अन्तरजातीय बिहे गरेकी युवतीलाई अभिभावकले घर फर्काए- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

अन्तरजातीय बिहे गरेकी युवतीलाई अभिभावकले घर फर्काए

अर्जुन शाह

धनगढी — अन्तरजातीय प्रेम विवाह गरेर घर छोडेको २१ दिनपछि युवतीका अभिभावकले उनलाई केटाको घरबाट फर्काएका छन् । अभिभावक र गाउँलेको डरले उनीहरु भागेर बाहिरै बसेका थिए ।

कैलालीको भजनी नगरपालिका–४ का प्रकाश विक र जानकी–८ की मालती रावल असार ४ गते घरबाट भागेका थिए । घर फर्किने क्रममा उनीहरुले बिहीबार कैलालीकै सत्तीघाट पुल नजिकको जंगलबाट भिडियो रेकर्ड गरेर आफूहरु असुरक्षित रहेको र जंगलमै बस्नु परेको बताएका थिए । प्रहरीका अनुसार उनीहरु दुवैको उमेर २० वर्ष पुगेको छैन ।

कैलाली प्रहरीका अनुसार घरबाट भागेको अवधिमा उनीहरु बुटवल गएर बसेको खुल्न आएको छ । भिडियो पोस्ट भएलगत्तै चौतर्फी चर्चा भएपछि प्रहरीले खोजतलास तीव्र बनाएको थियो । शुक्रबार दुवै जना प्रहरीको सम्पर्कमा रहेको र उनीहरु सुरक्षित रहेको जिल्ला प्रहरी कार्यालयका प्रवक्ता प्रतीक विष्टले बताए । मालतीलाई उनका अभिभावक पक्ष आएर घर लिएर गएका हुन् ।

‘दुवै जनासँग बुझ्दा घरबाट भागेर उनीहरु बुटवल गएर बसेको देखिएको छ । बिहीबार घर फर्किने क्रममा दुवैले सत्तीघाट पुल नजिक जंगलमा भिडियो खिचेर सामाजिक सञ्जालमा पोस्ट गरेको बुझिन आएको छ,’ प्रवक्ता विष्टले भने, ‘हिजो राति उनीहरु दुवै केटाकै घरमा बसेका हुन् । कसैले उनीहरुमाथि कुटपिट भएको हल्ला चलाएका भए पनि त्यस्तो केही छैन ।’

प्रहरीका अनुसार दुवैको उमेर २० वर्ष पुगेको छैन । २० वर्ष मुनिकाले विवाह गर्न पाउने कानुनी व्यवस्था छैन । प्रवक्ता विष्टका अनुसार केटाको उमेर १९ वर्ष र केटीको उमेर १८ छ ।

मालती अहिले आमासँगै धनगढीमा रहेको र थप जाँचबुझ भइरहेको प्रहरीको भनाइ छ । केटा भने इलाका प्रहरी कार्यालय भजनीबाट घर फर्किइसकेका छन् । घरबाट भागेपछि मालतीका अभिभावकले प्रहरी कार्यालयमा उजुरीसमेत दिएका थिए ।

प्रकाशित : असार २५, २०७८ १९:४५
प्रतिक्रिया
पठाउनुहोस्

सुदूरपश्चिमको बजेट पारित

अर्जुन शाह

धनगढी — सुदूरपश्चिम प्रदेश सरकारले आगामी आर्थिक वर्षका लागि प्रस्तुत गरेको बजेट सोमबार बहुमतबाट पारित भएको छ ।

सुदूरपश्चिम प्रदेशसभा बैठक । फाइल तस्बिर

सभामुख अर्जुनबहादुर थापाले आगामी आर्थिक वर्ष ०७८/७९ राजस्व र व्ययको वार्षिक अनुमान बजेट र उक्त बजेटसँग सम्बन्धित अर्थसम्बन्धी प्रस्तावलाई कार्यान्वयन गर्न बनेको विधेयक निर्णयार्थ प्रस्तुत गर्दा प्रमुख प्रतिपक्षी दल नेपाली कांग्रेस, जनता समाजवादी पार्टी (जसपा) र एमालेको ओली समूहले असहमति जनाएका थिए ।

बजेटमाथिको छलफलका क्रममा सांसदहरूले उठाएका प्रश्नको विषयगत मन्त्री र एकमुष्ट रूपमा आर्थिक मामिला तथा योजनामन्त्री प्रकाशबहादुर शाहले जवाफ दिएका थिए । बजेट तथा योजना विनियोजनमा बिचौलियाको चलखेल भएको र सेटिङ गरिएको भन्ने आरोपप्रति मन्त्री शाहले असहमति जनाए । ‘बजेटमा बिचौलियाको चलखेल भएको भन्ने आरोपमा मेरो गम्भीर असहमति छ,’ मन्त्री शाहले भने, ‘कसैले स–प्रमाण ल्याएमा त्यस्ता कार्यक्रम र योजना रोक्का र खारेज गर्न म प्रतिबद्ध छु ।’

उनले वार्षिक कार्यक्रम पुस्तिकामा दोहोरो परेका, नाम र ठेगाना फरक परेका योजना तत्काल सच्याइने बताए । साथै उनले बजेट कार्यान्वयनप्रति शंका नगर्न पनि अनुरोध गरे । उनले भने, ‘योजनाहरूको कार्यान्वयन र उपलब्धिहरूको लेखाजोखा गर्न तेस्रो पक्षीय अनुगमन संरचना निर्माण गर्छौं ।’

आगामी आर्थिक वर्षको कुल बजेट ३० अर्ब ३३ करोड ९४ लाख ५५ हजारको रहेको छ । पुँजीगततर्फ १७ अर्ब ६५ करोड ४० लाख ५२ हजार (५८ दशमलव २ प्रतिशत) र चालुतर्फ १० अर्ब ६६ करोड ९ लाख ३ हजार (३५ दशमलव १ चालु) विनियोजित छ ।

प्रकाशित : असार १४, २०७८ १०:१६
पूरा पढ्नुहोस्
प्रतिक्रिया
पठाउनुहोस्
×