धनगढी — स्थानीयको विरोधका कारण वडा कार्यालयले कब्रितास्न सिल गरेपछि धनगढी उपमहानगरपालिका–१ का ५० वर्षीय मोहम्मद जमसेदको अन्तिम संस्कार हुन पाएको छैन । दुई दिनअघि मृत्यु भएका उनको शव घरमै रहेको छ ।
मुस्लिम समुदायले आफनो धार्मिक परम्पराअनुसार अन्तिम संस्कार गर्न नपाएको भन्दै विरोध जनाएका छन् । शनिबार स्थानीय मुस्लिम समुदाय धनगढी पशुपति टोलमा रहेको मस्जिद अगाडि भेला भएका छन् । स्थानीय प्रशासनलाई दिउँसो १२ बजेभित्र कब्रिस्तानमा अन्तिम संस्कारका लागि बाटो खोल्न अनुरोध गरेका छन् ।
कात्तिक १३ गते एक जना कोरोना संक्रमितको शव नेपाली सेनाले शवको व्यवस्थापन गरेपछि स्थानीयले विरोध गरेका थिए । उक्त विरोधका कारण वडा कार्यालयले विवाद समाधान नहुन्जेलसम्मका लागि शुक्रबार वडा कार्यालयले कब्रिस्तान सिल गरेको भन्दै सूचना टाँसेको थियो ।
शुक्रबार बिहान दुवै मिर्गौला फेल भएर मोहम्मदको मृत्यु भएको थियो । समयमै मृतकको अन्तिम संस्कार गर्न नपाउँदा परिवारमा पीडामाथि पीडा थपिएको आफन्त बताउँछन् ।
‘पीडामाथि पीडा थपिएको छ,’ मृतकका छोरा सद्दामले भने, ‘पहिलेदेखि नै हाम्रा पुर्खाको अन्तिम संस्कार हुँदै आएको कब्रिस्तानमा मेरो बुवाको अन्तिम संस्कार हुन पाएको छैन, यसो किन गरिँदै छ ?’ घरमै शव राख्नु पर्दा आमा र परिवारजनमा चिन्ता थपिएको उनले बताए ।
प्रकाशित : कार्तिक १५, २०७७ १२:३४
