सत्तीघाट पुल जोखिममा- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

सत्तीघाट पुल जोखिममा

पानीको सतह बढी भएकाले तत्काल पुल मर्मतको सम्भावना छैन
गणेश चौधरी

टीकापुर — हुलाकी राजमार्गअन्तर्गत कर्णाली नदीमा रहेको सत्तीघाट पुलमा समस्या आएको छ । पुलमा दुइ वटा स्ल्याबको बीचमा करिब आधा फिट ग्याप आएको छ । 

स्ल्याबको बीचमा ग्याप आएपछि ठूला सवारीसाधन आउजाउमा रोक लगाइएको टीकापुर नगरपालिका–८ का वडाध्यक्ष दीर्घ ठकुल्लाले बताए । उनका अनुसार पानीको बहाव एकातिर मात्र गएपछि पिलर धस्सिएको अनुमान गरिएको छ । अहिले पानीको सतह बढी भएकाले के समस्या हो भन्ने यकिन भएको छैन ।

पानीको सतह बढी भएकाले तत्काल पुल मर्मतको सम्भावना पनि नरहेको र स्थानीय तहबाट गर्न नसकिने पनि उनले सुनाए । बर्दियाको राजापुर र कैलालीको टीकापुर जोड्ने पुलको पूर्वतर्फको तटबन्ध केही दिनअघि भत्केपछि आउजाउ बन्द थियो । मर्मतपछि पुनः सञ्चालनमा थियो । कर्णाली नदीको पानीको बहाव पूर्वतर्फ मात्र भएपछि पुलमा असर परेको र पुल एकातिर र पानी अर्कोतिर बग्ने खतरा रहेको स्थानीय धनसिंह साउदले बताए ।

‘पुलको माथितिर नदीको बीच भागमा टापु जस्तो थुम्को छ । त्यो थुम्काले नदीको आधाभन्दा बढी पानी पूर्वी किनारमा बगिरहेको छ,’ साउदले भने, ‘कि त नदीको बहावबीचमा ल्याउन हिउँदमा थुम्का भत्काएर पूर्वी किनारमा आउने पानीको मात्रा बीचमा लानुपर्छ ।’

हुलाकी मार्गमा बनेको सो पुलबाट आवागमन बन्द भएपछि कैलाली र बर्दिया जिल्लाका बासिन्दालाई असहज हुने भएको छ । रसुवा कन्स्ट्रक्सन प्रालिले ५ वर्षअघि पुल निर्माण गरेको थियो । हुलाकी सडकमा रहेको पुलले बर्दिया र कैलाली जोडेको छ । बर्दियाको राजापुर क्षेत्रका बासिन्दालाई उपचारका लागि सदरमुकाम गुलरिया जानुभन्दा टीकापुर नजिक छ । पुलका कारण आउजाउ सहज छ । करिब ५ सय मिटर लम्बाइको पुल बनेपछि राजापुर र टीकापुर जोडिएको छ । पुल नहॅुँदा डुंगाबाटै वारपार गर्नुपर्ने बाध्यता थियो ।

प्रकाशित : श्रावण १४, २०७८ ०९:५७
प्रतिक्रिया
पठाउनुहोस्

तटबन्ध निर्माणका लागि ढुंगा अभाव

गणेश चौधरी

टीकापुर — कर्णाली नदीको कटान रोकथामका लागि रानी जमरा कुलरिया सिँचाइ आयोजनाले नदी किनारको बाढीको उच्च जोखिममा रहेका ठाउँमा तटबन्ध निर्माण गर्दै आएको छ । वर्षायाममा नदी कटान रोक्न आयोजनाले गरिरहेको आपत्कालीन रूपमा तटबन्ध निर्माणको काम ढुंगा अभावले प्रभावित भएको छ ।

कर्णाली नदीले कटान गरेको भुराखानी क्षेत्र । तस्बिर : गणेश/कान्तिपुर

आपत्कालीन कटान कार्य रोक्न आयोजनाबाट ठूला ढुंगा प्रयोग गरी तटबन्ध बनाउने ठेक्का भएकोमा ठूला ढुंगा संकलन हुने लम्कीचुहा नगरपालिका तथा मोहन्याल गाउँपालिका क्षेत्रबाट असार १ गतेदेखि ढुंगा निकाल्न बन्द गरिएपछि तटबन्धका लागि ढुगा अभाव भएको हो । कर्णाली नदीले भुराखखानी, शिवशक्ति वन क्षेत्र, सनकट्टी, दौलतपुर क्षेत्र, शाहीपुर गाउँ सत्ती कर्णाली सामुदायिक वन क्षेत्र तथा अरुणाफाँटामा अत्यधिक कटान भइरहेको रानी जमरा कुलारिया सिँचाइ आयोजनाले जनाएको छ ।

