बजेट सक्न भ्याइनभ्याइ- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बजेट सक्न भ्याइनभ्याइ

‘भौगोलिक विकटता, जनसंख्या र आवश्यकताका आधारमा नभई पहुँचका आधारमा योजना छनोट भएका छन्’
मेनुका ढुंगाना

अछाम — अछाममा आर्थिक वर्षको अन्त्यमा आएर ठूलो रकम खर्च गर्ने प्रवृत्ति यो वर्ष पनि रोकिएन । स्थानीय तहमा असारभित्रमा बजेट सक्न भ्याइनभ्याइ भइरहेको छ । विकास निर्माणका लागि छुट्याइएको बजेट फ्रिज हुनबाट जोगाउन जनप्रतिनिधि, कर्मचारी र ठेकेदारले विकास निर्माणका काममा यही बेला चासो देखाउने गरेका छन् ।

अछामको मंगलसेनस्थित एक योजनामा काम गर्दै स्थानीय । तस्बिर : मेनुका/कान्तिपुर

राज्यको पुनः संरचनासँगै स्थानीय तहले गरेको असारे विकास पुरानो विकासभन्दा फरक नभएको अधिकांशले बताएका छन् । असार नजिकिँदै गर्दा गाउँमा योजनाका काम तीव्र गतिमा अघि बढेको स्थानीय बताउँछन् । कुनै स्थानीय तहले आफ्नै डोजर प्रयोग गरेर सडक खन्ने काम गरे भने कुनै स्थानीय तहले आफूनिकटका व्यक्तिको डोजर प्रयोग गरी आर्थिक वर्ष सकिनै लाग्दा काम अघि बढाएका छन् ।

‘स्थानीय तहले आएको रकम फ्रिज जाने डरले पनि जथाभावी रूपमा डोजर प्रयोग गरेका छन्,’ मंगलसेन नगरपालिका–७ की भावना जैशीले भनिन्, ‘असार मसान्त नजिकिनै लाग्दा गरिएको विकासले क्षणिक रूपमा विकास भएको जस्तो देखिए तापनि दिगोपना र गुणस्तरमा ध्यान दिएको पाइँदैन ।’ हरेक स्थानीय तहले सबै वडालाई यातायातको सुविधा पुर्‍याउने उद्देश्य लिएका भए पनि जथाभावी सडक खन्ने कामले गर्दा बाढीपहिरोको जोखिम भने बढ्दै गएको उनले बताइन् ।

कमलबजार नगरपालिकामा चालु आर्थिक वर्षका केही योजना मात्रै सम्पन्न हुन बाँकी रहेको नगरप्रमुख ओमप्रकाश बिष्टले बताए ।‘ ‘हाम्रा केही योजना सम्पन्न हुन बाँकी छन् । धेरै योजना सकिए,’ उनले भने, ‘प्रदेश सरकारले जथाभावी योजना दिइरहेको छ । कहाँबाट कसरी योजना ल्याउँछन् थाहा छैन । आर्थिक वर्ष सकिने बेला मात्रै नगरमा प्रदेशका योजना आएको थाहा हुन्छ ।’ नगरभित्र प्रदेशले पठाउने योजना समयमा पठाउनुपर्ने उनले बताए ।

‘प्रदेश सरकारले पठाउने बजेट समयमै पठाउनुपर्‍यो, आर्थिक वर्षको अन्त्यमा आउने बजेटले प्रभावकारी काम गराउन सकिँदैन । फ्रिज जाने सम्भावना धेरै छ,’ नगर प्रमुख बिष्टले भने, ‘नगरमा बजेट आउँदा खुसी हुनुपर्ने बेला खर्च गर्न मुस्किल देखिँदा चिन्तित तुल्याएको छ ।’

आर्थिक वर्षको अन्त्यमा प्रदेश सरकारले पठाउने योजना बजेट सक्नका लागि मात्रै भएको जिल्ला समन्वय समिति अछामका प्रमुख नरबहादुर कुँवरले बताए । ‘प्रदेशबाट आएको बजेट पावर र पहुँचका आधारमा आएको हो । प्रदेशका जनताबारे प्रदेशका योजनामा कुनै समन्वय हुँदैन,’ उनले भने, ‘भौगोलिक विकटता, जनसंख्या र आवश्यकताका आधारमा नभई पहुँचका आधारमा योजना छनोट भएका छन् ।’

मजदुरी गरेर कमाउनेहरूका लागि असार मसान्तमा जताततै काम खुलेको मंगलसेन–५ की शान्ति विक बताउँछिन् । ‘हिउँदमा कतै काम पाइएन । अहिले त ठूला योजनाका काम जताततै काम नै काम छ । जता बढी ज्याला दिन्छौं भन्छन् उतै काम गर्न जान्छौं ।’

देशको संरचना बदलिए पनि असारमा नै बजेट सक्न भ्याइनभ्याइ गर्ने प्रवृत्तिमा कमी नआएको मंगलसेन–१३ का स्थानीय अमर धामी बताउँछन् । ‘असारे विकास भन्नासाथ बजेट सक्ने झारा टार्ने काम हो भनेर सहजै बुझ्न सकिन्छ । र, यही असारे विकासले आर्थिक अनियमितता बढाएको छ,’ उनले भने, ‘यसरी असार लागेपछि बजेट सक्नकै लागि विकास निर्माणका काममा चासो दिने यो प्रवृत्ति गलत छ जसलाई निरुत्साहित गर्नैपर्छ ।’

