गड्डाचौकी नाकाबाट सोमबार साढे १३ सय भित्रिए

भवानी भट्ट

कञ्चनपुर — कञ्चनपुरको गड्डाचौकी नाकाबाट सोमबार १३ सय ५३ जना भित्रिएका छन् । जिल्ला प्रशासन कार्यालयका अनुसार दशगजामा पुगेका सबैलाई भित्र्याएर आ–आफ्नो स्थानीय तहमा पठाइएको छ ।

सहायक प्रमुख जिल्ला अधिकारी गोकर्णप्रसाद उपाध्यायले बिहानैदेखि दशगजामा पुगेका सबैलाई भित्र्याएर सम्बन्धित जिल्लातर्फ पठाइएको बताए । उनका अनुसार नेपालमा रहेका २२० जना भारतीय नागरिकहरुलाई पनि भारततर्फ पठाइएको छ । बिहानको समयमा वर्षा भएका कारण दशगजामा भित्रिनेहरुलाई निकै समस्या भइरहेको थियो ।

आइतबारको तुलनामा यो नाकाबाट आउनेको संख्या कम भएको छ । आइतबार ३ हजार ५८ जना भित्रिएका थिए ।

प्रकाशित : जेष्ठ १९, २०७७ १८:४२
प्रतिक्रिया
पठाउनुहोस्

गर्भवतीमा कोरोना संक्रमण 

कान्तिपुर संवाददाता

दैलेख — दुल्लु नगरपालिका–६, छिउडीकी २३ वर्षीया गर्भवती महिलामा आइतबार कोरोना संक्रमण पुष्टि भएको छ । उनी ६ दिनअघि भारतको राजस्थानबाट दैलेख पुगेकी थिइन् । क्वारेन्टाइनमा बस्दै आएकी उनलाई व्यथा लागेपछि दुल्लु अस्पतालमा लगिएको थियो ।

अस्पतालमा पुर्‍याइएपछि स्वाब संकलन गरिएको दुल्लु अस्पतालकी डा. पुजा विसीले बताइन् । उनका अनुसार अवस्था सामान्य भए पनि उनलाई अस्पतालको आइसोलेसनमा राखेर उपचार थालिएको छ । उनी पति र २ वर्षको छोरासहित नेपाल फर्किएकी थिइन् । ‘क्वारेन्टाइनमा हुँदा व्यथाले च्यापेपछि अस्पताल ल्याइएको हो,’ उनले भनिन्, ‘अस्पतालको क्षेत्र सानो भएकाले सिल गर्ने तयारी गरिएको छ ।’ संक्रमित महिलाको परिवार राजस्थानबाट रुपैडियासम्म रिजर्भ गाडीमा आएको थियो भने नेपालगन्जबाट स्थानीय तहले उद्दार गरी गाउँ पुर्‍याएको हो । डा. विसीले महिलाका पति र बच्चामा पनि संक्रमणको आंशका गरिएको बताइन् ।

क्वारेन्टाइमै जन्मिइन् छोरी

ठाटीकाँध गाउँपालिकाकी एक महिलाले क्वारेन्टाइमै छोरीलाई जन्म दिएकी छिन् । २ नम्बर वडाको पिपलचौतारास्थित जनता आधारभूत विद्यालयको क्वारेन्टाइनमा बसिरहेकी १९ वर्षीया मिना विकले क्वारेन्टाइनमै बच्चा जन्माएकी हुन् ।

गाउँकै क्वारेन्टाइनमा सुत्केरी व्यथा लागेपछि उनलाई प्राथमिक स्वास्थ्य केन्द्र लकान्द्रमा पठाइएको थियो । बच्चा जन्मेको २४ घण्टापछि क्वारेन्टाइनमा फिर्ता गरिएको स्वास्थ्यचौकी इन्चार्ज लक्ष्मी रावतले बताइन् । १२ जनाको परिवार नै घरमा बसेकाले उनलाई क्वारेन्टाएनमा पठाइएको उनको भनाइ छ । उनका अनुसार महिलाको आरडीटी रिपोर्ट नेगेटिभ आएको छ पीसीआर परीक्षणका लागि स्वाब संकलन गर्ने तयारी गरिएको छ । स्वास्थ्यचौकीका अनुसार बच्चा र आमा दुवैको स्वास्थ्य सामान्य छ ।

प्रकाशित : जेष्ठ १९, २०७७ १८:२६
पूरा पढ्नुहोस्
प्रतिक्रिया
पठाउनुहोस्
×