भागरथीको सम्झनामा अक्षय कोष- सुदूरपश्चिम - कान्तिपुर समाचार

भागरथीको सम्झनामा अक्षय कोष

कान्तिपुर संवाददाता

बैतडी — बलात्कारपछि हत्या गरिएकी बैतडीकी भागरथी भट्टको सम्झनामा अक्षय कोष स्थापना गरिएको छ । निजामती कर्मचारी मिलन केन्द्र बैतडीमार्फत जिल्लामा कार्यरत सरकारी कर्मचारीहरूले भागरथीको परिवारलाई सहयोग गर्ने उद्देश्यले रकम संकलन गरेका थिए । उनीहरूले संकलन गरेको १ लाख २० हजार रकम मंगलवार हस्तान्तरण गरिएका हो । 


१८ औं निजामती सेवा दिवसका अवसरमा निजामती कर्मचारी परिवार बैतडीले आयोजना गरेको कार्यक्रममा प्रमुख जिल्ला अधिकारी राजेन्द्रदेव पाण्डेले भागरथी पढेको २ विद्यालयमा ६०/६० हजारको अक्षय कोष स्थापनाको घोषणा गरेका हुन् । कक्षा १ देखि १० सम्म अध्ययन गरेको दोगडाकेदार गाउॅपालिका–७ को भूमिराज मावि र कक्षा १२ मा अध्ययन गर्दै आइरहेको दोगडाकेदार गाउॅपालिका–३ मा रहेको सनातन धर्म माविमा कोष स्थापना गरिएको छ । कोषको विधान निर्माण गरेर विद्यालयमा अध्ययनरत गरिब, दलित र जेहेन्दार विद्यार्थीहरूलाई प्रत्येक वर्ष छात्रवृत्ति प्रदान गरिने उनले बताए ।

दोगडाकेदार गाउँपालिका–७ चडेपानीकी भागरथी सनातन धर्म माविमा कक्षा १२ मा पढ्थिन् । गत वर्ष माघ २२ गते घरबाट १ घण्टाको पैदल दूरीमा रहेको विद्यालय गएकी उनी साँझदेखि बेपत्ता भएकी थिइन् । माघ २३ गते उनको शव चडेपानीकै खोचलेक–चडेपानी ग्रामीण सडकको लबलेक जंगलमा फेला परेको थियो ।

प्रकाशित : भाद्र २३, २०७८ ११:११
प्रतिक्रिया
पठाउनुहोस्

बालबालिकालाई वैकल्पिक सिकाइ सामग्री वितरण

कान्तिपुर संवाददाता

कालीकोट — रास्कोट, नरहरिनाथ र सान्नीत्रिवेणी गाउँपालिकाका बालबालिकालाई वैकल्पिक सिकाइ सामग्री वितरण गरिएको छ । लामो समय विद्यालय बन्द हुँदा विद्यार्थीको सिकाइस्तर कमजोर भएपछि वैकल्पिक सिकाइ पुस्तिकाहरू वितरण गरिएको हो । 


अहिले कालीकोटका सबै स्थानीय तहले विद्यालय सञ्चालन गरिसकेको भए पनि वैकल्पिक सिकाइ सामग्रीले बालबालिकाको छुटेको पढाइलाई निरन्तरता दिन सहयोग गर्ने शिक्षा विकास तथा समन्वय इकाइ प्रमुख महेश देवकोटाले बताए । उनका अनुसार ३ गाउँपालिकाका ३४ विद्यालयमा सिकाइ पुस्तिकाहरू वितरण गरिएको छ ।

प्लान नेपालको सहयोगमा सञ्चालित कर्णाली शिक्षा परियोजनाले पुस्तक छपाइमा सहयोग गरेको हो । तिलागुफाका ३४ र शुभकालिकाका २९ विद्यालयलाई सहयात्रा परियोजनाले वैकल्पिक सामग्री सहयोग गरेको इकाइले जनाएको छ ।

अभिभावकको सहयोगमा घरमै गर्न सकिने सिकाइ क्रियाकलाप, अक्षर लेखन किताब, चित्र बनाउने र खेलका सामग्री विद्यार्थीलाई वितरण गरिएको संस्थाकी सिकाइ विशेषज्ञ जानुका घिमिरेले बताइन् । उनका अनुसार बाल विकास केन्द्रदेखि कक्षा ८ सम्मका ७ हजार ५ सय बालबालिकालाई सिकाइ सामग्री उपलब्ध गराइएको छ ।

शिक्षण सामग्रीले बालबालिकाको अतिरिक्त क्रियाकलापलाई पनि सहयोग पुर्‍याउने मेहेलमुडीस्थित पञ्चदेवल माविकी प्रधानाध्यापक जयाकुमारी देवकोटाले बताइन् । ‘विद्यालय बिदा भएको बेला पनि बालबालिकाले यी सिकाइ सामग्रीबाट धेरै ज्ञान सिक्न सक्छन्,’ उनले भनिन्, ‘अभिभावकले पनि बालबालिकालाई सहजीकरण गर्न सक्ने गरी पुस्तकहरू तयार पारिएको छ ।’

प्रकाशित : भाद्र २३, २०७८ ११:०८
पूरा पढ्नुहोस्
प्रतिक्रिया
पठाउनुहोस्
×