जोखिमयुक्त यी ठाउँमा समयमा नै ठूला ढुंगा हाल्न नसकेमा कुनै पनि बेला नदी गाउँ पस्न सक्ने खतरा रहेको रानी जमरा कुलरिया सिँचाइ आयोजनाका सिनियर डिभिजन इन्जिनियर (सीडीई) विदुर श्रेष्ठले बताए । ‘करिब ४० हजार घनमिटर ठूला ढुंगा चाहिन्छ । वर्षाका बेला नदी रोक्न ९ हजार घनमिटर जति आवश्यक छ,’ सीडीई श्रेष्ठले भने, ‘कर्णाली नदीले कटान तीव्र पारेको छ । रानी जमरा कुलरिया सिँचाइ आयोजनाकै जिम्मा भनेर हो कि कसैले ढुंगा चाहिने मतलबै गरेका छैनन् ।’

लम्कीचुहा नगरपालिका र मोहन्याल गाउँपालिकालाई ढुंगा संकलनका लागि सहजीकरण गरिदिन जिल्ला प्रशासन कार्यालयलाई साउन ३ गते पत्राचार गरिएको श्रेष्ठले बताए । जिल्ला प्रशासन कार्यालयले पनि सम्बन्धित पालिकालाई पत्राचार गरेको भए पनि सुनुवाइ नभएको उनी बताउँछन् । जिल्ला प्रशासन कार्यालय कैलालीको पत्र आइसकेपछि गाउँ कार्यपालिकाको बैठक नबसेकाले ढुंगा दिने या नदिने विषयमा निर्णय नभइसकेको मोहन्याल गाउँपालिकाका कार्यवाहक अध्यक्ष पूजा बुढामगरले बताइन् ।

कर्णाली नदीको कटान रोक्न करिब ४० किलोमिटर तटबन्ध भइसकेको र करिब ५ किलोमिटर तटबन्ध निर्माण गर्न बाँकी रहेको आयोजना कार्यालयले जनाएको छ । सिँचाइ आयोजनाको कमान्ड एरियामा खेतीयोग्य जमिन बचाउन कर्णाली नदीबाहेक मोहना र पथरैया नदीमा पनि तटबन्ध निर्माण गरिएको सिँचाइ आयोजनाले जनाएको छ ।

बर्सेनि कर्णाली नदीको कटान र डुबानको समस्या भएपछि रानी जमरा कुलरिया सिँचाइ आयोजनाले बस्ती बचाउन कर्णाली चिसापानीदेखि भारतको सिमानासम्म तटबन्ध निर्माणको काम गर्दै आएको छ । कर्णालीको किनारमा तटबन्ध हुँदै गएपछि पहिलाको जस्तो जोखिम नरहेको स्थानीय बताउँछन् । टीकापुर नगरपालिका–७ का भीम विकले भने, ‘सिँचाइले गरेको तटबन्धले बाढीबाट जोगिने र जग्गा पनि कटान र पटानबाट जोगिने आशा जागेको छ ।’

तटबन्ध नहुँदा कर्णाली र मोहना नदी किनारका बासिन्दा बर्सेनि वर्षायाममा बाढीबाट जोगिन सुरक्षित स्थानमा बसाइ सर्दै आएका थिए । बाढीका कारण कैलालीको पूर्वी भेगका गाउँ नै विस्थापित भइरहेका थिए । टीकापुर नगरपालिका–२ शाहीपुरको पूरै गाउँ विस्थापित भएर टीकापुरको वीरेन्द्र विद्या मन्दिरको जग्गा कब्जा गरी बसेको छ । कर्णाली नदी नियन्त्रणअन्तर्गत सिँचाइले आयोजना बनाएको तटबन्धले यो ठाउँ बाढीबाट सुरक्षित हुने जमरा कुलो जलउपभोक्ता समितिका अध्यक्ष लालवीर बताउँछन् । उनले भने, ‘बर्सेनि गाउँ नै विस्थापित भइरहेकोमा अबका दिनमा त्यो अवस्था नआउला ।’

प्रकाशित : श्रावण १०, २०७८ १३:२२
पूरा पढ्नुहोस्
प्रतिक्रिया
पठाउनुहोस्
×