संक्रमण नदेखिएका स्थानीय तहमा विद्यालय सञ्चालनको तयारी- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

संक्रमण नदेखिएका स्थानीय तहमा विद्यालय सञ्चालनको तयारी

मनोज बडू

दार्चुला — जिल्लाको अपीहिमाल र दुहु गाउँपालिकाले असोज सुरुबाट विद्यालय सञ्चालन गर्ने तयारी गरिरहेका छन् । कोरोना संक्रमणका कारण बन्द रहेका विद्यालय स्वास्थ्य सुरक्षाका मापदण्ड अपनाएर सञ्चालनमा ल्याउने तयारी थालेका हुन् । गाउँपालिकामा अहिले कोरोना संक्रमित नदेखिएको भन्दै विद्यालय सञ्चालनको तयारी भएको हो ।

शिक्षण सिकाई क्रियाकलापलाई सहज बनाउन स्वास्थ्य सुरक्षाका मापदण्ड अपनाइ असोज ८ गतेदेखि विद्यालय खोल्ने तयारी भएको दुहु गाउँपालिकाका अध्यक्ष पुलेन्द्रबहादुर कार्कीले जानकारी दिए । ‘सबै सुरक्षा मापदण्ड अपनाएर शिक्षण संस्था सञ्चालनको तयारी गरिँदैछ,’ उनले भने, ‘सुरक्षा सामग्री गाउँपालिकाले उपलब्ध गराउने छ ।’ विद्यालयका शिक्षकहरुलाई सुरक्षा सतर्कता पूर्ण रुपमा अपनाउन भनिएको उनको भनाइ छ ।

स्वास्थ्य सुरक्षाका.मापदण्ड अपनाएर भौतिक सामाजिक दूरी कायम गरी सिफ्ट अनुसार कक्षा सञ्चालन हुने गाउँपालिकाका शिक्षा शाखा प्रमुख हेमराज जोशीले बताए । विकट क्षेत्रमा अन्य माध्यमबाट विद्यार्थीको पढाई सञ्चालन गर्न नसकिने देखिएपछि नियमित कक्षा सञ्चालन सुरु गर्ने तयारी भइरहेको हो । पाठ्यक्रम विकास केन्द्रले तयार पारेका पाठ्यक्रम विद्यालयमा पढाइ सुरु गरिने उनले बताए ।

लामो समयदेखि विद्यालय बन्द हुँदा विद्यार्थीहरुमा नकारात्मक असर परेकाले विद्यालय सञ्चालनको तयारी भएको स्थानीय तहले जनाएका छन् । गत चैतदेखि बन्द रहेका विद्यालयहरु खुल्न नसक्दा विद्यार्थीको पठनपाठनमा समस्या भएको छ । अहिले हरेक स्थानीय तहले वैकल्पिक शिक्षण विधिको उपाय खोज्न थालेका छन् ।

सदरमुकाम खलंगास्थित महाकाली नगरपालिकाले सिकाई सहजीकरण कार्ययोजना पेश गर्न सबै विद्यालयलाई निर्देशन गरेको छ । निमित्त प्रमुख प्रशासकीय अधिकृत नरसिंह बडालले विद्यार्थी सिकाइ सहजीकरण निर्देशिका २०७७ अनुसार विद्यालयले आफ्नो सेवा क्षेत्रभित्रका सबै बालबालिकाहरुलाई विद्यालय अथवा विद्यालयबाहिर सिकाई केन्द्र रहने गरी कार्ययोजना असोज ९ गतेभित्र पेश गर्न भनेको छ । सिकाई सहजिकरणका लागि स्थानीय अभिभावकको कम्तीमा ५० प्रतिशत उपस्थितिसहितको कार्ययोजना पेश गर्नुपर्ने छ ।

