घरघरमै स्वास्थ्य परीक्षण- सुदूरपश्चिम - कान्तिपुर समाचार

घरघरमै स्वास्थ्य परीक्षण

गणेश चौधरी

टीकापुर — कोरोना महामारीका बेला टीकापुर नगरपालिकाको ७ नं वडा कार्यालयले आफ्ना नागरिकलाई घरमै स्वास्थ्य परीक्षणको व्यवस्था मिलाएको छ । 

स्वास्थ्य चौकीमा भिडभाड हुने र संक्रमणको जोखिम बढी हुने भएकोले घरमै स्वास्थ्यकर्मीले सामान्य जाँचका साथै स्वास्थ्य शिक्षा दिने व्यवस्था गरिएको वडाध्यक्ष रामलाल डगौरा थारुले बताए । ‘जेष्ठ नागरिक, अपांग तथा बालबालिकाहरुलाई लक्षित गरी घरदैलो स्वास्थ्य परीक्षण कार्यक्रम संचालन गरेका हौं’ उनले भने, ‘अरुले अस्पतालमा गएर स्वास्थ्य जॉच गराउन सक्ने भए पनि शारीरिक रुपमा अलि कमजोर हुने भएकालाई प्राथमिकतामा राखेर सेवा संचालन गरेका हौं ।’

वडाका सबै घरमा गएर नागरिकको स्वास्थ्य समस्या बुझ्ने र सामान्य उपचारका लागि एक अनमी खटाइएको वडाध्यक्ष थारुले बताए । उनका अनुसार स्वास्थ्यलाई संविधानमा नै मौलिक हकका रुपमा व्यवस्था गरिएपछि जनताको हक कार्यान्वयनका लागि पनि यो कार्यक्रम सुरु गरिएको हो ।

घरदैलो स्वास्थ्य परीक्षण कार्यक्रम यो आर्थिक वर्षभरी निरन्तर सञ्चालन रहने जनाइएको छ ।

अनमी शान्ति ढुंगाना नेपालीले भनिन्, ‘घरदैलोमै स्वास्थ्य सेवा पाउँदा नागरिक खुसी छन् ।’ घरमै उपचार हुन नसक्ने खालका बिरामीलाई उपचारका लागि अस्पताल जान सल्लाह दिने गरिएको उनले बताइन् ।


प्रकाशित : आश्विन ९, २०७७ २०:१४
प्रतिक्रिया
पठाउनुहोस्

कैलालीको भजनी फेरि डुबानमा

गणेश चौधरी

टीकापुर — केही दिनअघि मात्र बाढीको चपेटामा परेको कैलालीको भजनी नगरपालिकाका बस्ती सोमबार फेरि डुबानमा परेका छन् । आइतबार रातिदेखिको अविरल वर्षाले उर्लिएका मोहना, काढा र पथरैया नदी बस्ती पसेका हुन् ।

यसअघिको बाढीले डुबानमा परेकाहरू ३/४ दिन अघि मात्र घर फर्केका थिए । फेरि पुन डुबान भएपछि उनीहरू हुलाकी राजमार्गका अग्ला ठाउँमा आउन थालेका स्थानीय जयराज ढुंगानाले जानकारी दिए । उनका अनुसार भजनी नगरपालिका–८ सोनहाफाटा खल्ला टोलका ४०, काढाढिकका ५२ र कृष्णनगरका २५ परिवार विस्थापित भएका छन् ।

भजनी नगरपालिकाका प्रमुख शेरबहादुर चौधरीले धनगढीबाट आउने मोहना, घोडाघोडीबाट आउने कन्द्रा र लम्कीचुहाबाट आउने पथरैया नदीलगायतको पानी भजनीमा आउने भएकाले यो ठाउँ बाढीबाट बढी प्रभावित भएको बताए । ‘केही दिनअघिको बाढीमा ३ जनाको ज्यान जानुका साथै ठूलो नोक्सानी भएको छ । आज पनि बाढी आएकाले उद्धारमा खटिएका छौं,’ उनले भने ।

साउन १४ गतेको बाढीका कारण भजनी नगरपालिकाका करिब २ हजार परिवार विस्थापित भएका थिए । बाढीकै कारण भजनीमा करिब ७० प्रतिशत धानबाली नष्ट भएको जनाइएको छ ।

मौसम विज्ञान विभागले वर्षा अझै जारी रहने भएकाले तटीय क्षेत्रका नागरिकलाई सुरक्षित स्थानमा बस्न सूचना गरेको छ । विभागले कर्णाली चिसापानी, टीकापुर, भजनी क्षेत्रका साना तथा ठूला नदीमा पानीको बहाव बढ्न सक्ने जनाएको छ ।

प्रकाशित : श्रावण २६, २०७७ १०:४९
पूरा पढ्नुहोस्
प्रतिक्रिया
पठाउनुहोस्
×