सरकारी जग्गा लिज प्रकरणमा बयान- सुदूरपश्चिम - कान्तिपुर समाचार

सरकारी जग्गा लिज प्रकरणमा बयान

कान्तिपुर संवाददाता

कञ्चनपुर — तत्कालीन महेन्द्रनगर नगर विकास समितिको जग्गा लिज प्रकरणमा राजनीतिक दलका नेतादेखि पत्रकारसम्म संलग्न रहेको पाइएको छ । अख्तियार दुरुपयोग अनुसन्धान आयोगको टोलीले गरिरहेको अनुसन्धानका क्रममा पत्रकारदेखि नेतासम्म लिज प्रकणमा मुछिएको पाइएको हो ।

आयोगको अनुसन्धान टोलीले अहिले जमिन लिज तथा भाडामा लिने तिनै पत्रकार र राजनीतिक दलका नेतालगायतको बयान लिइरहेको छ । हालसम्म एक सय बढीको बयान लिने काम भएको आयोगले जनाएको छ ।

अहिले जग्गा लिज तथा भाडामा लिनेहरूको बयान लिने काम भइरहेको हो । त्यसपछि समितिका तत्कालीन पदाधिकारीहरूको बयान लिइने आयोगले जनाएको छ । ‘लिजमा लिने व्यक्तिहरूलाई सम्पर्कमा ल्याउन समस्या भइरहेको छ, उहाँहरू कतिपय बाहिर गएका पनि छन्,’ अनुसन्धान टोली संयोजक आयोगका उपसचिव ओमप्रकाश बरालले भने, ‘अझै केही समय बयान लिनमै जान्छ ।’ जग्गा लिज तथा भाडामा लिने र खरिद–बिक्री गर्नेहरूमध्ये अझै एक सय बढीको बयान लिन बाँकी छ । केही पत्रकार र जिल्लास्तरीय राजनीतिक दलका नेताहरूको बयान लिइएको स्रोतले जनाएको छ ।

नगर विकासको जग्गा लिज तथा भाडामा लिने र खरिद बिक्रिमा व्यापक अनियमितता भएको भन्दै आयोगमा उजुरीहरू परेपछि उपसचिव बरालको संयोजकत्वमा ५ सदस्यीय अनुसन्धान टोली गठन गरिएको हो । टोलीले भदौ तेस्रो सातादेखि महेन्द्रनगर पुगेर अनुसन्धानको काम सुरु गरेको छ । ‘हामी जति सक्दो चाँडो अनुसन्धानलाई निश्कर्षमा पुर्‍याउने प्रयत्नमा छौं,’ बरालले भने, ‘त्यहि अनुसार काम गरिरहेका छौं ।’ नगर विकास समितिको कार्यालयबाट लिज, भाडा र खरिद बिक्रिका सबै कागजातहरूको समेत अध्ययन भइरहेको छ ।

स्थानीय तहको निर्वाचन अघिको एक दशक अवधिमा नगर विकास समितिको जमिन लिज तथा भाडामा दिने प्रक्रिया व्यापक चलेको थियो । समितिका अध्यक्षहरूले हिँड्दाहिँड्दै बाटोमा समेत जग्गा लिजमा दिएका थिए । यसबारे समितिमा कुनै निर्णय गरिएको छैन । १ सय ४४ जनालाई लिज तथा भाडामा र करिब ५० जनालाई जमिन बिक्री गरिएको छ । २०३५ मा स्थापना भएको नगर विकास समितिलाई त्यतिबेला ६३८ बिघा जमिन उपलब्ध गराइएको थियो । उक्त जमिन सबै लिज तथा भाडामा र बिक्री गरी हाल ६० बिघा मात्रै बाँकी छ । महेन्द्रनगर बजारको मुटु मानिने सब्जीमण्डी क्षेत्रमा अहिले पनि भौतिक संरचनाहरू आधा निर्माण गरिएको अवस्थामा छन् ।

२०७५ मा यहाँका विद्यार्थी संगठन र युवा संगठनको आन्दोलनपछि उक्त क्षेत्रमा निर्माण कार्य स्थगित भएको थियो । सोही वर्ष सरकारले नगर विकास समिति खारेज गरेर यसको जिम्मा संघीय आयोजना कार्यान्वयन इकाई धनगढीलाई दिइएको थियो । गत वर्षदेखि नगर विकास समिति भीमदत्त नगरपालिकाअन्तर्गत आएको छ । ‘लिज तथा भाडामा लिने दिने र खरिद–बिक्रीमा संलग्न सबैको बयान लिइनेछ,’ अख्तियार महेन्द्रनगर कार्यालयका सूचना अधिकारी हरिशचन्द्र जोशीले भने, ‘पदाधिकारीहरूलाई पनि पत्र काट्ने काम भएको छ ।’

