उपचार अभावमा डडेलधुरामा कैदीको मृत्यु 

डीआर पन्त

डडेलधुरा — चोरी मुद्दामा कैद सजाय भोगिरहेका ३२ वर्षीय युवकले उपचार नपाएर ज्यान गुमाएका छन् । दार्चुलाको व्यास गाउँपालिका–४ का धनसिंह खातीको सोमबार राति डडेलधुरा अस्पतालमा ज्यान गएको हो ।

केही दिनअघि पक्षघात भएर थला परेका खातीलाई उपचारका लागि डडेलधुरा अस्पतालमा भर्ना गरिएको थियो । डडेलधुराका प्रमुख जिल्ला अधिकारी जगन्नात पन्तले भने, ‘डडेलधुरा अस्पतालमा उपचार सम्भव नभएपछि खातीलाई धनगढी रिफर गरिएको थियो ।’ धनगढीमा पनि उपचार हुन नसकेपछि खातीलाई नेपालगन्ज रिफर गरिएको भएपनि उनका आफन्त नभएपछि पुन डडेलधुरा अस्पताल ल्याइएको प्रजिअ पन्तले जानकारी दिए ।

‘गम्भीर बिरामी भएका कारण कैद मिनाहा गरी आफन्तको जिम्मा लगाउन कारागार विभागलाई सिफारिस समेत गरेको हुँ,’ प्रजिअले भने, ‘खातीको घरमा ५ वर्षको छोरा र भाइ बुहारीबाहेक अरु कोही पनि छैनन् ।’ धनगढीमा केही निजी अस्पतालले उनको उपचार गर्न नमानेका कारण सोमबार डडेलधुरा फर्काइएको पनि उनले बताए ।

प्रकाशित : जेष्ठ २०, २०७७ १३:०४
प्रतिक्रिया
पठाउनुहोस्

लकडाउनको नयाँ मोडालिटी तयार, उच्चस्तरीय समितिमा छलफल हुँदै

मातृका दाहाल

काठमाडौँ — कोरोना भाइरस संक्रमणको कम जोखिम भएका क्षेत्रमा लकडाउन खुकुलो बनाउने गरी कार्ययोजना तयार पारिएको छ । सीसीएमसी सचिवालय र मूख्यसचिव नेतृत्वको एक्सन टिमबाट तयार पारिएको सिफारिसका आधारमा लकडाउन खुकुलो हुने गरी नयाँ कार्ययोजनाको खाका बनेको हो ।

यो खाकाबारे छलफल गर्न अहिले कोभिड रोकथाम तथा नियन्त्रण उच्चस्तरीय समन्वय समितिको बैठक बस्दैछ ।

प्रधानमन्त्री तथा मन्त्रिपरिषद कायालय स्रोतका अनुसार नयाँ खाका समितिबाट पारित भए यसलाई अनुमोदनका लागि मन्त्रिपरिषद बैठकमा लगिने छ । स्रोतका अनुसार कम जोखिम भएका क्षेत्रमा बिस्तारै जनजीवन सामान्यतर्फ लैजाने गरी कार्ययोजना तयार पारिएको छ । समितिका सदस्यहरु अर्थमन्त्री युवराज खतिवडा, स्वास्थ्यमन्त्री भानुभक्त ढकाल र उद्योग वाणिज्य तथा आपूर्तीमन्त्री लेखराज भट्ट लकडाउन खुकुलो बनाउनु पर्ने पक्षमा छन् । तर, प्रधानमन्त्री केपी शर्मा ओली तत्काल खुकुलो बनाउन नहुने पक्षमा उभिएपछि मन्त्रिपरिद्ले जेठ २० मा सकिने लकडाउनलाई जेठ ३२ सम्म लम्ब्याएको हो ।

‘कम जोखिम भएका जिल्ला तथा क्षेत्रमा सञ्चालित उद्योग/कलकारखाना तथा जीवीकोपार्जनसँग जोडिएका क्षेत्र स्वास्थ्य सावधानी अपनाएर सुचारु गर्ने गरी लकडाउनको नयाँ मोडालिटी तयार पारिएको छ, यसलाई आजै बस्ने समिति बैठकमा पेश गरिने छ,’ स्रोतले भन्यो ।

वैशाख १६ गतेको मन्त्रिपरिषद बैठकले ४४ वटा क्षेत्रसँग सम्बन्धित उद्योग/कलकारखाना तथा ढुवानीलाई सुचारु अनुमति दिए पनि बजार कलकारखाना सञ्चालन नहुँदा ती उद्योग पनि आंशिक मात्रै सञ्चालनमा छन् ।

७० दिनसम्म लकडाउन गर्दा पनि कोरोना संक्रमितको संख्या भने बढिरहेको छ । देशमा संक्रमणको दोस्रो केस देखिँदा चैत ११ गतेबाट लकडाउन थालिएको थियो । संक्रमित भएकाको संख्या सोमबार नै १८ सय नाघिसकेको छ । लामो समयको लकडाउनका कारण ठूलो वर्गमा जीविकोपार्जनको समस्या देखिन थालेको छ भने नागरिक समाजबाट पनि यसको मोडालिटी परिवर्तन गरिनुपर्ने आवाज उठिरहेको छ ।

प्रकाशित : जेष्ठ २०, २०७७ १३:०२
पूरा पढ्नुहोस्
प्रतिक्रिया
पठाउनुहोस्
×