डडेलधुरामा सुरु भयो कोरोना परीक्षण

डीआर पन्त

डडेलधुरा — सुदूरपश्चिम प्रदेशमा धनगढी बाहिर पनि कोभिड-१९ परीक्षण सुरु गरिएको छ । नागरिक स्तरबाट चन्दा संकलन गरेर डडेलधुरा अस्पतालमा ल्याइएको पीसीआर मेसिनबाट बिहीबारदेखि स्वाब परीक्षण गर्न थालिएको हो ।

डडेलधुरा अस्पतालमा स्थापना भएको कोरोना संक्रमण परीक्षण मेसिन पीसीआरका निरीक्षण गर्दै धनगढी प्रयोगशालाबाट आएका एक प्राविधिक । तस्बिरः कान्तिपुर

हृयुमनिटी फाउन्डेशन र सुदूरपश्चिम अमेरिकी समाजको सहयोगमा डडेलधुरा अस्पतालमा पीसीआर मेसिन सञ्‍चालनमा ल्याइएको हो । ‘पहिलो दिन ९ जनाको स्वाब परीक्षण गरिएको छ,’ डडेलधुरा अस्पतालका प्रयोगशाला प्रमुख ईश्वरी भुसालले भने, ‘परीक्षण गरिएका सबै स्वाब थप पुष्टिका लागि सेती प्रादेशिक अस्पतालमा पठाइने छ ।’ पीसीआर मेसिन स्थापना पछि पहिलो परीक्षण भएका कारण यसको गुणस्तर पुष्टिका लागि धनगढी पठाउन लागिएको उनले जानकारी दिए ।

यसअघि बुधबार राजधानीबाट आएका विशेषज्ञ इन्जिनियर, सेती प्रादेशिक अस्पतालका प्रयोगशाला प्रमुख रमेश शाही र डडेलधुरा अस्पतालका प्रयोगशाला प्रमुख भुसालसहितको प्राविधिक टोलीले पीसीआर मेसिनको गुणस्तर परीक्षण गरेका थिए । धनगढीमा परीक्षण भइसकेका स्वाबको पुनः डडेलधुरामा स्थापना भएको पीसीआर मेसिनमा परीक्षण गरिएको थियो ।

नागरिक स्तरबाट चन्दा उठेको ९६ लाखको लगानीमा डडेलधुरामा उक्त प्रयोगशाला स्थापना गरिएको हो । तीन साता अघि हृयुमनीटी फाउन्डेशनले कैलालीबाट सुरु गरेको उक्त अभियानमा देश विदेशमा रहेका धेरै सुदूरपश्चिमेलीले चन्दा प्रदान गरेका थिए । ‘तीन हप्ताको छोटो अवधिमा डडेलधुरामा पीसीआर मेशिन स्थापना गर्न सफल भएका हौं,’ फाउन्डेशनका सदस्य दीर्घराज उपाध्यायले भने, ‘सुदूरपश्मिका सात पहाडी जिल्लाका जनताका लागि यसले धेरै सहजता प्रदान गर्ने छ ।’

डडेलधुरामा स्थापना भएको कोरोना परीक्षण ल्याबले एक दिनमा ३ सय ८४ जनाको परीक्षण गर्ने क्षमता राख्छ भने एउटा सिफ्टमा ९६ जनाको नमूना परीक्षण हुने प्रयोगशाला प्रमुख ईश्वरी भुसालले जानकारी दिए । बिहीबार परीक्षण गरिएका स्वाबको सेती प्रादेशिक अस्पतालमा पुनः परीक्षण गरेपछि नियमित रुपमा डडेलधुरा अस्पतालमा नमुना परीक्षण हुने पनि उनले जानकारी गराए । ‘बिहीबारदेखि नै नियमित परीक्षण सुरु भइसकेको हो,’ भुसालले भने, ‘सेती प्रादेशिक अस्पतालमा रहेको चाप पनि कम हुने र पहाडी जिल्लामा संकलित नमुना डडेलधुरामा हुन थालेपछि नतिजा पनि छिटो प्राप्त हुने छ ।’

प्रयोगशालाको सञ्‍चालन खर्च भने डडेलधुराका स्थानीय तहले सहयोग गर्ने छन् । दुई हप्ता अघि डडेलधुराका सातवटै स्थानीय तह र जिल्ला समन्वय समितिले ल्याब सञ्चालनका लागि आवश्यक बजेटको व्यवस्थापन गर्ने जिम्मा लिएका थिए ।

प्रकाशित : असार १८, २०७७ १६:१६
प्रतिक्रिया
पठाउनुहोस्

नेकपा स्थायी कमिटी बैठक फेरि सुरु

कान्तिपुर संवाददाता

काठमाडौँ — केही घन्टा स्थगित भएको सत्तारुढ नेकपाको स्थायी कमिटी बैठक फेरि सुरु भएको छ । बिहीबारको मन्त्रिपरिषद् बैठकले संसद् अधिवेशन अन्त्य गर्न राष्ट्रपतिलाई सिफारिस गरेको निर्णयपछि बैठक केहीबेरलाई स्थगित भएको थियो । बैठकमा सहभागी एक नेताका अनुसार अहिले अध्यक्ष पुष्पकमल दाहाल बोल्दैछन् । 

बैठक स्थगित भएपछि प्रधानमन्त्री एवं अर्का अध्यक्ष केपी शर्मा ओली र अध्यक्ष दाहालबीच केहीबेर छलफल भएको थियो ।

छलफल सकारात्मक नभएपछि दाहाल राष्ट्रपति विद्यादेवी भण्डारीलाई भेट्न शीतल निवास पुगेका थिए । उनी फर्केपछि बैठक सुरु भएको हो । बैठकमा प्रधानमन्त्री एवं नेकपा अध्यक्ष ओली भने उपस्थित छैनन् । ओलीले बैठक स्थगित गरेर नेताहरूबीच छलफल हुनुपर्ने बताएका थिए ।

बिहीबार दिउँसो बसेको मन्त्रिपरिषद् बैठकको सिफारिसअनुसार राष्ट्रपतिले संसद्को चालु अधिवेशन अन्त्य गरेकी छन् ।

प्रकाशित : असार १८, २०७७ १६:१०
पूरा पढ्नुहोस्
प्रतिक्रिया
पठाउनुहोस्
×