कैलालीको जुगेडामा बेपत्ता असई विकको शव फेला (अपडेट)- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

कैलालीको जुगेडामा बेपत्ता असई विकको शव फेला (अपडेट)

अर्जुन शाह

धनगढी — कैलालीको जुगेडास्थित अस्थायी प्रहरी चौकीका इन्चार्ज असई गोविन्द विकको शव आइतबार बिहान नेपाल–भारतको सीमा नदी मोहनामा फेला परेको छ ।

उनको हत्या गरी शव नदीमा फ्याँकिएको अनुमान गरिएको सुदूरपश्चिम प्रदेश प्रहरी कार्यालयका एसएसपी मुकेश सिंहले बताए । ‘गस्तीमा गएका प्रहरीको तस्करसँग झडप भएको हुन सक्छ,’ उनले भने । असईसँगै बेपत्ता भएका प्रहरी जवान रामबहादुर साउद भने अझै फेला परेका छैनन् । उनको खोजी जारी रहेको प्रहरीले जनाएको छ ।

जुगेडा धनगढीनजिकैको नेपाल–भारत सीमा क्षेत्र हो । त्यहाँस्थित अस्थायी प्रहरी चौकीमा कार्यरत दस प्रहरीमध्ये इन्चार्ज विक प्रहरी जवान साउदलाई लिएर शनिबार राति मोटरसाइकलमा सीमा क्षेत्रको गस्तीमा गएको प्रहरीको भनाइ छ ।

बेपत्ताको खोजीका लागि सशस्त्र प्रहरीको अत्तरियास्थित सुदूरपश्चिम वाहिनीको गोताखोर टोलीसमेत मोहना नदीमा परिचालन गरिएको प्रहरीले जनाएको छ ।

प्रकाशित : कार्तिक २, २०७७ १३:०७
प्रतिक्रिया
पठाउनुहोस्

चार वर्षपछि इलाका प्रशासनमा प्रमुख

राजबहादुर शाही

मुगु — जिल्लाको सोरु गाउँपालिकामा रहेको इलाका प्रशासन कार्यालयले चार वर्षपछि प्रमुख पाएको छ । २०७३ पुसबाट खाली रहेको प्रमुख पदमा २०७७ कात्तिक २ गतेबाट खडगबहादुर बस्नेत कामु अधिकृतको रुपमा सोरुकोट इलाका प्रशासन कार्यालयमा हाजिर भइ कामकाज सुरु गरेका छन् ।

चार वर्षसम्म प्रमुखविहीन रहेको इलाका प्रशासनमा प्रमुख बस्नेत आएपछि स्थानीय हर्षित हुँदै फूलमाला र अबिरले स्वागत गरेका छन् । ‘चार वर्षपछि इलाका प्रशासनमा प्रमुख आएपछि हामी धेरै खुशी भयौं,’ सोरु गाउँपालिकाका समाजसेवी नरबीर शाहीले भने, ‘अब नागरिकता बनाउन जिल्ला जानुपर्ने दु:ख हट्यो । गाउँमै नागरिकता पाइने भयो ।’ योसँगै सोरु गाउँपालिका वडा नम्बर १ देखि ११ सम्मका स्थानीय नागरिकता लिन जिल्ला सदरमुकाम पुग्नु पर्ने बाध्यता अन्त्य भएको छ । अब सोरुकोट इलाका प्रशासनबाटै नागरिकता पाइने भएको छ ।

२०७३ असार ३ गते स्थापना भएको इलाका प्रशासनमा अधिकृत दिलबहादुर पौडेल ६ महिनासम्म इलाकामा बसेर १ सय ५९ नागरिकता २८ प्रतिलिपि नागरिकता र २ नाबालक परिचय पत्र वितरण गरेका थिए । पौडेल सरुवा भएर गएपछि इलाका प्रशासन चार वर्षसम्म प्रमुखविहीन भइ कार्यालय सहयोगीको भरमा चल्दै आएको थियो । तत्कालको इलाका प्रशासनमा सिआइएमएस सफ्टवेयर नहुँदा नागरिकता वितरण गर्न नसकिने र सफ्टवेयर जडान गरेपछि मात्र नागरिकता वितरणको काम सुरु गरिने इलाका प्रशासन प्रमुख बस्नेतको भनाइ छ ।

विगतका वर्षमा हस्तलिपीमार्फत् नागरिकता वितरण गरिँदै आएको भएपनि नयाँ सफ्टवेयरले गर्दा हस्तलिपी हटेको उनले बताए । नागरिकता तथा राष्ट्रिय परिचय पत्र व्यवस्थापन शाखा गृह मन्त्रालयबाट उक्त सफ्टवेयर कात्तिक महिनाभित्र जडान हुने बस्नेतको भनाइ छ ।

प्रकाशित : कार्तिक २, २०७७ १३:०३
पूरा पढ्नुहोस्
प्रतिक्रिया
पठाउनुहोस्
×