कञ्चनपुर र कैलालीमा पनि थपियो निषेधाज्ञा- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

कञ्चनपुर र कैलालीमा पनि थपियो निषेधाज्ञा

पहिलोको भन्दा खुकुलो बनाइयो
भवानी भट्ट, चित्रांग थापा

कञ्चनपुर,धनगढी — कोरोना संक्रमण न्यूनिकरण तथा रोकथामका लागि जारी गरिएको निषेधाज्ञा केही खुकुलो पार्दै थप एक साता थपिएको छ । जिल्ला कोभिड १९ संकट व्यवस्थापन केन्द्रको सोमबार बसेको बैठकले कञ्चनपुरमा असार १४ सम्म निषेधाज्ञा थपेको हो ।

कञ्चनपुरमा मंगलबारदेखि अत्यावश्यक बाहेकका अन्य पसल तथा व्यापार व्यवसाय पनि बिहान ६ देखि ३ वजेसम्म स्वास्थ्य मापदण्ड अपनाएर खुला रहनेछन् । खाद्यान्न, दूध फलफूल र तरकारीका पसलको हकमा भने सामान्य अवस्था जस्तै खुला रहनेछन् । यसैगरी, निजी र सरकारी सवारीसाधन पनि सञ्चालनमा रहनेछन् । अनुमतिप्राप्त बाहेकका सार्वजनिक सवारीसाधन भने अझै बन्द रहनेछन् ।

सर्वाजनिक सेवा प्रवाह गर्ने सरकारी तथा निजी कार्यालय र बैंक तथा वित्तीय संस्थाहरु स्वास्थ्य मापदण्ड पूरा गरेर खुला रहने जिल्ला प्रशासन कार्यालयले जनाएको छ । कञ्चनपुरमा कोरोना संक्रमण तीव्र गतिमा बढेपछि वैशाख १६ गतेदेखि निषेधाज्ञा लागू गरिएको थियो । यहाँ सक्रिय संक्रमितको संख्या घट्दै गएपछि सोमबार आठौं पटक केही खुकुलो पार्दै निषेधाज्ञाको अवधि असार १४ सम्म थपिएको हो ।

यसैगरी, कैलाली जिल्ला प्रशासन कार्यालयले पनि जिल्ला कोभिड– १९ संकट व्यवस्थापन केन्द्र (डिसीसीएमसी) को सिफारिसमा असार ८ गतदेखि लागू हुने गरी असार १५ गतेसम्म निषेधाज्ञा थपेको छ । कैलालीका प्रमुख जिल्ला अधिकारी खगेन्द्रप्रसाद रिजालद्वारा सोमबार कैलाली जिल्लाभर लागू हुनेगरी निषेधाज्ञाको आदेश जारी गरिएको हो ।

निषेधाज्ञाको आदेशमा यसअघि बिहान ११ बजेसम्म मात्र खुला रहने खाद्य सामग्री पसलहरु, निर्माण सामग्री, हार्डवेयर, इलेक्ट्रोनिक्सका पसलसंँगै पुस्तक पसल र स्टेशनरी, कपडा तथा फेन्सी पसल र टेलरिङ सेन्टरहरु बिहान ६ बजेदेखि दिउँसो ३ बजेसम्म सञ्चालन गर्न पाउने व्यवस्था तोकिएको छ ।

यसैगरी निषेधाज्ञा आदेशमा जोर–बिजोर प्रणालीका आधारमा सञ्चालन गर्ने गरी निजी सवारीसाधन सञ्चालन गर्न मिल्ने व्यवस्था गरिएको छ । शिक्षण संस्था बाहेक सरकारी तथा सार्वजनिक कार्यालयहरुले आलोपालो गरी स्वास्थ्य सुरक्षाको मापदण्ड पालना गरी कार्यालयको कार्यप्रकृति अनुसार न्युनतम संख्यामा कर्मचारी उपस्थित हुने व्यवस्था मिलाइ सेवा प्रवाह गर्न निषेधाज्ञा आदेशमा उल्लेख गरिएको छ ।

प्रकाशित : असार ७, २०७८ १८:१३
प्रतिक्रिया
पठाउनुहोस्

बाघको आक्रमणबाट महिलाकाे मृत्यु, स्थानीयद्वारा निकुञ्ज कार्यालयमा तोडफोड र आगजनी

घटनालगत्तै निकुञ्जले बाघ धपाएर शव तत्काल बाहिर नल्याएको भन्दै स्थानीयको प्रदर्शन
रमेशकुमार पौडेल

