सुदूरपश्‍चिममा किट आइपुग्यो, परीक्षण सुचारु

मोहन बुढाऐर

धनगढी — किट आइपुगेपछि सुदूरपश्चिममा रोकिएको कोरोना परीक्षण शनिबारदेखि सुरु भएको छ । सुदूरपश्चिम स्वास्थ्य निर्देशानालयका प्रमुख डा. गुणराज अवस्थीले शुक्रबार राति  ३८४ जनालाई पुग्ने आरएनए एक्सप्रेसन किट धनगढी आइपुगेको बताए ।

‘धनगढी र नेपालगञ्जका लागि हेलिकप्टरबाट थोरै परिमाणमा ल्याइएको हो,’ उनले भने,‘ यसले रोकिएको परीक्षणलाई सुचारु राख्न मद्धत पुगेको छ ।’

किटको अभावमा विभिन्न जिल्लाबाट संकलित ५० भन्दा बढीको थ्रोट स्वाबको रिपोर्ट आउन सकेको थिएन । ‘शंकास्पद बिरामीको तत्काल परीक्षणका लागि मात्रै किट पुगेको हो,’ प्रमुख अवस्थीले भने, ‘आरडीटी किटलगायतका थप सामग्री छिट्टै आइपुग्छ ।’

यसअघि धनगढीको पशु अन्वेषण प्रयोगशाला स्थापना गरिएको आरटी पीसीआर मेसिनमार्फत हुने कोरोना परीक्षण किट अभावका कारण दुई दिन परीक्षण रोकिएको थियो । सुदू्रपश्चिमको समाजिक विकास मन्त्रालयका स्वास्थ्य महाशाखाका प्रमुख नरेन्द्र कार्कीले भने परीक्षणका लागि चाहिने किट आइपुगेसँगै परीक्षणलाई शनिबारदेखि बढाउने बताए ।

सुदूरपश्चिममा कोरोनाको उच्व जोखिम क्षेत्र मानेर सरकारले धनगढीमा प्रयोगशाला स्थापाना गरेको भए पनि किट र नमुना पर्याप्त भन्डारण गर्ने क्षमता नहुँदा परीक्षणलाई तीव्रता दिन सकिएको छैन ।

हालसम्म सुदूरपश्चिममा पीसीआरबाट २ हजार ९ सय २३ र आरडीटी विधिबाट १४ हजार ६ सय ९१ जनाको परीक्षण गरिएको छ । अहिलेसम्मको परीक्षणबाट ५ जनामा कोरोना संक्रमण देखिएको थियो । पाँचै जना सेती प्रादेशिक अस्पतालमा उपचारपछि घर फर्किसकेका छन । संक्रमितहरु निको भएर घर फर्केसँगै सुदूरपश्चिम अहिलेलाई कोरोनामुक्त भए पनि क्वारेन्टाइनमा बसेकाहरुको परीक्षण नगर्दासम्म जोखिम कायमै रहेको कार्की बताउँछन् । पछिल्लो समयमा क्वारेन्टाइनमा रहेका ३ हजार ५ सय ७३ जनाको परीक्षण गर्न बाँकी रहेको छ ।

प्रकाशित : वैशाख २७, २०७७ १०:४१
ADVERTISEMENT
प्रतिक्रिया
पठाउनुहोस्
ADVERTISEMENT

सीमाका क्वारेन्टाइनमा बस्ने सबैको पीसीआर

घनश्याम गौतम

रूपन्देही — सीमाबाट प्रवेश गर्ने नरोकिएपछि प्रदेश सरकारले सीमा क्षेत्रका स्थानीय तहका क्वारेन्टाइनमा बसेका सबैको पीसीआर परीक्षण गर्ने भएको छ । भारत र तेस्रो मुलुकबाट आएर क्वारेन्टाइन र होम क्वारेन्टाइनमा बस्ने सबैको तथ्यांक संकलन गरेर पीसीआर परीक्षण गर्ने तयारी गरिएको हो । प्रदेशको सामाजिक विकास मन्त्रालयको अस्पताल विकास तथा चिकित्सा सेवा महाशाखा प्रमुख डा. उमाशंकर चौधरीले प्रदेशभर कम्तीमा २५ सय जनाको पीसीआर परीक्षण गर्नुपर्ने भएकाले त्यहीअनुसार तयारी गरिएको बताए ।


