विश्वासको मत लिँदै मुख्यमन्त्री भट्ट : यस्तो छ अंकगणित र आकलन- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

विश्वासको मत लिँदै मुख्यमन्त्री भट्ट : यस्तो छ अंकगणित र आकलन

५२ सदस्य रहेको प्रदेशसभामा मुख्यमन्त्रीले विश्वासको मत प्राप्त गर्न २७ जनाको समर्थन आवश्यक पर्छ
अर्जुन शाह

धनगढी — सत्ता साझेदार दल एमालेभित्र किचलो बढ्दै गएका बेला सुदूरपश्चिमका मुख्यमन्त्री त्रिलोचन भट्टले एकाएक विश्वासको मत लिने निर्णय गरेपछि मंगलबार प्रदेशसभामा मतदान हुँदै छ । 

सुदूरपश्चिमका मुख्यमन्त्री त्रिलोचन भट्ट । तस्बिर  : अर्जुन शाह 


मुख्यमन्त्री भट्टले विश्वासको मत प्राप्त गर्ने लगभग पक्का जस्तै रहेको सांसदहरूले बताएका छन् । माओवादी केन्द्रको आफ्नै १३ मत र एमालेभित्र माधव नेपाल पक्षधरको कम्तीमा १५ मत गरी कुल २८ मत पाउने मुख्यमन्त्री भट्टको आकलन छ । ५२ सदस्य रहेको प्रदेशसभामा विश्वासको मत प्राप्त गर्न २७ मत आवश्यक पर्छ ।

एमालेभित्र माओवादी नेतृत्वको सरकारका मुख्यमन्त्री भट्टलाई समर्थन दिने र नदिने भन्नेमा किचलो छ । पार्टीले समर्थन नदिन निर्देशन गरिरहेको छ भने संसदीय दलले भट्टलाई समर्थन दिने निर्णय गरेको छ ।

संसदीय दलमा नेपाल पक्षधर सांसदहरूको नेतृत्व रहेकाले उनीहरूकै साथले पनि सहजै विश्वासको मत प्राप्त गर्न आवश्यक संख्या पुग्ने मुख्यमन्त्रीको आकलन रहेको माओवादी केन्द्रका सांसद महेशदत्त जोशीले बताए ।

प्रदेशसभामा सभामुखबाहेक एमालेका २४ जना सदस्य छन् । तीमध्ये अध्यक्ष ओली पक्षधर सांसदहरूले संसदीय दलको ह्विप उल्लंघन गरेको अवस्थामा पनि कम्तीमा १५ जना सदस्य आफ्नै पक्षमा रहने नेपाल पक्षको दाबी छ । त्यस अवस्थामा मुख्यमन्त्री भट्टले कम्तीमा २८ मत पाउने आकलन गरिएको सांसदहरुको भनाइ छ ।

केन्द्रको निर्णयको पर्खाइमा कांग्रेस

प्रमुख प्रतिपक्षी दल नेपाली कांग्रेससमेत मुख्यमन्त्री भट्टलाई विश्वासको मत दिने योजनामा पुगेको सांसदहरूले बताए । तर प्रदेश संसदीय दलले त्यससम्बन्धी ठोस निर्णय गरिसकेको छैन । ‘केन्द्रको निर्देशनको पर्खाइमा छौं,’ कांग्रेस सांसद भरतबहादुर खड्काले भने, ‘सरकारमा सम्मानजनक सहभागिता वा आलोपालो नेतृत्वको समझदारीमा अहिले माओवादी नेतृत्वको सरकारलाई समर्थन गर्ने निर्णय हुन सक्छ ।’

प्रदेशसभामा कांग्रेसका १२ जना सदस्य छ । अन्य दुई जना जसपाका सांसद छन् । उनीहरूको धारणा भने खुलेको छैन ।

प्रकाशित : जेष्ठ २५, २०७८ ०९:१५
प्रतिक्रिया
पठाउनुहोस्

युरो कप : नयाँ अनुहार, नयाँ अपेक्षा

कान्तिपुर संवाददाता

काठमाडौँ — प्रत्येक युरोपेली च्याम्पियनसिपको संस्करणले कोही न कोही युवा अनुहारलाई स्टार बनाएको छ । यो यस्तो प्रतियोगिता हो, जसबाट प्रत्येकपल्ट केही नयाँ खेलाडी ठूला नाम भएका छन् ।

