बैतडीका भगवती मन्दिरमा नवरात्रीको पूजा सम्पन्न
बैतडी — कोरोना संक्रमण दर कम हुँदै गएपछि सुदूर नेपालका पहाडी जिल्लाका शक्तिपीठहरुमा घटस्थापनादेखि नै ठूलो घुइँचो लागेको थियो ।
बैतडीका धार्मिक स्थलहरुमा नवरात्रीभर दर्शनार्थीको भीड लागेको थियो । जिल्ला बाहिर रहेका यहाँका स्थानीयहरु दसैं मनाउन आफ्नो थातथलो फर्केका छन् । भारतको उत्तराखण्ड प्रदेशका विभिन्न स्थानबाट पूजाका लागि दर्शनार्थीहरु बैतडीका शक्तिपीठ पुगेका थिए । यतिबेला यहाँका भगवतीका मन्दिरहरुमा पूजाआजा भइरहेको छ । मन्दिरहरुलाई विशेष रुपमा सजावट गरिएको छ ।
खासगरी दसैंको नवरात्रीका अवसरमा बैतडीवासी घटस्थापनादेखि नै विभिन्न शक्तिपीठमा बसेका थिए । यहाँ शक्तिपीठहरुमा वर्षको चार पटक भन्दा बढी विशेष पूजाआजा हुने गरेको छ । यहाँ भगवतीका मन्दिरमा दसैंको समयमा र वार्ष मेला जात्राका बखत विशेष पूजा हुने गर्छ ।
जिल्लाका त्रिपुरासुन्दरी, निङलाशैनी, डिलाशैनी, मेलौली, कफलाशैनी, फाल्ङासैनीलगायतका भगवती मन्दिरहरुमा सामूहिक रुपमा जमरा राखेर घट्स्थापनाको दिनबाटै पूजाआजा सुरु भएको हो । यस्तै, महारुद्र, उदयदेव, सिगास, दोगडाकेदारलगायतका मन्दिरहरुमा पनि सामूहिक रुपमा नवरात्रीभरि पूजा भएको थियो । कूल देवतालाई पूज्नको लागि जिल्ला बाहिर रहेकाहरु पनि यो बेला पुख्यौली घर फर्किने गरेका दशरथचन्द नगरपालिका—४ का गणेश भण्डारीले बताए । उनका अनुसार जिल्लाका भगवतीका मन्दिरहरुमा घटस्थापनादेखिनै दर्शनार्थीको घुइँचो लाग्ने गरेको थियो । दसैंको अवसरमा नवरात्री उपासना गरेर पूजाआजा गर्ने चलन रही आएको छ । शक्तिपीठहरुमा पूजाआजा गरेमा मनोकामना पूर्ण हुने जनविश्वास रहेको उनले बताए ।
बैतडीको प्रसिद्ध निङलाशैनी भगवती मन्दिरमा मंगलबारदेखि जात्रा पनि सुरू भएको थियो । महासप्तमीका दिन सुरू भएको जात्रा महाष्टमीका दिन बलिसहित सम्पन्न भयो । महाष्टमीका दिन निङलाशैनी भगवतीको विशेष पूजाआजा सम्पन्न भएको निङलाशैनी भगवती धार्मिक सेवा समितिका अध्यक्ष मानबहादुर बोहराले बताए । अष्टमीमा निङलाशैनी भगवती मन्दिरमो भाकल गरेकाहरुले बोका र रांगाको बलि दिने धार्मिक परम्परा रहेको छ ।
