पसलैपिच्छे अखाद्य वस्तु- सुदूरपश्चिम - कान्तिपुर समाचार

पसलैपिच्छे अखाद्य वस्तु

अनुगमनको सुइँको पाएपछि कुनै व्यापारीले म्याद नाघेका सामान लुकाउँछन्, कुनै पसल बन्द गरेर बस्छन्
मेनुका ढुंगाना

अछाम — अछामका स्थानीय बजारमा अखाद्य र म्याद गुज्रेका वस्तु जताततै भेटिन थालेका छन् । हालै जिल्ला प्रशासन कार्यालयले जिल्लाका ९ वटा स्थानीय तहका एक सयभन्दा बढी पसलमा अनुगमन गर्दा फेला परेका १० लाख मूल्य बढीको अखाद्य वस्तु भेटिएको हो । ती सबैलाई नष्ट गरिएको छ ।

अछाममा अनुगमनका क्रममा भेटिएका म्याद नाघेका सामग्री नष्ट गरिँदै। तस्बिर : कान्तिपुर

निषेधाज्ञाको समयमा कालोबजारी, मूल्यमा मनपरी, अखाद्य सामग्रीको बिक्रीवितरण गरेको गुनासो आएपछि बजार अनुगमनलाई तीव्रता दिइएको अछामका सहायक प्रमुख जिल्ला अधिकारी रञ्जनप्रसाद तिमिल्सेनाले बताए । प्रशासन, प्रहरी, कोष तथा लेखा नियन्त्रण कार्यालय, उद्योग वाणिज्य संघलगायत सरोकारवाला निकायको संयुक्त टोलीले अनुगमन थालेको छ ।

महामारीका बेला बजारमा कृत्रिम अभाव सिर्जना गर्ने, कालोबजारी गर्ने, अखाद्य वस्तुको बिक्रीवितरण गर्ने व्यापारी धेरै भेटिएको सहायक प्रजिअ तिमिल्सेनाले बताए । ‘अझै पनि उपभोक्ता सचेत भएको पाइएन । कुन सामानको प्रयोग गर्नुपर्ने म्याद कति छ भनेर कसैले नहेर्ने रहेछन्’ उनले भने, ‘सामान किनबेच गर्दा बिल लिने दिने पनि गर्दैनन् । अनुगमन गर्न आउँछन् भन्ने सुइँको पाएपछि कसैले डेट सकिएका सामान लुकाउँछन् । कोही व्यापारी पसल बन्द गरेर बस्छन् ।’

धेरैजसो केटाकेटीले खाने जंक फुड, पिठो, तेल, चाउचाउजस्ता दैनिक प्रयोगमा आउने सामानको डेट सकिएको उनले बताए । ‘जयगढको अनिश जनरल स्टोरबाट साढे ५ लाख बराबरको ४ ट्र्याक्टरमा पनि नअट्ने अखाद्य वस्तु भेटियो । कमलबजारको धमला जनरल स्टोरमा ७ बोरा दालमोठलगायतका सामग्री भेटियो,’ सहायक प्रजिअ तिमिल्सेनाले भने ,‘डेट सकिएका सामग्रीलाई सस्तोमा दिने र ती सामान गाउँका ससाना किराना पसलमा पठाउने रैछन् ।’

जिल्लाको मुख्य व्यापारिक केन्द्र जयगढमा स्थानीयले अनुगमन गर्न खोज्दा अवरोध गरेको तिमिल्सेनाले बताए । ‘साँफेबगरमा सानादेखि ठूला व्यापारीसम्मको मिलेमतो देखियो । व्यापारी सबै मिलेर उपभोक्तालाई ठगेको भेटियो । अहिलेसम्म अनुगमन गरेका शतप्रतिशत पसलमा अखाद्य वस्तु भेटिए,’ उनले भने । पालिकास्तरमा बजार अनुगमन समिति भए पनि प्रभावकारी अनुगमन गर्न नसकेको उनले बताए । उनका अनुसार अखाद्य वस्तु बेच्ने व्यापारीलाई जरिवानासमेत गरिएको छ । जयगढमा ६० हजार, तुर्माखादमा १७ हजार ५ सय, रामारोशनमा २५ हजार, चौखुट्टेमा २० हजार, ठूलासेनमा ५ हजार, कमलबजारमा २५ हजार र मेल्लेखमा ५ हजार जरिवाना गरिएको हो ।

केही किराना तथा खाद्य पसलमा बियर, मदिरा र सुर्तीजन्य पदार्थसमेत सँंगै राखेर बेच्ने गरेको पाइएकोले त्यस्ता व्यापारीलाई पहिलोपटक चेतावनी दिएको सहायक प्रजिअ तिमिल्सेनाले बताए । अर्कोपटक त्यस्तो गरेको पाइएमा पसलका सबै सामान जफत गरी कारबाही गरिने उनले बताए ।

