बैतडीको क्वारेन्टाइनमा मृत्यु भएकी महिलाको पीसीआर रिपोर्ट नेगेटिभ

लकडाउन र पैसा अभावले दमको औषधि खान पाइनन् : श्रीमान्
तृप्ति शाही

बैतडी — बैतडीको क्वारेन्टाइनमा मृत्यु भएकी महिलाको कोरोना रिपोर्ट नेगेटिभ आएको छ । पुर्चौडी नगरपालिका–४ स्थित मालिका माविको क्वारेन्टाइनमा बसेकी २२ वर्षीया कमला लुहारको मंगलबार मृत्यु भएको थियो ।

उनीसँगै रहेका उनका १८ महिनाका छोरा, श्रीमान् र अन्य एक जना पुरुषको पनि पीसीआर रिर्पोट नेगेटिभ आएको स्वास्थ्य कार्यालयका प्रमुख योगेश भट्टले बताए । क्वारेन्टाइनमै मृत्यु भएपछि महिला र उनीसँगै रहेका उनका छोरा, श्रीमान् र अन्य एक जना गरी ४ जनाको स्वाब संकलन गरी सेती अस्पताल धनगढी पठाइएको थियो ।

मृतक महिलाको रिपोर्ट नेगेटिभ आएपछि क्वारेन्टाइनमै राखिएको शव आफन्तको जिम्मा लगाइएको प्रमुख भट्टले बताए ।

भारतको पञ्जाबबाट मृतक महिलाको परिवार जेठ १६ गते गौरीफन्टा नाका भएर घर फर्किएको थियो । १८ गतेबाट उनी क्वारेन्टाइनमा बसेकी थिइन् । स्वास्थ्यकर्मीहरुका उनुसार उनी दमको बिरामी थिइन् । एक वर्ष यताबाट नियमित औषधि सेवन गरिरहेकी उनले लकडाउन र पैसा अभावले औषधि खान नपाएकी मृतकका श्रीमान् हरिश लुहारले बताए । मृतकका ३ छोरोछोरी छन् ।

प्रकाशित : जेष्ठ २२, २०७७ ११:०६
प्रतिक्रिया
पठाउनुहोस्

सिन्धुली अस्पतालमा उपकरण खरिदमा अनियमितताको आरोप

राजकुमार कार्की

सिन्धुली — सिन्धुली अस्पतालमा भएको उपकरण खरिदमा अनियमितता गरेको भन्दै अख्तियार दुरुपयोग अनुसन्धान आयोगमा उजुरी दर्ता भएको छ ।

उपकरण खरिदको बोलपत्रको सूचनाका आधारमा छनौट भएका पाँच सप्लायर्समध्ये कमदर रेटका पहिलो, दोस्रो र तेस्रोलाई पन्छाएर प्रलोभनमा परि चौथोलाई छनौट गरिएकाले लाखौं रकम भ्रष्टाचार भएको भन्दै अख्तियार कार्यालय टंगाल काठमाडौंमा उजुरी परेको हो । लकडाउनको मौका छोपी आपूर्तिकर्ताहरुलाइ थाहै नदिई प्राविधिक मूल्यांकनको नाममा प्रलोभनमा परि बढी दररेटमा उपकरण आपूर्ति गर्ने कम्पनी छनौट भएको भन्दै भन्दै नारायण क्षत्रीले अख्तियारमा उजुरी गरेका हुन् ।

अस्पताल विकास समितिका अध्यक्ष प्रल्लाद पोखरेल, मेडिकल सुपरिटेन्डेन्ट डाक्टर लक्ष्मण खड्का र बायोमेडिकल इन्जिनियर राजन डाँगीले बोलपत्रको सूचना बमोजिम कमदर रेटको सप्लायर्सलाई पन्छाएर प्रलोभनमा परि बढि दररेटेको छनौट गरेको भन्दै उजुरीमा कारबाहीको माग गरिएको छ । सिन्धुली अस्पतालले गत फागुन १ गते ७ दिने सूचना प्रकाशित गरी उपकरण खरिदको बोलपत्र आह्वान गरेको थियो ।

कम दररेटमा उपकरण सप्लाइ गर्ने लुम्बिनी हेल्थ केयरलाई पन्छाएर बढी दररेटको मेडेक्टा्रेनिक्स प्रालिलाई छनौट गरिएको उजुरीमा उल्लेख गरिएको छ । लुम्बिनीले २४ लाख ७३ हजार ५ सय ७० र मेडिटा्रेनिक्स नेपाल प्रालिले ३१ लाख ९८ हजारमा उपकरण आपूर्तिको प्रस्ताव गरेका थिए । यी दुई कम्पनीको फरक ७ लाख २४ हजार ४ सय ३० छ । उपकरण आपूर्तिका लागि ७ वटा कम्पनीले प्रस्ताव पेस गरेकोमा पाँच वटा कम्पनी छनौट भएका थिए । दुवै कम्पनीले दक्षिण कोरिया र कोरियाका कम्पनीको ब्राण्डअनुसारको उपकरण सप्लाई गर्ने प्रस्तावमा उल्लेख छ ।

अस्पताललाई चाहिने उपकरणको सूची आफूहरुले दिएको र क्याटलग विधिबाट बायोमेडिकल इन्जिनियरले सबै खरिद प्रक्रिया कानुनसम्मत गरेको सिन्धुली अस्पतालका अध्यक्ष प्रल्लाद पोखरेलले बताए । वाग्मती प्रदेशको सामाजिक विकास मन्त्रालयले उपकरण खरिदका लागि रकम पठाएको थियो ।


प्रकाशित : जेष्ठ २२, २०७७ ११:०१
पूरा पढ्नुहोस्
प्रतिक्रिया
पठाउनुहोस्
×