बझाङमा हजुरआमाको हत्या आरोपी पक्राउ- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बझाङमा हजुरआमाको हत्या आरोपी पक्राउ

वसन्तप्रताप सिंह

बझाङ — हजुरआमाको हत्या गरेको आरोपमा एक जना पक्राउ परेका छन् । बझाङको दुर्गाथली गाउँपालिका ५ की ८० वर्षीया रिखीदेवी जप्रेलको हत्या गरेको आरोपमा उनका नाति २१ वर्षीय सुवास जप्रेललाई प्रहरीले पक्राउ गरेको हो ।

सुवासले हजुरआमाको हत्या गरी आँगन नजिकै शव गाडेको अनुसन्धानबाट खुलेको जिल्ला प्रहरी कार्यालय बझाङले जनाएको छ । सुवास दुर्गाथली ५ का वडाध्यक्ष रामबहादुर जप्रेलका छोरा हुन् ।

वडाध्यक्ष जप्रेलले आमाको खोजी गर्ने क्रममा घरको भित्तामा रगत र घर नजिकै खनेको देखेपछि प्रहरीलाई खबर गरेका थिए ।

प्रहरी आएपछि भाग्दै गरेका सुवासलाई दुर्गाथली गाउँपालिका ७ को लवादेउबाट पक्राउ गरिएको डीएसपी रूपक खड्काले जानकारी दिए । वृद्धाले लगाएको सुनका गहना हात पार्न हत्या गरेको हुन सक्ने प्रहरीको आशंका छ । शव पोस्टमार्टमका लागि जिल्ला अस्पताल बझाङ ल्याउने तयारी भइरहेको डीएसपी खड्काले बताए । उनका अनुसार घटनाबारे अनुसन्धान भइरहेको छ ।

प्रकाशित : भाद्र ३१, २०७८ १६:४५
प्रतिक्रिया
पठाउनुहोस्

धरानमा तिहार पछि मात्र विद्यालय खुल्ने

प्रदीप मेन्याङ्बो

सुनसरी — कोरोनाको उच्च जोखिम रहेकाले धरान उपमहानगरपालिका क्षेत्रमा दसैं तिहारपछि मात्र विद्यालय खोल्ने नगर कार्यपालिकाको बैठकले निर्णय गरेको छ । 

उपमहानगरपालिकाले असोज ४ गतेदेखि विद्यालय खोल्ने तयारी गरेको थियो । तर बिहीबार बसेको नगर कार्यपालिका बैठकमा वडाध्यक्षहरुले कोरोनाको उच्च जोखिम भएको र बालबालिकालाई कोरोना विरुद्धको खोप पनि नलगाइएकाले हतार गर्न नहुने अडान लिएपछि तिहार पछि मात्र विद्यालय खोल्ने निर्णय गरिएको हो ।

उपमहानगरपालिकाका वरिष्ठ प्रशासकीय अधिकृत गणेशप्रसाद खतिवडाले सरकारको स्वास्थ्य मन्त्रालयले कोरोनाको उच्च जोखिम अझै रहेको जनाउँदै स्कुल खोलीहाल्ने हतार नगर्न विज्ञप्ति जारी गरेको, संक्रामक रोग विशेषज्ञहरुले पनि बालबालिकालाई खोप नलगाइएको अवस्थामा झन् संक्रमण फैलन सक्ने चेतावनी दिएको र संक्रमण पूर्ण रुपमा अन्त्य नभएकाले दसैं-तिहार पछि मात्र खोल्ने निर्णय कार्यपालिका बैठकले गरेको बताए ।

नगर कार्यपालिका प्रवक्ता रहेका वडा नं २० का अध्यक्ष मणिराम राईले चाडपर्वहरु पनि नजिकिएको र बिदा हुने बेलामा बालबालिकालाई पनि संक्रमण हुनसक्ने देखिएकाले दसैं तिहारपछि मात्र विद्यालय खोल्ने निर्णय गरिएको बताए ।

उनले भने, ‘स्वास्थ्य मापदण्ड भए पनि विद्यालयमा बालबालिकाहरु एकैठाउँ रहने र खेल्ने, पढ्ने भएकाले कोरोना संक्रमणको दर नघटेसम्म विद्यालय खोल्न उचित नदेखिएको अधिकांश वडाध्यक्षहरुले अडान लिएपछि दसैं तिहार पछि मात्र स्कुल खोल्ने निर्णय भएको छ ।’

धरानमा अझै पनि दैनिक ३० देखि ५० जना कोरोना संक्रमित थपिरहेका छन् ।

प्रकाशित : भाद्र ३१, २०७८ १६:३२
पूरा पढ्नुहोस्
प्रतिक्रिया
पठाउनुहोस्
×