अपिहिमालमा वैकल्पिक शिक्षण सुरु

अपिहिमाल गाउँपालिकाले सोमबारबाट वैकल्पिक शिक्षण सिकाई कार्यक्रम सञ्चालन गरेको छ । हाल गाउँपालिकामा कोरोना संक्रमण नदेखिएपनि सरकारले तत्काल विद्यालय खोल्न अनुमति नदिँदा गाउँपालिकाले विद्यालयहरुमा वैकल्पिक शिक्षण सिकाई कार्यक्रम सञ्चालन गर्ने निर्णय गरेको गाउँपालिका अध्यक्ष धर्मानन्द मन्यालले जानकारी दिए ।

सबै विद्यालयका प्रधानाध्यापक एवं शिक्षा शाखाको संयुक्त बैठकले सोमबारबाट वैकल्पिक शिक्षण विधिबाट शिक्षण सिकाई कार्यक्रम सञ्चालन गर्ने निर्णय भएको हो । विद्यालयमा विद्यार्थीहरुको सामाजिक भौतिक दूरी कायम गर्ने, मास्कको प्रयोग तथा स्वास्थ्य सुरक्षाका मापदण्ड अपनाएर वैकल्पिक शिक्षण गर्न निर्देशन दिइएको उनले बताए ।

प्रकाशित : आश्विन ५, २०७७ २०:५०
प्रतिक्रिया
पठाउनुहोस्

सहकारीले १४.७५ प्रतिशतभन्दा बढी ब्याज लिन नपाइने

कान्तिपुर संवाददाता

काठमाडौँ — अब सहकारी संघसंस्थाले कर्जा प्रवाह गर्दा १४.७५ प्रतिशतभन्दा बढी ब्याज लिन नपाउने भएका छन् । सन्दर्भ ब्याजदर निर्धारण तथा सिफारिस समितिले सोमबार उक्त निर्णय गरेको हो । 

यसअघि यस्तो सन्दर्भ ब्याजदर १६ प्रतिशत थियो । सो व्यवस्था परिमार्जन गरि नयाँ सन्दर्भ दर तोकिएको हो । यो व्यवस्था २०७७ कात्तिक १५ देखि लागू हुने सहकारी विभागले जनाएको छ ।

सहकारी संस्थाहरूले आफूखुसी जथाभावी बढी ब्याज लिँदै आएकाले त्यसलाई नियन्त्रण गर्न भन्दै समितिले ०७६ साउन १९ देखि १६ प्रतिशत सन्दर्भ ब्याजदर तोकेको थियो । अहिले सोही दरलाई परिमार्जन गरिएको छ ।

सन्दर्भ ब्याज पुनरावलोकन गरिए पनि सबै सहकारीले पालना गरेका छैनन् । विभागले भने सबै सहकारी संस्थाले सन्दर्भ ब्याजदर पालना गरेको दाबी गरेको छ । तर, काठमाडौं र ललितपुर जिल्लामा रहेका अधिकांस सहकारीले सन्दर्भ ब्याजदर पालना नगरेको स्रोतले बताएको छ ।

अब सहकारी संस्थाले बचतमा अधिकतम् ८.७५ प्रतिशतभन्दा बढी ब्याज दिन नपाउने भएका छन् । कर्जा र बचतको ब्याजअन्तर ६ प्रतिशत भन्दा कम हुनु पर्ने व्यवस्थाको कारण सहकारीले बचतमा पनि धेरै ब्याज दिन नपाएका हुन् ।

सहकारी विभागको रजिष्ट्रारको संयोजकत्वमा सन्दर्भ ब्याजदर निर्धारण समिति गठन गरिएको छ । सोही समितिले पहिलो पटक सन्दर्भ ब्याजदर परिमार्जन गरेको हो । राष्ट्र बैंकले लघुवित्त वित्तीय संस्थालाई अधिकतम् ब्याजदर सीमा १५ प्रतिशत कायम गरेपछि सहकारीमा सो भन्दा कम ब्याजदर कायम गर्ने दबाब थियो । सोहीकारण समितिले सन्दर्भ दर परिमार्जन गरेको हो ।

प्रकाशित : आश्विन ५, २०७७ २०:४७
पूरा पढ्नुहोस्
प्रतिक्रिया
पठाउनुहोस्
×