प्रकाशित : जेष्ठ २७, २०७८ १०:०८
प्रतिक्रिया
पठाउनुहोस्

खोप केन्द्रमै संक्रमण जोखिम

भवानी भट्ट

कञ्चनपुर — कञ्चनपुरको भीमदत्त नगरपालिका–१५ की चन्द्रादेवी खत्री कोरोनाविरुद्धको खोप लगाउन बिहानैदेखि लाइनमा थिइन् । चर्को घाम र कोरोनात्रासका बीच लाइन लागेकी उनले डेढ/दुई घण्टापछि मात्रै खोप लगाइन् । 

कञ्चनपुरको भीमदत्त नगरपालिका–४ स्थित परिवार नियोजन संघको कार्यालयमा रहेको खोप केन्द्रमा खोप लगाउनेको भीड । तस्बिर : भवानी/कान्तिपुर

कोरोना संक्रमणका कारण सबैतर्फ त्रास भइरहेका बेला उनलाई खोप केन्द्रबाटै कोरोना संक्रमण होला कि भन्ने चिन्ता पनि भयो । ‘चर्को घाममा यस्तो लाइन, अनि कोरोनाको पनि त्रास,’ खत्रीले भनिन्, ‘खोप लगाउन आएका समेत बिरामी होलान् भन्ने चिन्ता, खोप केन्द्रबाट कोरोना लाग्ने डर छ ।’ ६२ वर्षीया उनी खोप लगाएपछि भने खुसी थिइन् । कोरोना संक्रमणबाट जोगिने आसका साथ उनी घर फर्किइन् ।

वैशाखदेखि फैलिएको दोस्रो लहरको संक्रमणका कारण थुप्रैले ज्यान गुमाए । धेरै संक्रमित भए । यस कारण पनि उनी जेनतेन खोप लगाउन आएकी हुन् । मंगलबारदेखि सुरु भएको खोप लगाउने कार्यक्रममा तोकिएको उमेर समूहबाहेक त्यसभन्दा माथिल्लो उमेरका समेत वृद्धवृद्धाहरू आइरहेका छन् । ‘खोपले कोरोना त कम लाग्ने रहेछ, तर यस्तो भीडबाट जोगिनै गाह्रो छ,’ भीमदत्त नगरपालिका –१८ निम्बुखेडाकी ७७ वर्षीया कमला चन्दले भनिन्, ‘अघिल्लोपटक पनि खोप सकिएर लगाउन पाइएन, अहिले पनि भीड धेरै छ ।’ उनी पनि बिहानैदेखि खोपका लागि लाइनमा लागेकी थिइन् ।

जिल्लामा सोमबारदेखि सुरु भएको खोप अभियानअन्तर्गत हरेक केन्द्रमा भीडभाड नै देखिन्छ । व्यवस्थापनको कमी र धेरै वडाको खोप केन्द्र एकै स्थानमा तोकिएका कारण भीडभाड बढी भएको हो । सदरमुकाममा रहेको भीमदत्त नगरपालिकामा ८ वटा मात्रै केन्द्रमा खोप लगाउने काम भइरहेको छ ।

‘सबै केन्द्रमा भीडभाड नै देखिन्छ,’ भीमदत्त नगरपालिकाका स्वास्थ्य शाखा प्रमुख नरेन्द्रराज जोशीले भने, ‘पछिल्लोपटक कोरोना संक्रमणले धेरै क्षति गरेका कारण पनि यसपटक खोप लगाउन बढी आएका हुन् ।’ उनका अनुसार अघिल्लोपटक खोप लगाउन छटेको ६५ वर्षभन्दा माथिको उमेर समूहका समेत खोप लगाउन धेरै आउने गरेका छन् ।

जिल्ला स्वास्थ्य कार्यालय कञ्चनपुरका अनुसार मंगलबार पहिलो दिन २ हजार बढीले खोप लगाएका छन् । ७ नगरपालिका र २ गाउँपालिका रहेको जिल्लाभरिमा २९ खोप केन्द्रबाट खोप लगाउने काम भइरहेको छ । बिहीबारसम्म करिब ७ हजार जतिलाई खोप लगाउने लक्ष्य राखिएको छ ।

‘केही ठाउँमा भीडभाड बढी देखिएको छ,’ जिल्ला स्वास्थ्य कार्यालय कञ्चनपुरका कोभिड फोकल पर्सन कपिलदेव जोशीले भने, ‘बजार क्षेत्रमा सबै जना एकैपटक आउँदा अझ बढी समस्या भएको छ ।’ उनका अनुसार महेन्द्रनगर बजार क्षेत्रको खोप केन्द्रमा त प्रहरी नै परिचालन गर्नुपरेको छ । भीमदत्त नगरपालिकाको सबैभन्दा बढी जनसंख्या भएको वडा नं. १८ संँगै १५ र ४ गरि तीन वडाको केन्द्र एकै ठाउँमा तोकिएका कारण बढी भीड भएको हो ।

ग्रामीण भेगका खोपक केन्द्रमा समेत भीड नै देखिएको जोशी बताउँछन् । उनका अनुसार बिहानको समयमा सबै जना एकैपटक आउने भएका कारण व्यवस्थापनमा समस्या भएको छ । दिउँसोपछि भने भीड कम हुने गरेको उनले बताए ।

प्रकाशित : जेष्ठ २७, २०७८ १०:०६
पूरा पढ्नुहोस्
प्रतिक्रिया
पठाउनुहोस्
×