स्थानीय तहमा भएको अनुगमन समितिले पटकपटक बजार अनुगमन गर्न खोज्दा व्यापारीले अवरोध गर्न खोजेको ढकारी गाउँपालिकाकी उपाध्यक्ष लक्ष्मी साउदले बताइन् । ‘हामी अनुगमनमा जाँदा सबै व्यापारी हामीमाथि खनिन्छन् । स्थानीय तहले सोचेजस्तो अनुगमन गर्न सकेको छैन,’ उनले भनिन् ।

प्रकाशित : जेष्ठ ३१, २०७८ ०८:५३
प्रतिक्रिया
पठाउनुहोस्

संक्रमण र मृत्युदर घट्दै

मोहन बुढाऐर

धनगढी — सेती अस्पतालमा जेठ २० गतेअघिसम्म कोभिड–१९ का बिरामी भर्नाका लागि ठाउँ खाली थिएन । त्यसपछिका दिनमा निको हुने क्रम बढ्दै गयो । अहिले २२ जना मात्रै अस्पतालमा भर्ना छन् । आईसीयूमा १० र भेन्टिलेरमा एक जना मात्रै छन् । 

सेती अस्पतालका सूचना अधिकारी दिलीप श्रेष्ठका अनुसार पछिल्लो सातामा ह्वात्तै संक्रमण दर १५/२० प्रतिशतले तल झरेको छ । सेती प्रादेशिक प्रयोगशालामा कोरोना परीक्षण गराउनेहरूको संख्यामा २० गतेपछि ३० र ३५ प्रतिशतमा हाराहारीमा झरेको छ । यसअघि अस्पतालको तथ्यांकअनुसार ४८ प्रतिशतसम्म संक्रमण दर पुगेको थियो । उनले २० गतेपछि परीक्षण भएका १ हजार ९०३ जनामध्ये ५ सय ९० जनामा कोरोना पुष्टि हुनुले ३५ प्रतिशतमा देखिएको बताए । वैशाख १५ गतेदेखि औसतमा दैनिक ४ /५ जना बिरामीको मृत्युदर जेठ २८ गते शून्यमा झरेको छ । जेठ २० पछि ११ जनाको मात्रै मृत्यु भएको छ ।

सेती अस्पतालमा मात्रै होइन सुदूरपश्चिमका महाकाली, टीकापुर र पहाडी जिल्लाका अस्पतालमा समेत कोरोना संक्रमित उपचारका बेडहरू खाली हुन थालेका छन् । अस्पतालमा बिरामी भर्नाको संख्या घटिरहेको प्रदेश स्वास्थ्य निर्देशनालयको तथ्यांकमा उल्लेख छ । निर्देशनालयका अनुसार महाकालीमा २१, टीकापुरमा १८, डडेलधुरामा १३, दार्चुलामा ७ बैतडीमा ४, बझाङमा २ जना गरी १ सय ३ जना अन्य अस्पतालमा कोभिडका बिरामी भर्ना भएका छन् । आईसीयू र भेन्टिलेटरमा महाकालीमा ३ र टीकापुरमा ३ जना भर्ना छन् ।

प्रदेश स्वास्थ्य निर्देशनालयका प्रमुख डा. गुणराज अवस्थीले पछिल्लो एक सातादेखि देश र विश्वव्यापी रूपमा कोरोना संक्रमितको दर घटेका बेला यस प्रदेशमा पनि घटेको बताए । ‘परीक्षण गर्न आउनेको संख्या पनि घटेको छ,’ उनले भने, ‘जटिल प्रकारका बिरामी पनि कम हुँदै गएकाले अस्पतालमा चाप पनि घटेको हो ।’ सुदूरपश्चिम प्रदेश, कोरोनाको दोस्रो लहरले बढी प्रभावित भएको थियो । प्रदेश निर्देशनालयका अनुसार कोरोनाको दोस्रो लहरले ३ सय ५० भन्दा बढीको मृत्युको देखिन्छ । वैशाख पहिलो सातादेखि सुदूरपश्चिममा कोरोनाको दोस्रो लहर चलेको थियो । निर्देशनलायका अनुसार कोरोनाका कारण सुदूरपश्चिम प्रदेशभित्रमा हालसम्म ४२ हजार ६४० जनामा कोरोना पुष्टि भएको छ ।


प्रकाशित : जेष्ठ ३१, २०७८ ०८:४९
पूरा पढ्नुहोस्
प्रतिक्रिया
पठाउनुहोस्
×