यसपल्टको युरो २०२० मा पनि यस्तै हुनेछ, सायद योभन्दा बढी । कोरोना भाइरस संक्रमणका कारण पछिल्लो विश्वकप टुंगिएको तीन वर्ष भइसकेको छ । त्यसैले यसपल्ट धेरैभन्दा धेरै खेलाडीले पहिलोपल्ट ठूलो प्रतियोगिता खेलिरहेका छन् ।

झन् त्यसमाथि युरोपेली फुटबल महासंघले एउटा टिममा २६ खेलाडीलाई अवसर दिएको छ, पारम्परिक २३ भन्दा पनि । त्यसको अर्थ प्रशिक्षकसामु केही बाक्लै संख्यामा कम अनुभवी खेलाडीलाई मौका दिन अवसर प्राप्त भएको छ । एसोसिएट प्रेस (एपी) ले त्यस्ता केही युवा खेलाडीको सूची बनाएको छ, जसबाट यसपल्टको प्रतियोगितामा धेरै अपेक्षा गर्न सकिन्छ ।

फिल फोडेन (इंग्ल्यान्ड)

युरोपेली च्याम्पियन्स लिगमा जतिबेला म्यानचेस्टर सिटीले बोरुसिया डर्टमन्डको सामना गरेको थियो, त्यतिबेला सबैको नजर इर्लिङ हल्यान्डमा थियो । तर जतिबेला खेल सकिएको थियो, त्यसमा निर्णायक हुने सफल खेलाडी भने फिल फोडेन रहे । सिटी समग्रमा ४–२ ले जितेको त्यस टाइमा फोडेनले प्रत्येक लेगमा एक एक गोल गरे ।

सिटीको घरेलु मैदानबाट केही दूरीमा घर रहेका २१ वर्षीय फोडेन क्लबको युथ कार्यक्रमका उत्पादन हुन् । यसपल्टको इंग्लिस प्रिमियर लिगमा उनले सिटीका लागि लगभग सबै खेल खेले । सन् २०१८ को विश्वकपका बेला उनी भर्खरकै खेलाडी थिए, तर गत वर्ष भने उनले इंग्ल्यान्डका लागि डेब्यूको अवसर पाए नै ।

फेरान टोरेस (स्पेन)

स्पेनले गत वर्ष जर्मनीलाई ६–० ले हराउँदा २१ वर्षीय फेरान टोरेसले ह्याट्रिक गरे । नयाँ स्पेनी टिमका लागि उनी निकै प्रमुख खेलाडी रहेका छन् । अन्तर्राष्ट्रिय फुटबलमा उनी जर्मनीका लागि नियमित खेल्ने खेलाडी भइसकेका छन् । त्यसैले उनी म्यानचेस्टर सिटीका प्रमुख खेलाडी हुन् ।

युरोपेली च्याम्पियन्स लिगको समूह चरणमा गरेका चार गोलले नै उनी कत्तिका खेलाडी हुन् भनेर प्रस्ट पार्छ । बार्सिलोनाका १८ वर्षीय अन्सु फाटीले केही समयका लागि टोरेसलाई ओझेलमा पारेको देखिएको थियो, तर फाटी आफैं घाइते भए र हराएजस्तै भए । यो भने टोरेसका लागि राम्रो अवसर बन्यो । फाटी आफै युरो २०२० का लागि चोटका कारण तयार हुन सकेनन् ।

जाओ फेलिक्स (पोर्चुगल)

सन् २०१९ मा जाओ फेलिक्स एक करोड ५३ लाख डलरमा बेन्फिकाबाट एट्लेटिको म्याड्रिड आए । सुरुआती दिनमा उनले आफ्नो नामअनुसार खेल्न सकेनन् र यसका पछाडि दुई ठोस कारण थिए । पहिलो त उनी चोटका कारण संघर्षरत रहे, दोस्रो उनी कोरोना भाइरसबाट संक्रमित भए । तर जतिबेला उनले लय समाते, उनको कुनै जवाफ थिएन ।

