माधव नेपाल छिट्टै जेल जान्छन् : कर्ण थापा- सुदूरपश्चिम - कान्तिपुर समाचार

माधव नेपाल छिट्टै जेल जान्छन् : कर्ण थापा

वसन्तप्रताप सिंह

बझाङ — नेकपा (ओली समूह) का सुदूरपश्चिम प्रदेश अध्यक्ष कर्णबहादुर थापाले नेकपा (दाहाल–नेपाल) समूहका अध्यक्ष माधव नेपाल छिट्टै जेल जाने बताएका छन् ।

बझाङमा मंगलबार आयोजित ओली समूहको जिल्ला कमिटीका पदाधिकारी तथा सदस्यको शपथ ग्रहण कार्यक्रममा सम्बोधनक्रममा बालुवाटारस्थित ललिता निवास जग्गा प्रकरणको प्रसंग कोट्याउँदै उनले यस्तो बताएका हुन् । ‘हेर्नुहोला माधव नेपाल छिट्टै जेल जानेवाला छन्,’ उनले भने, ‘त्यही काम गरेका दीप बस्न्यात जेल जाने, गच्छदार दोषी हुने अनि माधव नेपाल किन नजाने ?’

तत्कालीन समयमा ललिता निवासको जग्गा व्यक्तिका नाममा दर्ता गर्न बस्न्यातले उठाएको टिप्पणीमा तत्कालीन प्रधानमन्त्री नेपालसँग पटक–पटक छलफल गरिएको कुरा लिखित रूपमै उल्लेख भएकाले नेपाल उक्त प्रकरणमा मुख्य दोषी रहेको उनको भनाइ थियो । ‘त्यो लिखत आवश्यक परे जनतालाई बाँड्न तयार छौं,’ उनले भने ।

उनले तत्कालीन माओवादी लडाकुको विषय छानबिन हुने भन्दै अर्का अध्यक्ष पुष्पकमल दाहाललाई पनि कारबाही हुने बताए । ‘६/७ हजार लडाकुलाई ३७ हजार पुर्‍याएँ भनेर प्रचण्डले बोलेको भिडियो तपाईंहरूले देख्नुभएकै होला,’ उनले भने, ‘लडाकुले पाएको चेक खोसेर खाएको कुरा पनि सबैसामु छर्लंगै छ ।’ उनले भ्रष्टहरूले आफ्ना कर्तुत ढाकछोप गर्नका लागि गठबन्धन बनाएको आरोप लगाउँदै त्यो सफल नहुने ठोकुवा गरे ।

केपी शर्मा ओलीको जोडबलमा सुशील कोइराला सरकारका पालामा मन्त्री भएका थापाले झन्डै दुई घण्टा लामो भाषणमा धेरैजसो समय दाहाल–नेपाल समूहका नेता भीम रावलको विरोधमा खर्चेका थिए ।

आफूले पद नपाएका कारण रावलले नेपाल र दाहाललाई उचालेर पार्टीलाई फुटको बिन्दुसम्म पुर्‍याएको उनको आरोप छ । उनले दाहालले सचिवालयमा पेस गरेको १९ पृष्ठको आरोपपत्र पनि रावल र सुरेन्द्र पाण्डेले तयार गरेको र दाहालले हस्ताक्षर मात्रै गरेको दाबी गरे ।

सम्बन्धित समाचार

ललिता निवास प्रकरण : करिब ४ सय जनाविरुद्ध मुद्दा चलाउनुपर्ने सीआईबीको निष्कर्ष

प्रकाशित : माघ ७, २०७७ ०९:१६
प्रतिक्रिया
पठाउनुहोस्

टिपरको ठक्करले झापामा पैदलयात्रीको मृत्यु

पर्वत पाेर्तेल

काँकडभिट्टा — टिपरको ठक्करबाट झापामा एक जना पैदलयात्रीको ज्यान गएको छ । मेचीनगर–१३ स्थित चारआली–चन्द्रगढी सडक खण्डमा मंगलबार साँझ टिपरले ठक्कर दिँदा पैदल यात्री स्थानीय १८ वर्षीया किशोरी अंशु शिवाकोटीको मृत्यु भएको हो ।



दक्षिणबाट उत्तरतर्फ आउँदै गरेको मे १ ख २५१५ टिपरको ठक्करले पैदल यात्रीहरु स्थानीय १८ वर्षका राहुल बस्नेत र अंशु शिवाकोटी घाइते भएका थिए । बस्नेतको हात र खुट्टामा तथा शिवाकोटीको टाउको गम्भीर चोट लागेको थियो । बिर्तामोडस्थित बीएण्डसी अस्पतालमा उपचारका क्रममा शिवाकोटीको बुधबार बिहान मृत्यु भएको जिल्ला प्रहरी कार्यालय झापाका प्रवक्ता डीएसपी राकेश थापाले जनाए ।

अर्का घाइतेको उपचार जारी छ । ठक्कर दिने टिपर तथा टिपर चालक भद्रपुर ९ का ३२ वर्षीय सुमन ओझालाई पक्राउ गरी अनुसन्धान सुरु गरिएको छ । ओझालाई इलाका प्रहरी कार्यालय धुलाबारीको हिरासतमा राखेर अनुसन्धान सुरु गरिएको प्रहरीले जनाएको छ ।


प्रकाशित : माघ ७, २०७७ ०९:११
पूरा पढ्नुहोस्
प्रतिक्रिया
पठाउनुहोस्
×