पहुँचमार्गको काम प्रभावित- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

पहुँचमार्गको काम प्रभावित

निषेधाज्ञाको अवधिमा समेत पुल निर्माणको काम धमाधम चलिरहेको छ
कान्तिपुर संवाददाता

कञ्चनपुर — महाकाली नदीमा निर्माणाधीन पक्की पुलको काम अन्तिम चरणमा पुग्न लागेको छ । पुलसम्मको पहुँचमार्ग र दुवैतर्फ निर्माण हुने पोखरीको काम भने निर्माण साम्रगी अभावमा प्रभावित भएको छ ।

निषेधाज्ञाको अवधिमा समेत पुल निर्माणको काम धमाधम चलिरहेको छ । पुलका ३२ मध्ये ३० स्ल्याबको काम असारभित्रै सक्ने लक्ष्य राखिएको छ । २४ स्ल्याब निर्माण भइसकेका छन् । ‘असार–साउनभित्रै पुल निर्माणको काम सक्ने लक्ष्य छ,’ महाकाली पुल निर्माणको जिम्मा पाएको कुमार श्रेष्ठ सीएफईसी जेभीका इन्जिनियर किशोर पाण्डेयले भने, ‘अहिले पनि धमाधम काम चलिरहेको छ ।’

यसै वर्षदेखि पुलमा ठूला पुलमा साना सवारीसाधन आवागमन सुरु गरिएको छ । नदीलाई पुलको बीच भागमा बगाएर आवागमन सुरु गरिएको हो । उक्त क्षेत्रमा नदीको चौडाइ ३ किमि छ । पुलको लम्बाइ ८ सय मिटर मात्रै छ । दुवैतर्फ ६/६ सय मिटर चौडाइका पोखरी निर्माण गरिनेछन् । पोखरीको बीचमा पहुँचमार्ग निर्माण हुनेछ ।

पुलको दुवैतर्फ निर्माण हुने पोखरीको काम भने अझै सुरु हुन सकेको छैन । ठूलो ढुंगाको अभावका कारण उक्त काम सुरु हुन नसकेको हो । पुलको दुवैतर्फ २८/२८ सय मिटर लम्बाइका पोखरीहरू निर्माण हुनेछन् । यसका लागि २ सय ५७ केजीभन्दा ठूला ढुंगा आवश्यक पर्छ । महाकाली नदीको बहाबले उक्त तौलसम्मका ढुंगा बगाउन नसक्ने देखिएको इन्जिनियर पाण्डेयले बताए ।

इन्जिनियर पाण्डेयकाअनुसार दुवैतर्फ साढे ५ किमि लामो पोखरी निर्माणका लागि १ लाख ४३ हजार घनमिटर ठूलो ढुंगा आवश्यक पर्दछ । जसमध्ये ९८ हजार ७ सय घनमिटर २ सय ५७ केजीभन्दा बढी तौलका आवश्यक पर्नेछ । ठेक्का सम्झौतामा निर्माणस्थलभन्दा उत्तरपूर्वी चुरे फेदबाट ठूलो ढुंगा ल्याउने मिल्ने व्यवस्था भए पनि निर्माण कम्पनीले उक्त क्षेत्रबाट ढुंगा पाउन सकेको छैन । ‘न त डिजायन परिवर्तन भयो, न ठूलो ढुंगाको व्यवस्था भयो,’ इन्जिनियर पाण्डेयले भने, ‘यस वर्ष एकातर्फको पोखरी निर्माण सक्ने योजना थियो, तर हालसम्म काम सुरु हुन सकेको छैन ।’

पुलसम्मको पहुँचमार्ग निर्माणको काम पनि प्रभावित भएको छ । गत साता महाकाली नदीमा आएको बाढीले मिक्सर प्लान्ट बगाएपछि निर्माण कार्य प्रभावित भएको हो । गड्डाचौकीदेखि दोधारा चाँदनी नगरपालिकाको मलेरिया नालसम्म ८ किमि पहुँच मार्गमध्ये चालु आर्थिक वर्षभित्र ५ किमि सडक कालोपत्रे गर्ने योजना थियो । ‘प्लान्ट बगेपछि उक्त योजना पनि प्रभवित भएको छ,’ पाण्डेयले भने, ‘अब भदौपछि मात्रै कालोपत्रेको काम सुरु हुन्छ ।’ अहिले पहुँच मार्गको ३ किमि सडक कालोपत्रे भएको छ । अन्य सडकको सब बेसको काम चलिरहेको छ । प्लान्ट जडान गर्न डेढ महिना लाग्ने भएकाले तत्काल कालोपत्रेको काम सुरु हुन नसक्ने उनले बताए ।

