दार्चुलाको खलंगा र जौलजिवी नाका ३ दिनका लागि खुला

मनोज बडू

दार्चुला — भारतको पिथौरागढ जिल्लासित सीमा जोडिएका दार्चुलाको जौलजिवी र सदरमुकामको खलंगा झोलुंगे पुल बुधबारबाट खुलेका छन् । भारतमा पेन्सन बुझ्ने नेपाली र दुवैतर्फ अलपत्र परेकालाई आवतजावत गर्न दिनेगरी तीन दिनका लागि झोलुंगे पुल खोलिएको हो ।

लकडाउनका कारण गत चैत ११ गतेदेखि नेपाल–भारत जोड्ने सीमानाका बन्द हुँदा भारतीय भूतपूर्व सैनिकहरुले पेन्सन बुझ्न सकिरहेका थिएनन् । लामो समयदेखि अन्तर्राष्ट्रिय नाका बन्द हुँदा भारतीय पेन्सनरहरुलाई धेरै समस्या भएकाले नाका खोलिएको जिल्ला प्रशासनले जनाएको छ ।

जिल्ला प्रशासनले जारी गरेको सूचनामा बिहान ९ बजेबाट दिउँसो १ बजेसम्म र दिउसो ३ देखि बेलुका ६ बजेसम्म पुल खुला रहने जनाए पनि खलंगाको झोलुंगे पुल बिहान ११ बजेदेखि १२ बजेसम्म मात्रै खुला गरिएको थियो । अब फेरि ३ बजे नाका खुला गरिने जिल्ला प्रशासनका नायब सुब्बा पदमराज भट्टले बताए ।

त्यस्तै मालिकार्जुन गाउँपालिका ७ जौलजिवीस्थित नेपाल–भारत जोड्ने झोलुंगे पुल पनि खुला गरिएको छ । जिल्लाका अन्य स्थानीय तहभन्दा मालिकार्जुन र लेकम गाउपाँलिकामा भारतीय भूपू सैनिक बढी रहेका छन् ।

त्यस्तै सीमामा अलपत्र परेका मानिसहरुलाई नेपाल आउन चाहने र भारत जान चाहनेहरुलाई पनि दुवैतिरका प्रशासनको समन्वयमा नाका खोलिएको हो । जिल्ला प्रशासन कार्यालय दार्चुलाले भारतको पिथौरागढ प्रशासनलाई पत्राचार गरेर तीन दिनलाई पुल खुला गर्न आग्रह गरेको थियो । जिल्लाका केही स्थानीय तहले जिल्ला प्रशासनलाई भारतीय पक्षसँग आग्रह गर्न पत्राचार गरेका थिए ।

सम्बन्धित समाचार

प्रकाशित : असार २४, २०७७ १३:४७
प्रतिक्रिया
पठाउनुहोस्

कोरोना भाइरस हावाबाट सर्छ भन्ने कुरालाई नकार्न सकिँदैन : विश्‍व स्वास्थ्य संगठन 

एजेन्सी

जेनेभा — कोरोना भाइरस हावाबाट सर्ने भन्ने तथ्यलाई नकार्न नसकिने विश्व स्वास्थ्य संगठन(डब्लूएचओ)ले बताएको छ । डब्लूएचओले हावामा रहने साना कणमार्फत कोरोना भाइरस फैलिन सक्ने प्रमाण देखिँदै गएकाले यो तथ्यलाई स्वीकार गरेको हो । 

भीडभाड हुने ठाउँ, बन्द कोठा वा हावा पास नहुने ठाउँमा हावाबाट कोरोनाको संक्रमण सर्दैन भनेर भन्न नसकिने डब्लूएचओको कोरोनाभाइरस संक्रमण नियन्त्रण विभागकी प्रमुख प्राविधिक डा. बेनेडेटा अलेग्रान्जीलाले बताइन् ।

डब्लूएचओका अधिकारीहरुका अनुसार यसको शतप्रतिशत प्रमाण जुटाउन र बुझ्न अझै समय लाग्ने र यसको खोजका लागि काम जारी राखिएको छ ।

हावाका साना कणमा पुगेको कोरोना भाइरसबाट पनि मानिसमा संक्रमण हुन सक्ने केही वैज्ञानिकहरुले दाबी गरेका थिए । उनीहरुले कोरोना भाइरससम्बन्धी निर्देशिका संशोधन गर्न आग्रह समेत गरेका थिए ।

सोमबार कोरोना भाइरसबारे अनुसन्धान गरिरहेका विभिन्न ३२ देशका २३९ वैज्ञानिकहरुले डब्लूएचओलाई यसबारे खुलापत्र पठाएका थिए । यदि यो कुराको आधिकारिकता पुष्टि भएमा कोरोना भाइरस रोकथामसम्बन्धी निर्देशिका परिवर्तन गर्नुपर्ने चिकित्सकहरुले बताएका छन् ।

डब्लूएचओका अनुसार कोरोना भाइरस संक्रमित व्यक्तिले हाच्छयुँ वा खोक्दा नाक वा मुखबाट निस्किने छिटाबाट अर्को व्यक्तिमा सर्ने बताउँछ । तर वैज्ञानिकहरु कोरोना भाइरसको संक्रमण फैलनुमा यसलाई मात्र कारक मान्‍न तयार छैनन् ।

यदि यो पुष्टि भएको खण्डमा मास्क प्रयोगमा व्यापकता गर्ने, सार्वजनिक यातायात, बार, रेस्टुरेन्टलगायतका भीड हुने ठाउँमा सामाजिक दूरीको कडा पालना गर्नुपर्ने चिकित्सकहरुको सुझाव छ ।

प्रकाशित : असार २४, २०७७ १३:१७
पूरा पढ्नुहोस्
प्रतिक्रिया
पठाउनुहोस्
×