दार्चुलाका विद्यालय खुले- सुदूरपश्चिम - कान्तिपुर समाचार

दार्चुलाका विद्यालय खुले

कान्तिपुर संवाददाता

दार्चुला — कोरोनाका कारण बन्द रहेका दार्चुलाका विद्यालय सञ्चालन हुन थालेका छन् । जिल्लाका केही स्थानीय तहबाहेक अधिकांश ठाउँका विद्यालयमा पढाइ सुरु भएका छन् । जिल्लामा भदौ २० गते दुहु गाउँपालिकाका विद्यालयमा पर्ढा सुरु भएको हो । 

अहिले महाकाली नगरपालिका, अपी हिमाल, मालिकार्जुन, लेकम, गाउँपालिका र शैल्यशिखर नगरपालिकाले विद्यालय सञ्चालनमा ल्याई पढाइ सुरु गरिएको नेपाल शिक्षक महासंघका जिल्ला अध्यक्ष राजेशसिंह सामन्तले बताए । व्यासलगायत केही स्थानीय तहका विद्यालय सञ्चालनमा आउन बाँकी छन् । केही स्थानीय तहमा विद्यालयमा भौतिक रुपमा पढाई सुरु गर्न निर्णय भइसकेको र सञ्चालनमा आउन बाँकी रहेको उनको भनाइ छ ।

भदौ २० गते बसेको जिल्ला कोभिड–१९ संकट व्यवस्थापन समितिको बैठकले स्वास्थ्य मापदण्डको अनिवार्य पालना गरी विद्यालय सञ्चालन गर्न सकिने निर्णय गरेको थियो । विद्यालय सञ्चालन गर्दा सरकारद्वारा जारी स्मार्ट लकडाउनभित्र रहेर सञ्चालन गर्न पाइने जनाइएको थियो । त्यस निर्णयलाई टेकेर अहिले जिल्लाका सबै स्थानीय तहहरूले विद्यालय संचालनमा ल्याउने निर्णय गरिसकेका छन् । महाकाली नगरपालिका कार्यपालिकाको निर्णयको आधारमा स्वास्थ्य मापदण्डको पूर्ण पालना गरेर विद्यालय सञ्चालनमा ल्याइएको राष्ट्रिय मावि दत्तुका प्रधानाध्यापक समेत रहेका शिक्षक महासंघका अध्यक्ष सामन्तले बताए । उनले भन,े ‘विद्यार्थीको भौतिक दुरी, मास्क र सेनिटाइजरको अनिवार्य प्रयोग गर्न विद्यार्थीहरूलाई भन्दै आएका छौं ।’ अभिभावकहरूलाई आफ्ना बालबालिकालाई मास्क लगाएर विद्यालय पठाउन अनुरोध गरिएको उनको भनाइ छ ।

पछिल्लो समय कोरोना संक्रमणको दर कम हुँदै गएपछि समितिले विद्यालय सञ्चालन गर्न स्थानीय तहलाई जिम्मेवारी तोकेको थियो । शैक्षिक गतिविधिलाई सहज बनाउन यस्तो निर्णय गरिएको जिल्ला कोभिड–१९ संकट व्यवस्थापन समितिका अध्यक्ष एवं प्रमुख जिल्ला अधिकारी सिद्धराज जोशीले बताए ।

प्रकाशित : भाद्र ३०, २०७८ १०:३६
प्रतिक्रिया
पठाउनुहोस्

लुम्बिनी प्रदेशसभाको बैठक स्थगित 

कान्तिपुर संवाददाता

बुटवल — लुम्बिनी प्रदेशसभाको बुधबारका लागि बोलाइएको बैठक स्थगित भएको छ । बैठक बस्ने वातावरण नदेखिएपछि पाँचौँ अधिवेशनको नवौँ बैठक प्रदेशसभा सचिवालयमा सूचना टाँसेर स्थगित गरिएको हो ।

अर्को बैठक यही भदौ ३१ गते बिहीबार दिनको १:०० बजे बस्ने गरि बोलाईएको प्रदेश सभा सचिव दुर्लभकुमार पुनले जानकारी दिएका छन् ।

सूर्य चिन्हबाट चुनाव लडेका आफ्ना कारबाहीमा परेका २ सांसदलाई पदमुक्त भएको सूचना प्रकाशित नगरेको भन्दै प्रतिपक्षी दल नेकपा एमालेले संसद् बैठक निरन्तर अवरोध गरिरहेको छ । यसअघि प्रदेश सभा बैठक लगातार दुई पटक स्थगित भइसकेको छ ।

प्रकाशित : भाद्र ३०, २०७८ ०८:४१
पूरा पढ्नुहोस्
प्रतिक्रिया
पठाउनुहोस्
×