आमाबुवासँगै भारतबाट आएका ११ महिने बालक संक्रमित

भवानी भट्ट

कन्चनपुर — कन्चनपुरमा ११ महिने दूधे बालकमा कोरोना संक्रमण पुष्टि भएको छ । शुक्लाफाँटा नगरपालिका ११ मा रहेको सरस्वती मावि अमरपुरका क्‍वारेन्टाइनमा आमाबुवासँगै रहेका बालकमा संक्रमण देखिएको जिल्ला स्वास्थ्य कार्यालयले जनाएको छ । 

जेठ १४ गते आमाबुवासँगै कैलालीको गौरीफन्टा नाकाबाट भित्रिएका बालक, आमासहित ५ जनाको शुक्रबार स्वाब संकलन गरिएको शुकलाफाँटा नगरपालिकाका स्वास्थ्य शाखा प्रमुख परमानन्द भट्टले बताए । ‘पाँच जनाको स्वाब संकलन गरिएको हो’ उनले भने, ‘आमासहित चार जनाको पनि रिपोर्ट नेगेटिभ आएको छ, बालकको मात्रै पोजिटिभ आयो ।’ उनका अनुसार संक्रमति बालकका आमा बुवासँगै ठूलो बुवा, ठूली आमा र काकासहित ११ जना सँगै आएका हुन् ।

धनगढीस्थित सेती प्रादेशिक प्रयोगशालामा गरिएको परीक्षणअनुसार ती बालकमा सोमबार कोरोना संक्रमण पुष्टि भएको हो । संक्रमित बालकको स्वास्थ्य अवस्था अवस्था सामान्य रहेको स्वास्थ्य शाखा प्रमुख भट्टले बताए । संक्रमित बालक जेठ १४ मा परिवारका ११ जना सँगै भारतको गुडगाउँबाट आएका हुन् । बालकसँगै आएका र क्‍वारेन्टाइनमा सम्पर्कमा आएकाहरुको पहिचान गर्ने काम भइरहेको भट्टले बताए । संक्रमित बालक र आरडीटी परीक्षणमा पोजिटिभ देखिएकाहरुलाई महाकाली अस्पताल पुर्‍याउने तयारी भइरहेको उनले जानकारी दिए ।

प्रमुख जिल्ला अधिकारी नुरहरि खतिवडाले संक्रमित बालकलाई महाकाली अस्पतालमा ल्याउने विषयमा समन्वय भइरहेको बताए । उनले सोमबारै ल्याउने तयारी भइरहेको बताए ।

प्रकाशित : जेष्ठ १९, २०७७ १८:०९
प्रतिक्रिया
पठाउनुहोस्

कोरोनासँगै डेंगुको जोखिम, पुसदेखि जेठसम्म ८२ जनामा संक्रमण

कान्तिपुर संवाददाता

काठमाडौँ — गर्मी बढेसँगै कीटजन्य रोगको जोखिम बढेको स्वास्थ्य तथा जनसंख्या मन्त्रालयले जनाएको छ । मन्त्रालयले आयोजना गर्ने नियमित मिडिया ब्रिफिङमा कोरोना संक्रमितलाई पनि डेंगुको संक्रमण देखिएसँगै सजग रहन आग्रह गरेको छ ।

इपिडिमियोलोजी तथा रोग नियन्त्रण महाशाखाका निर्देशक डा वासुदेव पाण्डेले कोरोनासँगै अरु रोगको जोखिम बढेको बताउँदै वर्षाकाल सुरु भइसक्दा क्‍वारेन्टाइन तथा घरमा बस्दा कोभिड बाहेक अरु रोग जस्तै सरुवा वा किटजन्य रोगहरु जस्तै डेंगु, मलेरिया,सर्पदंश, झाडापखाला हुन सक्ने बताए ।

पुसदेखि जेठ महिनासम्म ८२ जनामा देशभर डेंगु देखिएको छ । २६ जिल्लामा संक्रमण देखिएको छ । जसमा रुपन्देहीमा ३५ र म्याग्दीमा १२ जना, मकवानपुर, गोरखा र तनहुँमा १ –१ जना, कास्कीमा १० जना, काठमाडौंमा ७ जना, नवलपरासीमा १ जना, बाग्लुङमा २ जना, ललितपुरमा ४ जना, सुनसरी ४ जना, पाल्पामा १ जनामा डेंगुको संक्रमण देखिएको छ ।

त्यसैगरी पश्‍चिम नवलपरासीमा १ , मोरङमा ३ , कपिलवस्तुमा ३ , तेह्रथुममा २ , दाङमा १ , डडेलधुरामा १, बाँकेमा १ , झापा र उदयपुरमा १/१ जना, नुवाकोटमा २ , कैलाली र धनकुटामा २ – २ जना, रामेछापमा १ र धादिङमा २ जनामा डेंगु देखिएको छ । त्यसैगरी हालसम्म १५ जनामा मलेरिया देखिएको छ ।

गत वर्ष महामारीको रुपमा फैलिएको डेंगु ६८ जिल्लामा फैलिनुसका साथै १६ हजारमा मानिसमा यो संक्रमण देखिएको थियो जसमा ६ जनाका मृत्यु भएको थियो । यो रोग वैशाखदेखि मंसिरसम्म देखा पर्छ ।

निर्देशक डा पाण्डेले डेंगु र मलेरिया रोगका लागि प्रत्येक प्रदेश र स्थानीय तहमा जाँचपड्तालको लागि डाइग्नोष्टिक टेस्ट किटको व्यवस्था भएको बताउँदै लामखुट्टेको टोकाइबाट बच्‍न सावधानी अपनाउनु पर्ने बताए ।

डेंगु के हो ?

यो रोग एडिस जातको लामखुट्टेको टोकाइबाट लाग्‍ने गर्दछ। अत्यधिक ज्वरो आउने, जिउ एकदमै दुख्‍ने, टाउको दुख्‍ने, पेट दुख्‍ने, वाकवाकी लाग्ने, आँखामुनि दुख्ने आदि लक्षणहरु हुन सक्छन् ।

डेंगुबाट बँच्‍न के गर्ने ?

  • लामखुट्टेको टोकाइबाट बँच्‍ने ।
  • घरवरीपरी पानी जम्‍ने खाल्डाखुल्डी पुर्ने ।
  • लामखुट्टेको टोकाइबाट बँच्‍न झुलको प्रयोग गर्ने वा लामखुट्टेको धूप प्रयोग गर्ने ।
  • शरीर ढाकिने लुगा लगाउने आदि ।

प्रकाशित : जेष्ठ १९, २०७७ १७:५९
पूरा पढ्नुहोस्
प्रतिक्रिया
पठाउनुहोस्
×