सब्जीमन्डीमा भीड- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

सब्जीमन्डीमा भीड

जिल्लामा तीन दिनमै कोरोना संक्रमणबाट मृत्यु हुनेको संख्या १५ पुगेको छ
भवानी भट्ट

कञ्चनपुर — कोरोना संक्रमण तीव्र गतिमा बढ्न थालेपछि कञ्चनपुरमा निषेधाज्ञा लागू भएको दुई साता पुग्यो । स्थानीय प्रशासनले सातामा तीन दिन बिहान ३ घण्टा मात्रै तरकारी तथा खाद्यान्नलगायत अत्यावश्यक वस्तु किनमेलको समय तोकेको छ । तर यही खुला अवधिमा हुने अनियन्त्रित भीडले संक्रमणको जोखिम झनै बढाएको छ ।

कञ्चनपुरको महेन्द्रनगरस्थित सब्जीमन्डीमा बुधबार बिहान देखिएको भीड । तस्बिर : भवानी भट्ट

बिहान किनमेलका लागि हुने भीडभाडमा स्वास्थ्य सुरक्षाका कुनै पनि मापदण्ड पालना भएको हुँदैन । जिल्लामा तीन दिनयता कोरोना संक्रमणबाट मृत्यु हुनेको संख्या पनि बढ्दै गएको छ । आइतबार ५, सोमबार ७ र मंगलबार १५ जनाको मृत्यु भएको छ । तर बिहानको समयमा किनमेलका लागि हुने भीडभाड अझै घटेको छैन । ‘प्रशासनले निषेधाज्ञा जारी गरेको छ, तर बजारमा किनमेलका लागि भीडभाड छ,’ महेन्द्रनगर सब्जीमन्डी व्यवसायी समितिका अध्यक्ष विशाल सोनारले भने, ‘बिहान तरकारी किन्नेको भीडले जात्रा लागे जस्तै हुन्छ ।’ स्थानीय प्रशासनलाई एक हप्ताअघि नै तरकारीदेखि खाद्यान्नलगायत सबै किसिमका पसलहरू बन्द गर्न आग्रह गरेपछि बेवास्ता भएको उनले बताए ।

जिल्ला कोभिड संकट व्यवस्थापन समितिको बैठकमा समेत पटकपटक तरकारी र खाद्यान्न लगायतका पसलसमेत बन्द गर्न आग्रह गरेको अध्यक्ष सोनारले बताए । ‘संक्रमण बढेकै छ, मृत्यु दर झनै बढेको छ, हामीले यो चेन ब्रेक गर्न एक हप्ता पूर्ण लकडाउन या कर्फ्यु लगाउन समेत भनेका हौं,’ उनले भने, ‘तर हाम्रो कुरा कसैले सुनेन, अहिले मृत्यु हुनेको संख्या दैनिक बढ्नुमा यो भीडभाड पनि एउटा कारण हुन सक्छ ।’

स्थानीयले सामाजिक सञ्जालहरूमा समेत तरकारी र खाद्यान्नलगायतको किनमेलका लागि महेन्द्रनगर बजारमा हुने भीडभाड नियन्त्रण गर्न कर्फ्यु लगाउनसमेत आग्रह गरेका छन् । उनीहरूले हरेक दिन बिहान देखिने भीडभाडले जोखिम बढ्दै गएको भन्दै प्रशासनको बेवास्ताप्रति आक्रोश समेत पोखेका छन् ।

‘कञ्चनपुरमा मानवीय क्षति कम गर्नु छ भने तत्काल तरकारी बजार र किराना पसलहरू पूर्ण रूपमा दुई हप्ताका लागि कडाइका साथ बन्द गरिनुपर्छ,’ महेन्द्रनगरका स्थानीय उत्तम विष्टले भने, ‘कोरोना संक्रमण समुदायमा प्रवेश गरिसकेको अवस्थामा विवाहलगायत भोजभतेरहरू पनि बन्द गरिनुपर्छ ।’ उनले पछिल्लो समय दिनहुँ वृद्धि भइरहेको संक्रमण र मृत्युदरका कारण पनि बजार क्षेत्रकै भीडभाड भएको बताए ।

प्रकाशित : वैशाख ३०, २०७८ ०८:५७
प्रतिक्रिया
पठाउनुहोस्

टीकापुरमा संक्रमितको चाप

लक्षण भएका धेरै छन् तर समयमै परीक्षण हुन सकेन
गणेश चौधरी

कञ्चनपुर — कैलालीको टीकापुर क्षेत्रमा कोरोना संक्रमितको संख्या बढेको बढ्यै छ । अस्पतालमा बिरामीको चाप घटेको छैन । चिकित्सकहरू अझै २/३ साता संक्रमित र मृत्युदर बढ्ने अनुमान गरिरहेका छन् ।

कैलालीको टीकापुर अस्पतालमा कोरोना संक्रमितको चाप बढेपछि बरन्डामा उपचार गराइरहेकाहरू । १५ शय्याको अस्पतालमा बुधबार ३९ जना संक्रमित थिए ।तस्बिर : गणेश चौधरी

टीकापुर अस्पतालमा कार्यरत कोरोना फोकल पर्सन डा. रमेश उपाध्यायले कोरोना समुदायस्तरमै फैलिएको र संक्रमणको अवस्था भयावह भइसकेको बताउँछन् । ‘दुई साताअघि नै कोरोनाका लक्षण भएका केसहरू आउन सुरु भएको हो,’ डा. उपाध्यायले भने, ‘तर समयमै कोरोना जाँचको राम्रो प्रबन्ध भएन । आइसोलेसनमा राख्ने व्यवस्था पनि भएन । समुदायमा भयावह रूपमा फैलियो ।’

टीकापुर नगरपालिका–८ का धनसिंह साउद सरकारले गत वर्षको जस्तो सजगता नअपनाएको बताउँछन् । उनले भने, ‘भारतबाट आउनेलाई क्वारेन्टाइनमा राख्ने र कन्ट्याक्ट ट्रेसिङ गर्नेलगायतका काम भएन ।’

समुदायमा कोरोनाका लक्षण भएका बिरामी भए पनि गम्भीर नभएसम्म घरमै रहने गरेको डा. उपाध्यायले बताए । ‘घरमा थेग्न नसकेर सिरियस भएर मात्र बिरामी अस्पताल आउँछन्,’ डा. उपाध्याय भन्छन्, ‘अस्पताल आएकामध्ये २५ प्रतिशत जति बिरामी क्रिटिकल अवस्थाका छन् ।’ १५ शय्या क्षमताको अस्पतालमा हाल ३९ संक्रमितको उपचार भइरहेको छ ।

अस्पतालमा अक्सिजनको अभाव पनि उत्तिकै छ । ‘अक्सिजनको ब्याकअप नहुँदा बिरामीको ज्यान जाने गरेको छ,’ डा. उपाध्यायले भने । समुदाय स्तरमा फैलिए पनि परीक्षण भने प्रभावकारी रूपमा हुन सकेको छैन । टीकापुरमा कोरोना परीक्षणका लागि संकलित स्वाब धनगढी पठाउनुपर्ने र त्यसको रिपोर्ट आउन कम्तीमा एक साता लाग्ने गरेको छ । कोरोनाको लक्षण भएका धेरै छन् तर समयमै परीक्षण हुन नसकेको स्थानीयको गुनासो छ ।

प्रकाशित : वैशाख ३०, २०७८ ०८:५६
पूरा पढ्नुहोस्
प्रतिक्रिया
पठाउनुहोस्
×