प्रकाशित : आश्विन ४, २०७८ ०९:५५
प्रतिक्रिया
पठाउनुहोस्

गोरखामा फैलँदै स्क्रब टाइफस

हरिराम उप्रेती

गोरखा — कोरोना संक्रमण केही मत्थर हुँदै जाँदा यहाँ भने स्क्रब टाइफस संक्रमित बढेका छन् । ज्वरो र टाउको दुख्ने लक्षण देखिएपछि जाँच गराउँदा आरुघाट गाउँपालिकामा पछिल्लो समय स्क्रब टाइफसका संक्रमित बढेका हुन् । दुई महिनायता २५ जनामा स्क्रब टाइफस संक्रमण देखिएको आरुघाट गाउँपालिकाका स्वास्थ्य शाखा प्रमुख विजय श्रेष्ठले बताए । 

‘कोभिड पनि छैन, कोभिडका जस्तै लक्षण छन्,’ उनले भने, ‘ज्वरो कन्ट्रोल नभएपछि ल्याबमा परीक्षण गराउँदा स्क्रब टाइफसको संक्रमण देखा पर्‍यो ।’ साउन पहिलो सातादेखि भदौ ३० सम्म २५ जनामा स्क्रब टाइफसको लक्षण देखिएको उनले बताए । एक वर्ष अघिदेखि आरुघाटस्थित आरुचनौटे प्राथमिक स्वास्थ्य केन्द्रमा स्क्रब टाइफस जाँच हुँदै आएको थियो । मुसामा हुने किर्ना र उपियाँका टोकाइले रिकेडिसिया प्रजातिको कीटाणु मानिसमा सरेपछि स्क्रब टाइफसको संक्रमण देखिने आरुचनौटे प्राथमिक स्वास्थ्य केन्द्रका डाक्टर कृष्णहरि श्रेष्ठले बताए ।

‘पहिले–पहिले पनि फाट्टफुट्ट देखिन्थे, महिनामा १–२ वटा केसलाई सामान्य लिन्थ्यौं,’ श्रेष्ठले भने, ‘साउनयता स्क्रब टाइफस संक्रमण देखिने बढे, तीजताका ह्वात्तै बढ्यो । त्यो बेला एकै समयमा १०–१२ जना संक्रमित भएकामा अहिले घटे पनि संक्रमित हिजो–अस्तिसम्म उपचाररत हुनुहुन्थ्यो ।’ प्राथमिक स्वास्थ्य केन्द्रमा उपचाररत दुई जनाको स्वास्थ्य अवस्था सुधार नआएपछि रेफरसमेत गरिएको उनले बताए । संक्रमण नियन्त्रण उन्मुख रहे पनि जोखिम नघटेको उनले बताए । परीक्षणको दायरा बढाउन दुई बक्स किट मगाएको केन्द्रले जनाएको छ ।

‘समयमै केस पहिचान नभई संक्रमण विस्तार हुँदै गए मानिसको मृत्युसम्म हुन्छ,’ उनले भने, ‘हाम्रोमा सबैको स्वास्थ्य सुधारोन्मुख छ ।’ स्क्रब टाइफसको संक्रमण देखिएका बिरामीको १०४ डिग्रीसम्म ज्वरो देखिएको उनले बताए । गाउँपालिकामा स्क्रब टाइफसका बिरामी बढेपछि स्वास्थ्य कार्यालय गोरखा र प्रदेश स्वास्थ्य निर्देशनालयमा पनि जानकारी गराएको श्रेष्ठले बताए । यसअघि फाट्टफुट्ट देखिने स्क्रब टाइफस आरुघाट गाउँपालिकामा बढेको स्वास्थ्य कार्यालय गोरखाकी प्रमुख विद्या तामाङले बताइन् ।

११ गाउँपालिकामध्ये आरुघाटबाहेक अन्य स्थानीय तहमा स्क्रब टाइफसको समस्या नदेखिएको उनले बताइन् । ‘आरुघाटबाट स्क्रब टाइफसका बिरामी भेटिए भनेर रिपोर्टिङ भइरहेको छ, अहिलेसम्म प्राथमिक स्वास्थ्य केन्द्रमै उपचार पनि भएका छन्, जटिल समस्या आएको छैन,’ उनले भने, ‘हामीले पनि निरन्तर फलोअप गरिरहेका छौं । पालिकाले किटको व्यवस्थापन गरेको छ । अपुग भए किटको व्यवस्थापन पनि गर्छौं ।’

कोभिड–१९ जस्तै स्क्रब टाइफस संक्रमितलाई उच्च ज्वरो आउने, खोकी लाग्ने, बान्ता, पेट दुखाइ, सास फेर्न गाह्रो हुने, मांसपेशी दुख्ने लक्षण पनि देखिन्छन् । तर प्राथमिक स्वास्थ्य केन्द्रमा आएकामध्ये अधिकांश टाउको दुख्ने र उच्च ज्वरो भएकाहरू रहेको श्रेष्ठले बताए । बेलैमा पहिचान गरेर उपचारपश्चात् औषधि सेवन गरे संक्रमित निको हुने चिकित्सक बताउँछन् ।

प्रकाशित : आश्विन ४, २०७८ ०९:४७
पूरा पढ्नुहोस्
प्रतिक्रिया
पठाउनुहोस्
×