नक्कली नोट छाप्‍ने सामग्रीसहित ३ जना पक्राउ- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

नक्कली नोट छाप्‍ने सामग्रीसहित ३ जना पक्राउ

भवानी भट्ट

कञ्चनपुर — कञ्चनपुर प्रहरीले नक्कली नोट छाप्‍ने सामग्रीसहित ३ जनालाई पक्राउ गरेको छ । महेन्द्रनगर बजार क्षेत्रमा नक्कली नोटको कारोबार गरिरहेकै अवस्थामा उनीहरुलाई पक्राउ गरिएको प्रहरीले जनाएको छ ।

प्रहरीले आइतबार साँझ एक भारतीयसहित २ जना र अघिल्लो दिन साँझ एक जनालाई पक्राउ गरेको हो । पक्राउ पर्नेमा भीमदत्त नगरपालिका–१८ भगतपुर बस्ने दिपक नाथ, सोहि ठाउँ बस्ने रितिका बम, भारतको बरेली घर भई भीमदत्त नगरपालिका –१८ बस्ने अनुज शर्मा रहेका छन् । उनीहरुलाई प्रहरीले सोमबार पत्रकार सम्मेलनमार्फत सार्वजनिक गरेको हो ।

नाथलाई शनिबार साँझ भीमदत्त नगरपालिका–४ गोबरियास्थित एक पसलमा नक्कली रुपैयाँको कारोबार गरिरहेको अवस्थामा पक्राउ गरेको प्रहरीले जनाएको छ । बम र शर्मालाई आइतबार साँझ महेन्द्रनगर बजारकै गल्ली नम्बर २ मा कारोबार गरिरहेको अवस्थामा पक्राउ गरिएको प्रहरीले जनाएको छ ।

उनीहरु बस्ने कोठाबाट नक्कली नोट छाप्ने कलर प्रिन्टर मेसिन, ल्यापटप, कागज, कैंची र १ हजार १३६ थान नक्कली नोटहरु बरामद गरेको जिल्ला प्रहरी कार्यालय कञ्चनपुरका एसपी मुकुन्द मरासिनीले बताए । उनका अनुसार तिनै जनाले प्रिन्टरबाट नक्कली नोट छाप्ने र बजारमा वृद्धवृद्धा तथा बालबालिकाहरुसँग कारोबार गर्ने गरेको खुलेको छ ।

‘राम्ररी नोट चिन्न नसक्नेहरुसँग कारोबार गरिएको कुरा खुल्न आएको छ,’एसपी मरासिनीले भने,‘लागूऔषधको प्रयोगकर्ताहरुसँग बढी कारोबार भएको देखिन्छ ।’ उक्त समूहले कहिलेदेखि नक्कली नोट छाप्‍ने र कारोबार गरिरहेको छ भन्ने कुरा अझै खुलेको छैन । पछिल्लो समय यो समूहबाट नक्कली नोट पाएका स्थानीयहरु सम्पर्कमा आउन थालेको मरासिनीले बताए ।

प्रकाशित : मंसिर १५, २०७७ १९:१७
प्रतिक्रिया
पठाउनुहोस्

टोकटोके जंगलमा तीन दिनदेखि डढेलो

'बस्तीको बीचमा खोला भएकाले आगो बस्तीमा पस्ने कुनै सम्भावना छैन'
आनन्द गौतम

ताप्लेजुङ — सिदिङवा गाउँपालिका–७ सुरुमखिमको टोकटोके जंगलमा तीन दिनदेखि डढेलो लागिरहेको छ । स्थानीय गौरी भट्टराईका अनुसार मंसिर १३ गते दिउँसो देखिएको आगो अझै निभेको छैन । डढेलो निकै ठूलो र धुँवाको ठूल्ठूलो मुस्लो देखिएको सिरिजंगा गाउँपालिकाका अध्यक्ष टिका गुरुङले जानकारी दिए । यो गाउँपालिकाको केन्द्र तेल्लोकबाट आगलागी भएको ठाउँ देखिन्छ ।

गौरीका अनुसार डढेलो लागेको क्षेत्र ठूलो भएकाले यहाँ नियन्त्रणका लागि जाने सम्भावना छैन । ‘यो जंगलमा बर्सेनि डढेलो लाग्छ,’ गौरीले भने, ‘आफै लाग्छ र आफै निभ्छ, यो वर्ष पनि सायदै तेस्तै होला ।’ तेल्लोक प्रहरी चौकिले आइतबार फोन गरेर सोधेको र आफूले त्यही जानकारी गराएको उनले बताए । यही जंगलको नजिकमा कायम्वा बस्ती छ । त्यहाँ चार/पाँच वटा घर भएको बालकल्याण माविका प्रधानाध्यापक यज्ञप्रसाद पौडेलले बताए । तर ती घरहरु जोखिममा नरहेको गौरीले बताए । जंगल र बस्तीको बीचमा कायङमा खोला भएकाले आगो बस्तीमा पस्ने कुनै सम्भावना नभएको उनले जानकारी दिए ।

बुरुमखिमका दिपेन्द्र लिम्बू वन्यजन्तुलाई असर परेको हुनसक्ने तर मानवीय जोखिम नरहेको बताउँछन् । विगतका वर्षमा माघ फागुनमा लाग्ने डढेलो यो वर्ष चाँडै लागेको उनले बताए । ‘हाम्रो ठीक वारिपट्टि पर्छ,’ दिपेन्द्रले भने, ‘बर्सेनि पारिपट्टि सल्केको डढेलो हेर्नुको विकल्प हुँदैन ।’ एकदमै अप्ठेरो भीर भएकाले नियन्त्रणका लागि जाने कल्पनासम्म पनि नहुने उनले बताए । तीन दिन आगो लाग्दा तीनको एक भाग जलेको हुनुपर्ने उनको अनुमान छ । ‘माथि त टुप्पैमा पुग्यो अब डाँडा काटेर गयो भने मात्रै हो,’ दिपेन्द्रले थपे, ‘नत्र नियन्त्रणमा आउँछ होला ।’ डाँडा कटेर गएपनि मानव बस्तीमा नपुग्ने उनले बताए । ‘अलैंची बगानमा पुग्छ त्यसपछि आफैं निभ्छ’ उनले भने । बर्सेनि आगलागी भएपनि कसले लगाउँछ वा आफै लाग्छ अहिलेसम्म थाहा नभएको स्थानीय बताउँछन् ।

प्रकाशित : मंसिर १५, २०७७ १९:०२
पूरा पढ्नुहोस्
प्रतिक्रिया
पठाउनुहोस्
×