प्रकाशित : जेष्ठ २७, २०७८ १०:०४
प्रतिक्रिया
पठाउनुहोस्

जिल्ला कोभिड संकट व्यवस्थापन समितिलाई स्वास्थ्य सामग्री हस्तान्तरण

वसन्तप्रताप सिंह

बझाङ — जिल्ला कोभिड संकट व्यवस्थापन समिति बझाङलाई दुईवटा अन्तर्राष्ट्रिय गैरसरकारी संस्थाले कोरोना प्रतिकार्यका लागि स्वास्थ्य सामग्री हस्तान्तरण गरेका छन । वर्ल्ड भिजन इन्टरनेसनल नेपाल र युनाइटेड मिसन टु नेपालले अक्सिजन सिलिन्डरलगायत कोरोना उपयोगी स्वास्थ्य सामग्री प्रदान गरेका हुन् ।

जिल्ला कोभिड संकट व्यवस्थापन समिति बझाङलाई स्वास्थ्य सामग्री हस्तान्तरण गरिँदै। तस्बिर : वसन्तप्रताप/कान्तिपुर


वर्ल्ड भिजन इन्टरनेसनल नेपालले कोरोना रोकथाम तथा नियन्त्रणका लागि ७० थान अक्सिजन सिलिन्डर, ७० वटा पल्स अक्सिमिटर, थर्मल टेम्प्रेचर गन, पीपीई सेट, सर्जिकल मास्क, सेनिटाइजरलगायत २२ लाख ६४ हजार ७ सय २८ रुपैयाँ बराबरको स्वास्थ्य सामग्री प्रदान गरेको छ । वर्ल्ड भिजनको स्थानीय साझेदार संस्था प्रगतिशील युवा समाजका अध्यक्ष रमेश केसीले उक्त सामग्री समिति संयोजक तथा बझाङका प्रमुख जिल्ला अधिकारी मोहन अधिकारीलाई हस्तान्तरण थिए ।

यस्तै, बझाङमै कार्यरत अर्को गैरसरकारी संस्था युनाइटेड मिसन टु नेपाल (यूएमएन) ले पनि जिल्ला कोभिड संकट व्यवस्थापन समितिलाई एन्टिजेन किट, अक्सिजन कन्सन्ट्रेटर, अस्पताल बेड, पीपीई सेट, अक्सिमिटर र कोरोनाको उपचारका लागि उपयोगी मल्टिभिटामिन लगायतका औषधिहरू प्रदान गरेको छ ।

यूएमएनले मास्क, सेनिटाइजर, अक्सिमिटर, मास्क तथा २ सय ६८ परिवारलाई पुग्ने खाद्य सामग्रीसमेत गरी २५ लाख २१ हजार ८१२ रुपैयाँ बराबरको सामग्री हस्तान्तरण गरेको हो । उक्त सामग्री जिल्ला समन्वय समितिका प्रमुख खड्गबहादुर खड्का, स्वास्थ्य कार्यालय बझाङका प्रमुख भानुभक्त जोशीसमेतको उपस्थितिमा प्रमुख जिल्ला अधिकारीलाई हस्तान्तरण गरिएको यूएमएनका लेखा अधिकृत केशवराज जोशीले बताए । दैनिक ५० जनाको हाराहारीमा कोरोनाका नयाँ संक्रमित पुष्टि भइरहेको र जोखिम उच्च रहेकै बेला प्राप्त सामग्रीले महामारी रोकथाम र नियन्त्रणका लागि ठूलो सहयोग पुग्ने प्रमुख जिल्ला अधिकारी मोहन अधिकारीले बताए ।


प्रकाशित : जेष्ठ २७, २०७८ १०:०२
पूरा पढ्नुहोस्
प्रतिक्रिया
पठाउनुहोस्
×