हिरासतमा मृत्यु प्रकरण : आफन्तद्वारा दिनहुँ प्रदर्शन

गत शुक्रबार जिल्ला प्रहरी कार्यालय कैलालीको थुनुवा कोठाभित्र आत्महत्या गरेको भनिएका धनगढी उपमहानगरपालिका–५ का १९ वर्षीय रोशन विकको मृत्यु कुटपिटबाट भएको परिवारको दाबी छ । छानबिनबाट सत्यतथ्य बाहिर ल्याउनुपर्ने माग गर्दै उनीहरूले दिनहुँ प्रदर्शन गर्दै आएका छन् । विकलाई मोबाइल चोरीको अभियोगमा प्रहरीले भदौ २२ पक्राउ गरी हिरासतमा राखेको थियो । पाँचांै दिन बिहान उनले आत्महत्या गरेको खबर प्रहरीले सार्वजनिक गरेको थियो ।

भाइको अनुहारभरि घाउचोट रहेको, नाकबाट रगत बगेको र घाँटीमा चोट रहेको मृतकका दाजु रवि विकले बताए । ‘प्रहरीकै कुटपिटबाट मृत्यु भएको हो,’ उनले भने । घटनाको छानबिन गर्न सुदूरपश्चिम प्रदेश प्रहरी कार्यालयले प्रदेश प्रहरी गण मुख्यालयका एसपी राजीव बस्नेतको संयोजकत्वमा चार सदस्यीय छानबिन समिति गठन गरेको थियो । समितिले छानबिन गरिरहेको प्रदेश प्रहरी कार्यालयका एसएसपी मुकेश सिंहले बताए । ‘पाँच दिनको म्याद दिएका हौं,’ उनले भने, ‘बिहीबार छानबिनको प्रगतिबारे जानकारी माग्छौं ।’