अहिले त उनी पोर्चुगलका लागि विश्वास गरिएका खेलाडीमा परेका छन् । सन् २०१९ मा उनले नेसन्स लिग सेमिफाइनलमा डेब्यू गरे । युरो २०२० मा उनी प्रशिक्षक फर्नान्डो टोरेसका लागि राम्रो विकल्पका खेलाडी हुनेछन्, किनभने पोर्चुगली टिमको आक्रमणमा क्रिस्टियानो रोनाल्डो, डिएगो जोटा र बर्नार्डो सिल्भा छन् ।

जियानलुइजी डोनारुमा (इटाली)

एसी मिलानका यी गोलरक्षक जियानलुइजी डोनारुम भर्खर २२ वर्षका भए । तर उनले इटालीको राष्ट्रिय टिममा प्रवेश पाएको ५ वर्षजति भइसकेको छ । डोनारुमा इटालीको फुटबलका लागि पछिल्लो दशककै एक उत्कृष्ट खोजी हुन् । उनलाई जियानलुइजी बुफोनका सबैभन्दा राम्रो विकल्प साबित भएका छन् । उनले सन् २०१६ मा १६ वर्षकै उमेरमा मिलानका लागि डेब्यू गरेका थिए । केही समयमै उनी मिलानका पहिलो रोजाइका गोलरक्षक बने । सन् २०१८ को विश्वकपमा इटाली छनोट हुन सकेन । त्यसैले युरो २०२० मा उनी आफ्नो पहिलो ठूलो प्रतियोगिताका रूपमा खेल्नेछन् ।

काइ हाभर्टेज (जर्मनी)

गत वर्ष चेल्सीले २१ वर्षे काइ हाभर्टेजका लागि ९ करोड ९० लाख डलरमा किनेको थियो बोरुसिया लेभरकुजनबाट । इंग्लिस प्रिमियर लिगमा आएयता उनले आफूलाई स्थापित गर्न पक्कै पनि समय लगाए । एक प्रकारले उनलाई इंग्लिस फुटबलमा अभ्यस्त हुन गाह्रो भयो । जतिबेला चेल्सीमा जर्मन प्रशिक्षक थोमस टचेल आए, हाभर्टेज बेग्लै खेलाडी बने । यसपल्टको प्रतियोगिता जर्मन प्रशिक्षक जोचिम लोका लागि अन्तिम हो । उनले यति बेला केही नयाँ खेलाडीलाई मौका दिन सक्नेछन् । यसमा हाभर्टेज प्रमुख छन् । युरोपेली च्याम्पियन्स लिग फाइनलमा उनको प्रदर्शनले उनी कस्ता खेलाडी हुन्, त्यो त प्रस्ट भएकै छ ।

म्याथिज डी लिग्ट (नेदरल्यान्ड्स)

सन् २०१४ मा नेदरल्यान्ड्स पछिल्लो पटक विश्वकप खेलेको थियो । त्यसयता यो देशले धेरै युवा खेलाडी विकसित गरिसकेको छ, त्यो पनि अब्बल दर्जाका । त्यसमै एक हुन्, म्याथिज डी लिग्ट । सन् २०१९ मा अयाक्सले युरोपेली च्याम्पियन्स लिगको सेमिफाइनल यात्रा तय गरेको थियो र त्यसका एक स्टार खेलाडी यिनै डी लिग्ट थिए । त्यसपछि उनी युभेन्ट्स पुगे । यसक्रममा उनले आफूलाई विश्वकै अब्बल दर्जाका डिफेन्डरका रूपमा आफूलाई स्थापित गरेका छन् । उनी भर्खर २१ वर्षका भए । तर देशका लागि २० पल्ट भन्दा बढी खेलिसकेका छन् । कारण उनी वास्तवमै उत्कृष्ट डिफेन्डर हुन् ।

तस्बिर : एपी

प्रकाशित : जेष्ठ २५, २०७८ ०९:१४
पूरा पढ्नुहोस्
प्रतिक्रिया
पठाउनुहोस्
×