कोरोना संक्रमण बढेपछि दार्चुला सदरमुकाममा निषेधाज्ञा- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

कोरोना संक्रमण बढेपछि दार्चुला सदरमुकाममा निषेधाज्ञा

मनोज बडू

दार्चुला — जिल्ला सदरमुकाम खलंगामा जिल्ला प्रशासन कार्यालयले निषेधाज्ञा जारी गरेको छ । महाकाली नगरपालिका ४ र ५ मा कन्ट्याक्ट ट्रेसिङ गरिएका ३९ जनामा कोरोना संक्रमण पुष्टि भएपछि प्रशासनले निषेधाज्ञा लगाएको हो । 

महाकाली नगरपालिकाका ४ र ५ मा संक्रमित बढ्दै गएकोले संक्रमणको जोखिम समुदायमा थप फैलिन नदिन जिल्ला प्रशासन कार्यालय दार्चुलाले महाकाली नगरपालिका ४ को सम्पूर्ण क्षेत्र र वडा नं. ५ को गल्फै, ऐरान, तल्लासैन र मोहती क्षेत्रमा निषेधाज्ञा जारी गरेको जनाएको छ । बिहीबार रातिदेखि अर्को सूचना जारी नहुँदासम्मका लागि निषेधाज्ञा लागू गरिएको निमित्त प्रमुख जिल्ला अधिकारी ज्वोत्स्ना भट्ट जोशीले बताइन् ।

यो अवधिमा आवतजावतमा पनि पूर्ण रोक लगाइएको छ । निषेधाज्ञा अवधिभर अस्पताल, औषधि पसललगायत अन्य स्वास्थ्यसम्बन्धी निकाय र सुरक्षा निकायबाहेक अन्य कार्यालयहरुबाट प्रदान गरिने सम्पूर्ण सेवाहरु कात्तिक २ गतेदेखि बन्द गरिने बताइएको छ ।

बिहीबार कोरोना पुष्टि भएकामध्ये १४ जना सशस्त्र प्रहरी ४४ नम्बर गण हेडक्वाटर दार्चुलाका सुरक्षाकर्मी, दुई जना जिल्ला कारागार दार्चुलाका कैदीहरु, तीन जना रेडक्रस दार्चुलाका र बाँकी मोहतीका स्थानीय रहेका छन् ।

प्रकाशित : आश्विन ३०, २०७७ ११:०५
प्रतिक्रिया
पठाउनुहोस्

पालुङटार नगरपालिकाले बनायो २० शय्याको आइसोलेसन कक्ष

हरिराम उप्रेती

गोरखा — पालुङटार नगरपालिकाले २० शय्याको आइसोलेसन  कक्ष तयार गरेको छ । पालुङटार नगपरपालिका–४ मालती गैरास्थित सुदर्शन आधारभूत विद्यालय भवनमा आइसोलेसन बनाइएको  स्वास्थ्य शाखाका हेल्थ असिस्टेन्ट तथा कोरोना फोकल पसर्न दिपेन्द्र गिरीले बताए ।

उक्त विद्यालयको वैकल्पिक भवन छुट्टै निर्माणाधीन रहेकाले पुरानो भवनमा आइसोलेसन बनाइएको हो ।

उक्त आइसोलेसनमा शुक्रबारबाट संक्रमित राख्ने तयारी समेत गरिएको छ । ‘आज नगर क्षेत्रका चार जनामा कोरोना पोजिटिभ देखिएको छ, होम आइसोलेसनमा बस्न असहज हुनेलाई आजबाटै आइसोलेसनमा राख्छौँ,’ उनले भने । आइसोलेसनका लागि चाहिने आधारभूत संरचना पनि निर्माण भइसकेको छ । ‘अक्सिजनलगायतका स्वास्थ्य सामग्रीको व्यवस्था गरिसकेका छौँ, खानाका लागि किचन तयार भइसक्यो,’ उनले भने,‘संक्रमितलाई उपचारमा सजिलोका लागि सीसी क्यामेरा पनि जोडेका छौँ ।’

यसअघि पालुङटार नगरपालिकामा कोरोना पोजिटिभ देखिएकालाई सदरमुकामस्थित गोरखा क्याम्पसको आइसोलेसनमा ल्याउनुपर्ने बाध्यता थियो । ‘गोरखा क्याम्पससम्म पुर्‍याउन टाढा पनि भयो, आफ्नै पालिकामा भएपछि सहज हुन्छ भनेर आइसोलेसन तयार पारेका हौँ,’ उनले भने । संक्रमितका उपचारका लागि एक–एक जना डाक्टर, अनमी र अहेव परिचालन गरिने नगरपालिकाले जनाएको छ ।

प्रकाशित : आश्विन ३०, २०७७ १०:५५
पूरा पढ्नुहोस्
प्रतिक्रिया
पठाउनुहोस्
×