विद्यालय खुले, पुस्तक पुगेन- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

विद्यालय खुले, पुस्तक पुगेन

भवानी भट्ट

कञ्चनपुर — कोरोना संक्रमणका कारण लामो समयदेखि बन्द रहेका विद्यालय खुल्न थालेका छन् । भौतिक उपस्थितिमै नियमित पठनपाठन सुचारु भए पनि विद्यार्थीहरूले पाठ्यपुस्तक भने पाउन सकेका छैनन् । कञ्चनपुरमा भदौ तेस्रो सातादेखि नै पठनपाठन सुचारु भएको हो । 

स्थानीय तहहरूले स्वास्थ्य सुरक्षाको मापदण्ड र शिक्षा मन्त्रालयको विद्यालय सञ्चालन कार्यविधि पालना गरेर भौतिक रूपमा कक्षा सञ्चालन गर्न सकिने निर्णय गरेपछि यहाँका विद्यालयहरू सुचारु भएका हुन् । ‘स्कुल खुले, पढाइ पनि सुचारु भयो तर विद्यार्थीले पाठ्यपुस्तक पाउन सकेका छैनन्,’ नेहा पुस्तक भण्डारका शंकरदत्त भट्टले भने, ‘विद्यार्थीहरू दिनहुँ पुस्तक खोज्दै आइरहेका छन् ।’ उनका अनुसार कक्षा १० को अर्थशास्त्र, ८ र ९ को अनिवार्य विषय र अन्य ऐच्छिक विषयका पुस्तकको अभाव छ ।

ढिलो गरी विद्यालय खुल्नु र विद्यार्थीको यकिन तथ्यांक उपलब्ध नभएका कारण पाठ्यपुस्तक अभाव भएको हुन सक्ने शिक्षा विकास तथा समन्वय इकाइ कार्यालय कञ्चनपुरका शाखा अधिकृत राजेन्द्र भट्टले बताए । उनका अनुसार गत वर्ष भर्ना भएका सबै विद्यार्थी अझै भर्ना भएका छैनन् । ‘विद्यालयले माघ, फागुनमै उपलब्ध गराउने तथ्यांकका आधारमा पाठ्यपुस्तक आउने हो,’ उनले भने, ‘गत वर्षदेखि यो प्रक्रिया सबै रोकिएको छ ।’ प्रावि तहको पाठ्यपुस्तक निजी छापाखानामा छापिन्छ । सरकारले १ देखि १० कक्षासम्मका पाठ्यपुस्तक निःशुल्क उपलब्ध गराउँछ । कक्षा ६ देखि १० सम्मका पुस्तक जनक शिक्षा सामग्री केन्द्रले छाप्ने गरेको छ । समयमै पुस्तक नछापिने गरेका कारणसमेत अभाव हुने गरेको छ ।

‘तल्लो कक्षाको पाठ्यक्रम फेरिने भएकाले एकमुष्ट ठूलो परिमाणमा पाठ्यपुस्तक छाप्न सकिँदैन,’ जनक शिक्षा सामग्री केन्द्र धनगढीका क्षेत्रीय प्रमुख ध्रुव पन्तले भने, ‘अन्य कक्षाका पुस्तकहरू पनि छपाइमै ढिलो हुने गरेको छ ।’ उनका अनुसार कक्षा ४, ७, ८, ९ र १० मा ३/३ हजार थान पुस्तकको अभाव छ । उनले त्यहीअनुसार माग गरिएको बताए । कक्षा ११ र १२ को सामाजिक विषयको पुस्तक पनि अभाव छ । उक्त कक्षाका पनि १ हजार थान पुस्तक माग गरिएको पन्तले बताए ।


प्रकाशित : आश्विन ६, २०७८ १०:५७
प्रतिक्रिया
पठाउनुहोस्

पर्वतका विद्यालय खुले

कान्तिपुर संवाददाता

पर्वत — करिब ५ महिनापछि जिल्लाका सबैजसो सामुदायिक तथा निजी विद्यालय खुलेका छन् । गत वैशाख १० देखि बन्द विद्यालय स्थानीय प्रशासन र सम्बन्धित पालिकाले अनुमति दिएसँगै सोमबारदेखि खुलेका हुन् । जिल्लास्तरीय कोभिड–१९ संकट व्यवस्थापन केन्द्रले संक्रमण कम स्थानका पालिकाले विद्यालय खोल्न सक्ने निर्णय गरेको थियो ।


जिल्लामा अहिले दैनिक कोरोना संक्रमित थपिने क्रम न्यून भएको भन्दै सबै पालिकाले विद्यालय खोल्ने निर्णय गरेका हुन् । ‘हाम्रोमा खासै संक्रमण थिएन,’ बिहादी गाउँपालिकाका अध्यक्ष कमलप्रसाद भुसालले भने, ‘सदरमुकाम आसपासमा संक्रमण भएपछि जिल्लाभरिका विद्यालय बन्द हुनु हुन्थेन । अहिलेको निर्णय ठीक छ ।’ जिल्लाको कुनै एउटा क्षेत्रमा संक्रमण फैलिँदा अर्को गाउँका विद्यालय बन्द हुनु उचित नभएको सरोकारवालाको टिप्पणी छ । यही गुनासो आएका कारण केन्द्रले आगामी दिनमा प्रभावित सार्वजनिक क्षेत्र बन्द गर्ने निर्णय गरेको हो ।

निजी तथा सामुदायिक विद्यालय ५ महिनासम्म बन्द हुँदा विद्यार्थीको पठनपाठनमा गम्भीर असर पुगेको भन्दै अभिभावकले विद्यालय र सम्बन्धित निकायमा गुनासो गर्न थालेका थिए । लामो समय विद्यालय बन्द हुँदा शैक्षिक प्रणाली नै भत्किन थालेको शिक्षकहरूले समेत चिन्ता व्यक्त गर्दै आएका थिए । कतिपय विद्यालयले भौतिक रूपमा विद्यार्थी बोलाएर पढाउन सुरु गर्न अझै केही समय लाग्ने बताएका छन् ।

जिल्लाका अधिकांश विद्यालयले भौतिक दूरी कायम गरेर विद्यार्थीलाई जोरबिजोर प्रणाली अनुसार पठनपाठन सुरु गरेका हुन् । थोरै विद्यार्थी भएका विद्यालयले भने सबैलाई कक्षाकोठामै राखेर पढाउन थालेको बताएका छन् । लामो समय बन्द विद्यालयमा भौतिक रूपमै उपस्थित भएर पठनपाठन गराउँदा शिक्षक र विद्यार्थीले भने असहज महसुस गरेको सुनाए । धेरै विद्यार्थी हुने केही विद्यालय भने दसैंसम्मको अवस्था हेरेपछि मात्रै भौतिक रूपमा सञ्चालन गर्ने तयारीमा छन् । केही विद्यालयले अनलाइन र भौतिक दुवै पद्धतिबाट पठनपाठन गरिरहेका छन् ।

करिब १२ सय विद्यार्थी भएको कुश्मास्थित नारायण माविले ३ सत्रमा पढाइरहेको छ । ‘अनलाइनको पहुँच हुनेले बिहान पढ्छन्,’ शिक्षक सञ्जय रेग्मीले भने, ‘नहुनेलाई जोरबिजोर गरी दिउँसो र बेलुका पढाइएको छ ।’

प्रकाशित : आश्विन ६, २०७८ १०:५६
पूरा पढ्नुहोस्
प्रतिक्रिया
पठाउनुहोस्
×