बाढीपहिरोले जनजीवन प्रभावित- सुदूरपश्चिम - कान्तिपुर समाचार

बाढीपहिरोले जनजीवन प्रभावित

मनोज बडू

दार्चुला — भदौ १३ गतेको भारी वर्षाका कारण प्रभावित क्षेत्रको जनजीवन अझै सहज हुन सकेको छैन । अपि हिमाल गाउँपालिका–६ का चौकबगर र सल्ला बस्ती बाढी र पहिरोले आसपासका बस्तीसँग सम्पर्कविहीन हुन पुगेको छ । बाढीले चौकबगर खोलाको झोलुंगे पुल बगाउँदा ती बस्तीमा आउजाउमा समस्या भएको हो । 

अपि हिमाल गाउँपालिका–६ को रिगुर खोलामा आएको बाढीले ककनाडी र चौकी बगरको पुल बगाएको स्थानीय डब्बलसिंह धामीले बताए । बाढीले यहाँका फुटपैरा, चौकबगर, ककनाडी, सल्ला बस्ती जोखिममा छन् । चौकबगर र सल्ला बस्तीका स्थानीयको दुईवटै ठाउँमा खेतबारी र बसाइ रहेकाले आवतजावत गर्ने बाटो बन्द छ ।

धामीका अनुसार सल्ला बसाइ रहेकाले बढीजसो कमाइ खाने खेत चौकबगरमा छ । बाढीले पुल बगाउँदा खेतीबारीको रेखदेख गर्न जानलाई ठूलो पहाड चढेर जानुपर्ने बाध्यता छ । पुल हुँदा चौकबगर र सल्ला बस्ती आवतजावतमा १० मिनेट लाग्थ्यो भने अहिले आफ्नै खेतबारीमा जान तीन घण्टा लाग्ने गरेको उनको भनाइ छ ।

बाढीले चौकबगरमा ३५ परिवारको खेत खोलाको बाढीले क्षति गरेको छ । बचेको जमिनमा खेती हेर्न पनि तीन घण्टा बढी लगाएर जानुपरेको स्थानीय राजेन्द्रसिंह धामीले बताए । एक बस्तीबाट अर्को बस्तीमा जान अहिले मार्मा गाउँपालिका–१ को हार्ड डाँडा कटाएर जानुपर्छ । दुईवटा झोलुंगे पुल बगाउँदा गाउँबाट बाहिर जान सकिने अवस्था नरहेको उनले बताए ।

प्रकाशित : आश्विन ९, २०७८ १२:३५
प्रतिक्रिया
पठाउनुहोस्

गण्डकी प्रदेशको आर्थिक वृद्धिदर लक्ष्यभन्दा कम

घट्नुको मुख्य कारण कोभिड, कृषि क्षेत्रले भने पार गर्‍यो लक्ष्य
कान्तिपुर संवाददाता

पोखरा — गण्डकीको आर्थिक वृद्धिदर २०७७/७८ मा ७.१ पुर्‍याउने लक्ष्य लिएपनि घटेर ३.५८ प्रतिशतमा पुगेको छ ।  ‘समृद्ध प्रदेश, सुखी नागरिक’ को नारासहित प्रदेश सरकारले २०७५/७६ लाई आधार वर्ष मानी प्रथम पञ्चवर्षीय योजना तय गरेको थियो । २०८०/८१ मा राष्ट्रिय लक्ष्य ९.६ रहँदा प्रदेशले महत्त्वाकांक्षी १०.२ को लक्ष्य राखेको थियो । गण्डकी सरकारले २१०० सालसम्म ११.० प्रतिशत पुर्‍याउने लक्ष्य लिएको छ । 

आयोगका सदस्यसचिव रामप्रसाद आचार्यले आर्थिक वृद्धिदर घट्नुको मुख्य कारण कोभिड रहेको जनाए । ‘कोभिडले ठूलो असर पार्‍यो,’ उनले भने, ‘आर्थिक गतिविधि सबै ठप्प छन् । उद्योग, व्यवसाय सञ्चालन हुन नसकेको अवस्था छ ।’

उनले उद्योग व्यवसायमा प्रवर्द्धन गर्न र लगानीमैत्री वातावरणको सिर्जना गर्नुपर्नेमा जोड दिए । सरकारी वित्तअन्तर्गत सरकारले कुल गार्हस्थ्य उत्पादनमा ११.५ प्रतिशत पुर्‍याउने लक्ष्य लिएको भए पनि गत आवसम्म जम्मा ९.२ प्रतिशत पुगेको छ । सरकारले बजेट खर्चमा पनि लक्ष्य भेटाउन सकेको छैन भने संघीय सरकारबाट प्राप्त अनुदान वितरणमा पनि लक्ष्य भेटाउन गाह्रो देखिन्छ । उद्योग, वाणिज्यतर्फ पनि कुल गार्हस्थ्य लक्ष्यमा पुग्न नसकेको आयोगको तथ्यांकले जनाएको छ ।

सरकारले कृषिमा २६ प्रतिशतको लक्ष्य राखे पनि २८.२ प्रतिशत हासिल गरेको छ । ५ वर्षसम्म सरकारले २३.७ प्रतिशत पुर्‍याउने लक्ष्य लिएको थियो । गैरकृषिमा ७४ प्रतिशत लक्ष्य रहेकोमा ७१.८ प्रतिशत मात्रै हासिल भएको छ । आचार्यले कृषि क्षेत्रमा लिइएको ५ वर्षको लक्ष्य गत आवमा नै पूरा भएको बताए । उनले भने, ‘कृषि क्षेत्रमा प्रदेश सरकारको लगानी धेरै छ । कृषिमा अनुदान, प्रविधि (यन्त्र) पनि भित्रिए ।’

अर्थ मन्त्रालयका सचिव वैकुण्ठ अर्यालले पञ्चवर्षीय योजनाका लक्ष्यमा केही सुधार गर्नुपर्ने बताए । ‘लक्ष्य निर्माण गर्दा कुन तथ्यांकलाई टेकेर निर्माण गरियो ?’ उनले प्रश्न गरे, ‘सर्वेका कुरामा धेरै ग्याप छ । सर्वे र फाइल हेर्दा तथ्यांक एउटै हुँदैन । केन्द्रीय तथ्यांकका आधारमा प्रदेशको मात्र तथ्यांक छुट्याउन त झन् गाह्रो छ ।’

प्रकाशित : आश्विन ९, २०७८ १२:३३
पूरा पढ्नुहोस्
प्रतिक्रिया
पठाउनुहोस्
×