चितवन — बाघको आक्रमणमा परी सोमबार दिउँसो रत्ननगरमा एक महिलाको ज्यान गएपछि स्थानीयले चितवन निकुञ्जको सौराहामा रहेको पूर्वी सेक्टर कार्यालयमा तोडफोड र आगजनी गरेका छन् । 

रत्ननगर नगरपालिका-५ मगर टोलकी ३२ वर्षीया गीता अधिकारीलाई घर आडको जनकौली मध्यवर्ती सामुदायिक वनमा निउरो टिप्न गएका बेला बाघले आक्रमण गरेको चितवन जिल्ला प्रहरी कार्यालयका प्रवक्ता डीएसपी सूर्य थापाले जानकारी दिए ।

दिउँसो १ बजेतिरको घटनापछि आक्रोशित स्थानीयले निकुञ्जको सौराहामा रहेको पूर्वी सेक्टर कार्यालय अगाडि प्रदर्शन गर्दै आगजनी र तोडफोड गरेका हुन् ।

निकुञ्जका प्रमुख संरक्षण अधिकृत अणनाथ बरालका अनुसार प्रदर्शन गर्न आएकाहरुले कार्यालयका सिसा फुटाउनुका साथै चौरमा ल्याएर कुर्सी र बेञ्च जलाएका छन् ।

घटनालगत्तै निकुञ्जले बाघ धपाएर महिलाको शव तत्काल बाहिर नल्याएको भन्दै स्थानीयले प्रदर्शन गरेको निकुञ्जको मृगकुञ्ज मध्यवर्ती उपभोक्ता समितिका अध्यक्ष दुर्गाप्रसाद घिमिरेले बताए ।

निकुञ्जका प्रमुख संरक्षण अधिकृत बरालले घटना भएको ४५ मिनेटभित्रै हात्तीसहितको टोली घटनास्थलमा पुगेको बताए । ‘बाघ भएको ठाउँमा जान हात्ती चाहिन्छ । प्राविधिक टोली तयार हुनु पर्दछ । यसका लागि चाहिने समय बाहेक अरु ढिलासुस्ती भएको छैन,’ बरालले भने । बाघले महिलाको शव कुरेरै बसेको थियो । साढे चार बजेतिर प्राविधिक टोलीले डार्ट गरेर बाघलाई लठ्याएको मध्यवर्ती अध्यक्ष घिमिरेले जानकारी दिए ।

केही दिनयता चितवन निकुञ्ज र आसपासको वन क्षेत्रमा वन्यजन्तुले आक्रमण गर्ने र स्थानीय घाइते हुने तथा ज्यानै जाने घटना बढेको छ । दुई हप्ताअघि जेठ २४ गते भरतपुर महानगरपालिका–२४ ध्रुवघाट क्षेत्रमा मगर गोहीको आक्रमणमा परेर भरतपुर–२५ बसकट्टाका ३५ वर्षीय छन्नुराम बोटेको निधन भएको थियो । उनी माछा मार्न निकुञ्ज क्षेत्रमा पर्ने राप्ती नदीमा गएका थिए ।

त्यसअघि च्याउ टिप्न निकुञ्ज गएका बेला बैशाख ३० मा जंगली हात्तीले एकजनाको ज्यान लिएको थियो । निकुञ्जका सहायक संरक्षण अधिकृत लोकेन्द्र अधिकारीका अनुसार यो आर्थिक वर्षमा अहिलेसम्म चितवन राष्ट्रिय निकुञ्ज र यसको मध्यवर्ती क्षेत्रमा वन्यजन्तुले आक्रमण गर्दा १३ जनाको मृत्यु भएको छ । जसमध्ये बाघले चारजना, हात्ती र गैंडाले तीन/तीनजनाको ज्यान लिएको उनले बताए । गौरी गाइ, बँदेल र मगर गोहीले आक्रमण गर्दा एक/एकजनाको ज्यान गएको उनको भनाइ छ ।

प्रकाशित : असार ७, २०७८ १८:०३
पूरा पढ्नुहोस्
प्रतिक्रिया
पठाउनुहोस्
×