छाङरु र तिंकरमा खाद्यान्न ढुवानी गरिँदै

सुदूरपश्चिम सरकारले व्यासको खाद्य सामग्री पुर्‍याउन ४५ लाख बजेट निकासा गरेको छ । उद्योग, पर्यटन वन तथा वातावरण मन्त्रालयले घरेलु तथा साना उद्योग विकास समितिको कार्यालयलाई खाद्य सामग्री ढुवानीका लागि बजेट उपलब्ध गराएको व्यास गाउँपालिकाले जनाएको छ ।

स्थानीयको मागका आधारमा छाङरु र तिंकर गाउँमा खाद्यान्न ढुवानी गर्न लागिएको वडा सचिव विनोद तिंकरीले बताए । पहिलो चरणमा चामल, दाल, नुन, तेललगायत खाद्य सामग्री १ सय ८० क्विन्टल ढुवानी गरिने उनले जानकारी दिए । छाङरुमा १ सय १७ र तिंकर गाउँमा ७५ घरधुरीको बसोबास छ । यसअघि व्यासमा गत असारमा मात्रै खाद्यान्न ढुवानी गरिएको थियो ।