व्यास क्षेत्र सञ्चारविहीन

भवनको छत भत्किएपछि भवनभित्र रहेको टेलिकमको बीटीएस, रेडियो सिस्टमलगायतमा समस्या आएको हुन सक्ने नेपाल टेलिकम दार्चुलाका प्रमुख कृष्णबहादुर गुरुङले बताए । ‘भवन पूरै भत्काएको छ, के कति क्षति भयो भन्ने यकिन जानकारी छैन,’ उनले भने ।

स्थानीय बेंसीबाट गाउँ फर्केदेखि नै व्यास गाउँपालिकाले टेलिकम कार्यालयलाई पत्राचार गरी टावर सञ्चालन गर्न माग गरेको थियो । लामो समयदेखि बिग्रेको सञ्चार सेवा सञ्चालन नहुँदा व्यासका स्थानीयसँग सम्पर्क नभएर समस्या बुझ्न नसकिएको गाउँपालिका अध्यक्ष दिलीपसिंह बुढाथोकीले बताए । ‘हाम्रो तहबाट बारम्बार पहल गरिएको छ । काम गर्ने निकायको ध्यान पुग्न सकेको छैन,’ उनले भने ।

मर्मत नहुँदा अहिले व्यास–१ छाङरु र टिंकरका स्थानीय र त्यहाँस्थित सशस्त्र र नेपाल प्रहरीका कर्मचारी सञ्चार सेवाबाट वञ्चित भएका छन् । ‘गाउँमा केही भए बेंसी खबर गर्न फोन नहुँदा साह्रै समस्यामा परेका छौं,’ व्यास–१ टिंकरका मोहनसिंह टिंकरीले भने ।