तंग्रिँदै टीकापुरमा व्यवसाय- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

तंग्रिँदै टीकापुरमा व्यवसाय

‘अब फेरि लकडाउन भएन भने व्यापार व्यवसाय सञ्चालनमा कठिनाइ नहोला’
गणेश चौधरी

टीकापुर — टीकापुरका दलबहादुर चौधरी ठेलामा सामान ओसार पसारको काम गर्छन् । कोरोनाको दोस्रो लहरका कारण गत वैशाख १७ गतेदेखि निषेधाज्ञा जारी भएपछि उनको रोजगारी बन्द जस्तै भयो । पसल बन्द भएपछि उनले सामान ओसारपसारको काम पाउने कुरै भएन । घरमा ठेला थन्किएपछि के खाने भन्ने समस्या आउने भयो । 

जोगाएको पैसाले कति दिन पेट पालिएला भन्ने सोचेर उनले १० कट्ठा जग्गा भाडामा धान खेती गरे । लकडाउनभरि ठेलाको काम नभएपछि उनले धान खेतीमा ध्यान दिए । अहिले उनले लगाएको धान खेती तयार हुने अवस्थामा छ । उनी भन्छन्, ‘जग्गा भाडामा लिएर खेती नगरेको भए जोगाएको पैसा पनि सकिन्थ्यो । ४/५ महिना बेरोजगार बस्नुपर्ने हुन्थ्यो । समयमा बुद्धि पुर्‍याएर राम्रै भयो ।’ निषेधाज्ञा हटेपछि पुनः टीकापुर बजारमा रिक्सा चलाउन थालेको उनले सुनाए । ‘अहिले बजारमा चहलपहल पनि देखिन्छ । सामान बोक्ने काम पनि पाइएको छ,’ उनले भने ।

निषेधाज्ञाले सुनसान बनेको टीकापुरमा अहिले चहलपहल बढ्न थालेको छ । लकडाउन र निषेधाज्ञामा कारण बन्द रहेको टीकापुर पार्क खुलेपछि अहिले मानिसहरू घुम्न आउन थालेको पार्कका इन्चार्ज अर्जुन कुवरले बताए । उनले भने,‘भदौ १९ गतेबाट पर्यटकका लागि पार्क खुला गरेका हौं । पार्क घुम्न मान्छेहरू आउनेहरू बढ्न थालेका छन् ।’ मानिसहरूको आवतजावत नहॅुदा ठप्प भएको व्यापार व्यवसाय केही चलायमान भएको व्यापारी व्यवसायीले बताएका छन् ।

सिद्धार्थ होटल टीकापुरका मेनेजर छत्र बोगटीले लकडाउन खुलेपछि होटलमा पाहुनाहरू आउन थालेको बताए । उनले भने, ‘अब फेरि लकडाउन भएन भने व्यापार व्यवसाय सञ्चालनमा कठिनाइ नहोला । टीकापुर घटनाका कारण ठप्प बनेको टीकापुर फेरि कोरोनाको मारले धरासायी बनेको थियो । कोरोना बढेन वा सबैले खोप लगाउन पाए भने व्यापार सुध्रिँदै जाने आशा छ ।’

०७२ भदौको टीकापुर घटनाका कारण लामो समय अशान्त रहेको बनेको टीकापुर कोरोना करहले सुनसान हुन गयो । कोरोनाका कारण अहिले नै पुरानै अवस्थामा व्यापार फर्किन सकेको नभए पनि आजभोलिको चहलपहलले अवस्था सामान्य हुँदै जाने आशा रहेको बोगटीले बताए ।

टीकापुर उद्योग वाणिज्य संघका अध्यक्ष रामबहादुर भण्डारीले कोरोनाका कारण लामो समयसम्म भएको लकडाउन खुलेपछि व्यापार व्यवसाय सामान्य अवस्थातिर फर्किन थालेको बताए । उनले भने, ‘अब चाडपर्वका बेला पनि भएको छ । बजारमा चहलपहल ठिकै देखिएको छ ।’ कोरोनाका कारण मान्छेहरू टीकापुर बजारमा नआए पनि अहिले भने उनीहरू निर्धक्कसाथ बजारमा किनमेलका लागि आउन थालेका उनले बताए ।

पर्यटकीय नगरीका रूपमा विकास हुँदै गरेको टीकापुरमा टीकापुर घटनाका कारण केही समय बाहिरबाट मान्छेहरू आएनन् । टीकापुर घटनाले बिगारेको वातावरण केही सामान्य अवस्था भएपछि कोरोनाको कहरले सुनसान बनाएको थियो । लकडाउन खुलेपछि टीकापुर पार्कमा पनि चहलपहल बढेको पार्क इन्चार्ज कुँवरले सुनाए । उनले भने, ‘अहिले वर्षा नसकिएकाले अलि कमै आउँछन् । वर्षा सकिएपछि पर्यटकको संख्या बढ्छ होला । लामो समय पार्कमा आउन नपाएका स्थानीयलाई पनि पार्क कस्तो भएको होला भनेर पनि आउने गरेका छन् ।’

प्रकाशित : आश्विन ३, २०७८ १२:१३
प्रतिक्रिया
पठाउनुहोस्

बागलुङमा ४२ प्रतिशतलाई कोरोनाविरुद्धको खोप

कान्तिपुर संवाददाता

बागलुङ — जिल्लाका ४२ प्रतिशत नागरिकले कोरोनाविरुद्धको खोप लगाएका छन् । पूर्ण खोपको डोज लगाउनेसमेत ३६ प्रतिशत पुगिसकेका छन् । 

स्वास्थ्य कार्यालय प्रमुख सुरज गुरौका अनुसार ५६ हजार ७ सय ८ जनाले पूर्ण खोप पाएका हुन् । ६६ हजार ९ सय ९२ जनाले पहिलो डोज लगाइसकेका छन् । उनीहरूका लागि पनि दोस्रो डोजको तयारी भइरहेको छ । उनीहरूले दोस्रो डोज लगाइसक्दा १ लाख २३ हजारमा पूर्ण खोप पुग्नेछ ।

बागलुङको कुल जनसंख्या २ लाख ६८ हजार भए पनि अधिकांश विदेशमा भएकोले जिल्लाभित्रको सक्रिय जनसंख्यामा खोपको यो मात्रा उल्लेख्य भएको बताईन्छ । १८ वर्ष माथिका कक्षा ११ र १२ मा अध्ययन गर्नेमध्ये २ हजार ६ सय ६६ जनाले खोप लगाएका छन् ।

खोपको मात्रा बढेपछि संक्रमण दर घटेको छ । दैनिक एक सय जनासम्म संक्रमित भेटिने गरेकोमा अहिले घटेर दैनिक १० देखि १५ जनासम्म मात्रै भेटिन थालेका छन् । जिल्लामा शुक्रबारसम्म ७९ जना मात्रै कोरोनाका सक्रिय संक्रमित छन् । तीमध्ये केही पालिका भने शून्य अवस्थामा छन् । जिल्लामा अहिलेसम्म २६ हजारभन्दा धेरैको कोरोना परीक्षण गरिएको छ । तीमध्ये ७ हजार ४ सय बढी संक्रमित भएका थिए । जिल्लामा कोरोना संक्रमणकै कारण ७० जनाको मृत्युसमेत भएको छ ।

प्रकाशित : आश्विन ३, २०७८ १२:०७
पूरा पढ्नुहोस्
प्रतिक्रिया
पठाउनुहोस्
×