भारतसँग सीमा जोडिएका ६ जिल्लाका ६० बढी क्वारेन्टाइनमा अहिले १५ सयभन्दा बढी भारत र तेस्रो मुलुकबाट नेपाल भित्रिएकाहरू छन् । पहाडी जिल्लाका क्वारेन्टाइनमा स्वदेश र विदेशबाट आउनेहरू पनि छन् । लकडाउनपछि आएर क्वारेन्टाइन अवधि पूरा गरी होम क्वारेन्टाइनमा बस्नेको संख्या पनि १ हजारभन्दा बढी रहेको चौधरीले बताए । ‘बिहीबारसम्म प्रदेशका ५ सय ९७ क्वारेन्टाइनमा ६ हजार ३ सय २७ जना छन्,’ उनले भने, ‘तीमध्ये २५ प्रतिशतभन्दा बढी भारतबाट लकडाउन सुरु भएपछि लुकीछिपी आएका हुन्, तिनीहरूको पीसीआर परीक्षण गर्नैपर्छ ।’ त्यसबाहेक भारत र तेस्रो मुलुकबाट आएर होम क्वारेन्टाइनमा बस्नेको पनि परीक्षण गर्ने तयारी भइरहेको उनले जनाए ।

रूपन्देहीका सीमा क्षेत्रका क्वारेन्टाइनमा बसेका ३ सय जनाको पीसीआर परीक्षणको तयारी भइरहेको छ । कोटहीमाई गाउँपालिका–१ का २५ वर्षे युवामा संक्रमण देखिएपछि त्यस क्षेत्रका क्वारेन्टाइन र सीमा नजिकका सबै क्वारेन्टाइनमा रहेकाको परीक्षण गर्न लागिएको उनको भनाइ छ । संक्रमितको सम्पर्कमा आएका १ सय १४ जनाको पीसीआर रिपोर्ट भने नेगेटिभ आएको छ ।

त्यस्तै, बिहीबार कपिलवस्तुमा २ जनामा संक्रमण देखिएपछि शुक्रबारदेखि नै उनीहरूको पनि कन्ट्याक्ट ट्रेसिङ भइरहेको छ । ‘उनीहरू पनि दुवै जना क्वारेन्टाइनमा बसेका व्यक्ति हुन्,’ उनले भने, ‘त्यसैले त्यहीअनुसार ट्रेसिङको काम सुरु गरेका छौं ।’ रूपन्देही, पश्चिम नवलपरासी र कपिलवस्तुमा थ्रोट स्वाब संकलन गरेर प्रदेश जनस्वास्थ्य प्रयोगशालामा परीक्षण गर्ने तयारी गरिए पनि आरएनए एक्स्ट्राक्सन किट अभावले ४ दिनदेखि परीक्षण ठप्प छ । शुक्रबार मात्रै नेपाली सेनाको हेलिकप्टरले आवश्यक किट ल्याएको उनले बताए ।

प्रदेश–५ मा तीन स्थान भैरहवा, दाङ र बाँकेमा आरटी–पीसीआर मेसिनमार्फत कोभिड–१९ को परीक्षण भइरहेको छ । प्रदेशका स्वास्थ्य निर्देशक डा. विनोदकुमार गिरीका अनुसार बिहीबारसम्ममा १ हजार ७ सय ८४ जनाको थ्रोट स्वाब संकलन गरिएकामा १ हजार ४ सय २१ जनाको रिपोर्ट नेगेटिभ आएको छ । ३ सय ३९ जनाको परीक्षणकै क्रममा छ । अहिलेसम्म प्रदेशमा २६ जनामा संक्रमण देखिएको छ । ‘३ जनाको बुटवलस्थित अस्थायी कोरोना अस्पताल र बाँकीको नेपालगन्जमा उपचार भइरहेको छ,’ गिरीले भने, ‘सबैको अवस्था सामान्य छ ।’ प्रदेशका ४ वटा आइसोलेसन अस्पतालमा शंकास्पद ४८ जना पनि उपचाररत छन् । प्रदेशभर ६ हजार ९९ जनाको आरडीटी परीक्षण गरिएको थियो ।

प्रकाशित : वैशाख २७, २०७७ १०:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×