बैतडीका संक्रमित डिस्चार्ज, अस्पतालबाट सिधै थुनामा

जिल्ला अस्पतालका प्रमुख वसन्तराज जोशीका अनुसार उनी भर्ना भएको १३ दिनमा निको भएका हुन् । २४ घण्टाको फरकमा उनका दुईवटा रिपोर्ट नेगेटिभ आएपछि उनलाई अस्पतालले डिस्चार्ज गरेको जोशीले बताए ।

भारतबाट र्फर्केका उनी ज्यान मुद्दामा जिल्ला प्रहरी कार्यालय बैतडीको हिरासतमा थिए । त्यहीबेला पीसीआर परीक्षण गर्दा उनमा कोरोना पुष्टि भएको थियो । उनमा लक्षण भने देखिएको थिएन । अस्पतालले डिस्चार्ज गरेसँगै उनलाई थुनामा पठाइएको जिल्ला प्रहरी कार्यालयका निमित्त प्रमुख किसन चन्दले बताए । जिल्ला अदालतले थुनामा पठाएकै दिन उनलाई कोरोना देखिएको थियो ।

गत वैशाख १३ गते १९ वर्षीया किशोरीको हत्या आरोपमा उनी वैशाख १५ गते पक्राउ परेका थिए । विहे गर्छु भनेर लगेकी किशोरी खोलामा मृत अवस्थामा भेटिएकी थिइन् । चैतको ६ गते उनी भारतको दिल्लीबाट फर्किएका थिए ।

बैतडीमा अहिले पाटन नगरपालिकाका एकजना कोरोना पोजेटिभ पुरुषको पाटन प्राथमीक स्वास्थ्य केन्द्रमा उपचार भइरहेको छ ।