बझाङमा १२ वर्षपछि नियमित उडान- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

बझाङमा १२ वर्षपछि नियमित उडान

समिट एयरले शुक्रबार र मंगलबार नियमित उडान गर्ने तालिका
वसन्तप्रताप सिंह

बझाङ — हवाई सेवा बन्द भएको १२ वर्षपछि बझाङमा नियमित उडान सुरु भएको छ । समिट एयरको विमानले मंगलबार दिउँसो धनगढी–बझाङ–धनगढीमा उडान गरेको छ ।

धनगढीबाट १८ जना यात्रु बोकेर आएको समिट एयरको ट्वीनअटर विमानले मंगलबार दिउँसो १ बजे बझाङको देवल विमानस्थलमा अवतरण गरेको थियो ।

बझाङबाट नवजात शिशुसहित २० जना यात्रु धनगढीका लागि उडेका थिए । अब समिट एयरले शुक्रबार र मंगलबार नियमित उडान गर्नेछ । यसअघि विमानस्थल कालोपत्र भएपछि समिट एयरकै विमानले असोज १७ मा बझाङमा सफल परीक्षण उडान गरेको थियो । परीक्षण उडानका क्रममा पर्यटनमन्त्री योगेश भट्टराईलगायत बझाङका सांसद, नेता त्था नागरिक उड्डयन प्राधिकरणका अधिकारी पनि बझाङ आएका थिए ।

लामो समयपछि हवाई सेवा नियमित भएको भन्दै स्थानीय खुसी भएका छन् । ‘बसमा गएको भए पूरै दिन लाग्थ्यो । जहाजले २२ मिनेटमै धनगढीबाट बझाङ पुर्‍यायो,’ धनगढीबाट बझाङ आएकी देवकी थापाले भनिन्, ‘यस्तो सुविधा अब बन्द नहोस् ।’

नियमित हवाई सेवा सुरु भएपछि यहाँको पर्यटन प्रवद्र्धनमा पनि ठूलो योगदान पुग्ने अपेक्षा गरिएको स्थानीय जनप्रतिनिधिको भनाइ छ । ‘अब एकै दिनमा काठमाडौंबाट बझाङ पुगिने भएको छ,’ छबीसपाथीभेरा गाउँपालिका–१ का वडाध्यक्ष नयन बोहराले भने, ‘आकर्षक गन्तव्य हुँदाहुँदै पनि कष्टकर यात्रा गर्नुपर्ने डरले बझाङ आउन नसकेकाहरूलाई हवाई सेवाले ठूलो राहत दिनेछ ।’

यसैबीच हवाई सेवा नियमित भए पनि भाडा भने अचाक्ली महँगो भएको स्थानीयले गुनासो गरेका छन् । नागरिक उड्डयन प्राधिकरणले तोकेको एकतर्फी भाडा ४ हजार ९ सय रुपैयाँ सर्वसाधारणका लागि महँगो भएको उनीहरूको भनाइ छ ।

विमानस्थल कालोपत्र भएपछि अन्य विमान कम्पनीले पनि बझाङ आउन चासो देखाइरहेकाले प्रतिस्पर्धा भएपछि भाडादर केही कम हुन सक्ने नागरिक उड्डयन प्राधिकरणका उपप्रबन्धक मोहन गिरीले बताए । २०३५ सालमा कच्ची विमानस्थल निर्माण सम्पन्न भएपछि पहिलो पटक तत्कालीन शाही नेपाल वायुसेवा निगमले साप्ताहिक उडान थालेको यो विमानस्थल २०६५ सालसम्म सञ्चालनमा थियो ।

प्रकाशित : आश्विन २७, २०७७ २०:५०
प्रतिक्रिया
पठाउनुहोस्

संघीय मामिला मन्त्रालयका दर्जन बढी कर्मचारी संक्रमित

कान्तिपुर संवाददाता

काठमाडौँ — संघीय मामिला तथा सामान्य प्रशासन मन्त्रालयका दर्जन बढी कर्मचारी कोरोना संक्रमित पाइएका छन् । मन्त्रालय स्रोतका अनुसार सचिव सूर्यप्रसाद गौतम सहित १६ जना कर्मचारीमा कोरोना पोजिटिभ देखिएको छ ।

मन्त्रालयका १ सय ६३ जना कर्मचारीको गत शुक्रबार स्वाब संकलन गरिएको थियो । मंगलबार त्यसमध्ये १ सय ४० जनाको रिपोर्ट आएकोमा कोरोना पोजिटिभ देखिएकाको संख्या दर्जनबढी पाइएको छ ।

केही साता अगाडि मन्त्रालयका प्रवक्ता सह-सचिव वसन्त अधिकारी र उनको सचिवालयमा कार्यरत एकजना कर्मचारी कोराना संक्रमित भएका थिए । त्यसपछि सामूहिक रुपमा सबै कर्मचारीको परीक्षण गरिएको हो ।

सह-सचिव अधिकारी भने निको भएर मन्त्रालयको कामकाजमा फर्किसकेका छन् । तर, मन्त्रालयमा संक्रमितको संख्या बढी देखिएपछि धेरैजसो कर्मचारीले आफूलाई आइसोलेसनमा राखेका छन् । मन्त्री हृदयश त्रिपाठीको स्वास्थ्यमा देखिएको अन्य समस्याका कारण अस्पतालमा भर्ना छन् ।

उनको पित्त थैलीमा भएको पत्थरीको शल्यक्रिया गरिएको छ । उनी सोमबार साँझबाट ग्रान्डी अस्पतालमा भर्ना छन् । त्यसबाहेक सचिव र धेरैजसो कर्मचारी आइसोलेसनमा बसेपछि मन्त्रालयको कामकाज करिब करिब ठप्प हुन पुगेको छ ।

कोरोना पोजिटिभ आएका कर्मचारीहरुमा कुनै विशेष लक्षण नदेखिएको र उनीहरुको स्वास्थ्य सामान्य रहेको मन्त्रालय स्रोतले उल्लेख गरेको छ ।

प्रकाशित : आश्विन २७, २०७७ २०:४५
पूरा पढ्नुहोस्
प्रतिक्रिया
पठाउनुहोस्
×