नौ मन्त्री फेरिए, बल्ल तयार पौडी पोखरी- सुदूरपश्चिम - कान्तिपुर समाचार

नौ मन्त्री फेरिए, बल्ल तयार पौडी पोखरी

नेपालगन्ज रंगशालामा शिलान्यासको ११ वर्षपछि मात्र पौडी पोखरी तयार
रूपा गहतराज

नेपालगन्ज — नेपालगन्ज रंगशालाभित्र रहेको पौडी पोखरी शिलान्यासको ११ वर्षपछि प्रयोगका लागि तयार भएको छ । मापदण्ड तयार गरी फागुन १४ देखि पोखरीमा परीक्षण सुरु गरिएको छ । फागुन २५ देखि पूर्ण सञ्चालनमा आउनेछ । पोखरी प्रयोगका लागि राष्ट्रिय खेलकुद परिषद् (राखेप) अन्तर्गत क्षेत्रीय खेलकुद विकास समितिले शुल्क निर्धारणसमेत गरेको छ ।

तत्कालीन युवा तथा खेलकुदमन्त्री गणेश तिवारी नेपालीले २०६६ सालमा शिलान्यास गरेको पौडी पोखरीको निर्माण कार्यले २०७३ सालमा दलजित श्रीपाइली खेलकुदमन्त्री भएसँगै बहुवर्षीय परियोजनामा परेपछि गति लिएको थियो । पौडी पोखरी निर्माण कार्य पूरा हुँदासम्म ९ जना मन्त्री परिवर्तन भइसकेका छन् । समितिले सर्वसाधारणका लागि प्रतिसिफ्ट २ सय र विद्यार्थीका लागि प्रतिसिफ्ट १ सय रुपैयाँ शुल्क निर्धारण गरेको साबिक मध्यपश्चिमाञ्चल खेलकुद विकास समितिका कार्यालय प्रमुख महेश चन्दले बताए ।

एक सिफ्टमा १ सय ५० जनासम्मले पौडी खेल्न सक्नेछन् । मासिक, अर्धवार्षिक र वार्षिक सदस्यता शुल्कसमेत निर्धारण गरिएको छ । समितिले विशेष र सदस्य समूहका लागि छुट्टाछुट्टै सिफ्ट बनाएको छ । सदस्य समूहका लागि बिहान ८–१० बजे र विशेष समूहका लागि बेलुकी ४ः३० देखि ६ः३० बजेको समय निर्धारण गरिएको चन्दले जानकारी दिए ।

‘सदस्य समूहका लागि बेलुकी ४ः३० देखि ७ः३० बजेसम्म निर्धारण गरिएको छ । सर्वसाधारण महिलालाई बिहान ११ देखि १ बजेको समय निर्धारण गरिएको छ,’ उनले भने, ‘महिलाका लागि दिइएको समयमा पुरुषलाई प्रवेश अनुमति छैन ।’

पौडी पोखरीका लागि प्रशिक्षक र लाइफगार्डको व्यवस्था गरिएको छ भने पौडी गर्नॅभन्दा पहिले अनिवार्य रूपमा नुहाउनुपर्ने नियम बनाइएको छ । पौडी खेल्नेहरूले अनिवार्य रूपमा ‘स्विमिङ कस्टम’ लगाउनुपर्ने नियम छ । कुल २१ करोड खर्चमा बनेको यो पौडी पोखरी कोरोना महामारीअगाडि तयार भएको हो । लकडाउनका कारण सञ्चालन हुन नसकेकामा अहिले मापदण्ड बनाएर गर्न लागिएको हो । पौडीको प्राविधिक जनशक्ति नहुँदा पनि पौडी पोखरी सञ्चालनमा कठिनाइ भइरहेको थियो ।

राखेपले २०७५/७६ मा तत्कालीन प्रदेश ५ मा आयोजना भएको आठौं राष्ट्रिय खेलकुदमै यो पौडी पोखरी सञ्चालनमा ल्याउने प्रयास गरेको थियो । निर्माण कार्य सम्पन्न नभएपछि अन्तिम समयमा स्थानीय होटलको पोखरीमा प्रतियोगिता गरिएको थियो । पौडी पोखरी सञ्चालनमा आउने आएपछि नेपालगन्जवासीमा उत्साह थपिएको छ । नेपालगन्ज देशकै सर्वाधिक गर्मी हुने ठाउँ भनेर चिनिन्छ । ‘महिलाका लागि पनि विशेष व्यवस्था भएकाले अब सजिलो भयो,’ उद्योग वाणिज्य संघकी सदस्य विन्दु घर्तीमगरले भनिन्, ‘आम्दानीको स्रोत मात्र होइन, पर्यटन व्यवसायसमेत आकर्षित बन्न सक्छ ।’

खेलाडीले पनि शुल्क तिर्नुपर्ने ?

