रिपोर्ट ढिलाइले उपचारमा समस्या- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

रिपोर्ट ढिलाइले उपचारमा समस्या

गणेश चौधरी

टीकापुर — स्वाब परीक्षणका धनगढी पठाउनुपर्ने र रिपोर्ट आउन ढिलाइ हुने भएकाले टीकापुरमा उपचारमा समस्या भएको छ । टीकापुरमा कोरोनाको परीक्षण छैन । कोरोना संक्रमणको रिपोर्ट धनगढीबाट नआउन्जेल बिरामीलाई अब्जरभेसनमा राख्नुपर्ने बाध्यता रहेको टीकापुर अस्पतालका डाक्टर रमेश उपाध्यायले बताए ।

‘ज्वरो आउने, टाउको दुख्नेलगायतका लक्षण भएका बिरामी आएपछि कोरोनाको आशंका हुन्छ,’ उनले भने, ‘उनीहरूलाई रिपोर्ट नआउन्जेल अब्जरभेसनमा राख्नुपर्ने बाध्यता छ । चाँडै रिपोर्ट आए त्यहीअनुसार उपचार अघि बढाउन सकिन्थ्यो ।’

अब्जरभेसनमा रहेका अधिकांश बिरामीलाई अक्सिजन दिएर राख्नुपरेको डा. उपाध्यायले बताए । अस्पतालमा क्षमताभन्दा बढी बिरामी छन् । ‘यही क्रम रहे अस्पतालले धान्न सक्ने अवस्था रहन्न’ उनले भने । कोरोना परीक्षणको रिपोर्ट आउन कम्तीमा ५ दिन लाग्ने गरेको डाक्टर उपाध्यायले जानकारी दिए । ‘टीकापुरमा साताको २ दिन स्वाब संकलन गरी परीक्षणका लागि धनगढी पठाउने गरिएको छ,’ उनले भने, ‘त्यसको रिपोर्ट एकदमै ढिलो आउँछ ।’

टीकापुरमा ४ सय ७ जनाको स्वाब संकलन भएकामा २ सय ८५ जनाको मात्र रिपोर्ट आएको छ । १ सय २२ जनाको रिपोर्ट आउन बाँकी छ । परीक्षण भएकामध्ये ८१ जनाको पोजिटिभ रिपोर्ट आएको अस्पतालले जनाइएको छ । संक्रमितमध्ये ६२ सक्रिय संक्रमित छन् । टीकापुरमा अहिलेसम्म कोरोनाका कारण ९ जनाको ज्यान गएको छ । टीकापुर अस्पतालमा पनि अक्सिजनको अभाव हुन थालेको छ । अस्पतालका मेडिकल सुपरिन्टेन्डेन्ट डा. रेमकुमार राईले स्थिति भयावह बन्दै गएकाले सबैले आआफ्नो क्षेत्रबाट सक्दो सहयोग गरिदिन आग्रह गरेका छन् ।

प्रकाशित : वैशाख २६, २०७८ १०:१६
प्रतिक्रिया
पठाउनुहोस्

गाउँ–गाउँमा संक्रमित, जोखिममा बालबालिका

मेनुका ढुंगाना

अछाम — अछामका गाउँ–गाउँमा कोरोना संक्रमण फैलिएपछि वैशाख १९ मा निषेधाज्ञा जारी भएसँगै विद्यालय बन्द छन् । विद्यालय बन्द भए पनि बालबालिका गाउँमा घरबाहिर निस्कने र साथीभाइसँग जम्मा भएर खेल्ने गरेका छन् । जिल्लाका मुख्य बजारहरू बन्द रहे पनि गाउँमा बालबालिका र सर्वसाधारणको चहलपहल घटेको छैन ।

मंगलसेन नगरपालिका–३ की मुना साउँदलाई लकडाउनका बेला तीन छोराछोरीलाई सम्हाल्न गाह्रो भएको छ । दिनभर आफू खेतबारीको काममा जाँदा छोराछोरी गाउँ डुल्ने गरेको उनले बताइन् । ‘छोराछोरीलाई सम्हाल्नै सकिएको छैन । दिनभर आफू काममा जान्छु । छोराछोरीलाई घरमा बस भन्दा मान्दैनन् । आफ्नो उमेरका केटाकेटी जम्मा भएर गाउँ डुल्न थाल्छन्,’ उनले भनिन्, ‘अहिले भारतबाट आएका धेरैमा कोरोना देखिएको छ । गाउँ झनै जोखिममा छ । यस्तो बेला साह्रै तनाव हुन्छ ।’

मंगलसेन–५ का सिद्ध विष्टका चार छोराछोरी छन् । यो बेला केटाकेटीको पढाइ रोकिएसँगै समुदायमा संक्रमण फैलिएपछि छोराछोरीलाई सम्हाल्न नसकेको चिन्ताले उनलाई सताउन थालेको छ । ‘पहिले त भारतबाट आएकालाई १४ दिन क्वारेन्टाइनमा राखेर गाउँ पठाउँथे । अहिले त को कताबाट आउँछन्, उनीहरूको स्वास्थ्य अवस्था के हो भन्नेबारे कसैलाई वास्ता नै छैन,’ उनले भने, ‘यस्तो बेला जताततै संक्रमित छन् । केटाकेटीलाई घरमा बस भनेर सम्हाल्न सकिएको छैन । कतिखेर कहाँ जान्छन् पत्तो छैन ।’

वडाका सबै गाउँमा भएका संक्रमितको स्वास्थ्य अवस्थाबारे जानकारी लिन नसकिएको मंगलसेन नगरपालिकाका प्रमुख प्रशासकीय अधिकृत खकेन्द्र सोडारीले बताए । ‘गाउँमा कोरोना संक्रमणको जोखिम बढेको छ । वृद्धवृद्धा, बालबालिकालाई मध्यनजर गर्दै अहिले सचेतना गराइरहेका छौं,’ उनले भने, ‘नगरपालिकाका १४ वटै वडामा युवा परिचालन गरेर संक्रमणबाट बच्ने उपाय र सावधानीबारे जानकारी गराइरहेका छौं ।’ जाल्पा आधारभूत विद्यालयकी शिक्षका दिलु बोहरा लकडाउनमा बालबालिका जोखिममा मात्रै नभएर पढाएको समेत बिर्सने गरेको बताउँछिन् ।

प्रकाशित : वैशाख २६, २०७८ १०:१५
पूरा पढ्नुहोस्
प्रतिक्रिया
पठाउनुहोस्
×