनि बढ्न थालेका छन् । केही समयअघि बालबालिकाहरूमा उच्च ज्वरो, खोकी र निमोनियाको संक्रमण देखिएको थियो । पछिल्लो समय ज्येष्ठ नागरिक र युवायुवतीहरूमा पनि उच्च ज्वरो र खोकीसँगै झाडापखालाका लक्षणहरू देखिन थालेका छन् । यसका साथै डेंगु, स्क्रब टाइफस, टाइफाइड र निमोनियाका बिरामीहरू समेत बढ्न थालेको डा. रोकायाले बताए ।

प्रकाशित : कार्तिक २८, २०७८ १२:४९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?