देशको खेलकुद नियामक निकाय राखेपको बजेटमा निर्माण भएको पौडी पोखरीमा खेलाडीहरूले समेत शुल्क तिरेर प्रयोग गर्नुपर्ने विवादास्पद मापदण्ड बनाइएको छ । राखेपअन्तर्गत क्षेत्रीय खेलकुद विकास समितिका कार्यालय प्रमुख चन्दले खेलाडीको स्तर हेरेर न्यूनतम शुल्क लिइने जानकारी दिए ।

‘हामीसँग चर्चित अन्तर्राष्ट्रिय खेलाडीहरू छैनन् । सुरुआती खेलाडीहरूलाई न्यूनतम शुल्क लिइनेछ । तत्कालका लागि खेलाडीले पनि शुल्क तिरेरै पोखरी प्रयोग गर्नुपर्नेछ ।’ नेपाल पौडी संघका अध्यक्ष अशोक वज्राचार्यले खेलाडीले प्रशिक्षणका लागि पोखरी प्रयोग गर्दा शुल्क तिर्नुपर्ने मापदण्डप्रति असहमति जनाए । ‘मैले सबै कुरा त बुझेको छैन । पोखरी सञ्चालनमा आउन लागेको जानकारी पाएको थिएँ । कम्तीमा आठौं राष्ट्रिय खेलकुदमा सहभागी भएका खेलाडीहरूले पोखरीको प्रयोग निःशुल्क गर्न पाउनुपर्छ भन्ने संघको माग हो,’ अध्यक्ष वज्राचार्यले कान्तिपुरसँग भने, ‘यसबारे राखेप सदस्यसचिवज्यूसँग कुरा गर्नेछु ।’

प्रकाशित : फाल्गुन २०, २०७७ ०८:४१
प्रतिक्रिया
पठाउनुहोस्

प्रतिभा र केनिका सफल

कान्तिपुर संवाददाता

काठमाडौँ — प्लाटिनियमकी तेजीमाया गुरुङ र तारकेश्वर बक्सिङ क्लबकी जानुका थापा बुधबार वीर गणेशमान सिंह स्मृति वाग्मती प्रदेशस्तरीय बक्सिङको क्वाटरफाइनल पुगेका छन् । महिला ४८ केजी तौल समूहमा तेजीमायाले चितवनकी कल्पना रावल र जानुकाले दीपा शाहीलाई हराए ।

महिला ४८ केजीमै बोसिगाउँकी माया क्षत्रीले रसुवाकी रोनिता सिंह र नुवाकोटकी प्रगति थापाले काभ्रेकी रोशनी लावतीलाई पराजित गरी अन्तिम आठमा स्थान बनाए । ५१ केजीमा नुवाकोटकी प्रतिभा शाहीले बक्समान्डुकी सपना तामाङ र प्लाटिनियमकी केनिका राईले रामेछापकी रोजिना रञ्जितमाथि विजय प्राप्त गरे ।

पुरुषकै ४९ केजीमा नुवाकोटका मोहन गुरुङ, चितवनका सुरज गुरुङ, काभ्रेका धमेन्द्र राई तारकेश्वरका सुरज ओली क्वाटरफाइनलमा पुगे । ५२ केजीमा काभ्रेका रोशन मलिक, रसुवाका यानव राई, सिन्धुलीका डेभिड तामाङ, बक्समान्डुका वान्डी शेर्पा, चन्डोलका रमन अली, बोसिगाउाका महेन्द्रविक्रम ठकुरी र बक्समान्डुका सुरज महर्जनले अन्तिम आठमा स्थान बनाए ।

हरेक तौल समूहका विजेताले १० हजार, दोस्रो हुनेले ७ हजार र तेस्रो हुने खेलाडीले ४ हजार पुरस्कार प्राप्त गर्नेछन् । उत्कृष्ट महिला खेलाडीले स्कुटर र पुरुष खेलाडीले मोटरसाइकल पाउनेछन् । कांग्रेस नेता प्रकाशमान सिंहले उद्घाटन गर्दै कोरोना महामारीका कारण गतिविधि सुस्त हुँदा प्रतियोगिताले खेलाडीमा उत्साह जगाउने काम गरेको बताए ।

सागका पदकधारी सम्मानित

सोही कार्यक्रममा १३ औं सागअन्तर्गत बक्सिङका पदक विजेता खेलाडी सम्मानित भएका छन् । काठमाडौंको स्युचाटारमा आयोजित कार्यक्रममा नेपाली कांग्रेसका नेता प्रकाशमान सिंह, नागार्जुन नगरपालिकाका प्रमुख मोहनबहादुर बस्नेत र नागार्जुन बक्सिङ खेलकुद समितिका अध्यक्ष सन्तोष बुढाथोकीले सागका पदक विजेतालाई नगदसहित सम्मान गरेका हुन् । स्वर्ण विजेतालाई १० हजार, रजत विजेतालाई ७ हजार र कांस्य विजेतालाई जनही ५ हजार रुपैयाँबाट सम्मान गरिएको थियो । १३ औं सागमा बक्सिङले ३ स्वर्ण, ६ रजत र ६ कांस्य जितेको थियो ।

प्रकाशित : फाल्गुन २०, २०७७ ०८:३९
पूरा पढ्नुहोस्
प्रतिक्रिया
पठाउनुहोस्
×