भारतमै कोरामा बसेका युवालाई शुक्रबार ल्याइन्छ: दार्चुला प्रजिअ

दार्चुलाका प्रमुख जिल्ला अधिकारी यदुनाथ पौडेलले उनलाई ल्याउने प्रक्रिया सुरु भइसकेको तर भारतीय पक्षले प्रक्रियालाई समय लगाएकाले बिहीबारै ल्याउन संभव नभएको बताए । उनले कान्तिपुरलाई भने, 'मानवीय संवेदनाका कारण पनि हामी उनलाई ल्याउने तयारीमा छौं । भारतीय पक्षलाई हिजै पत्र पठाइसकेको छु । आज पनि कुरा गरेको थिएँ । उनीहरुले माथिल्लो निकायबाट अनुमति लिनुपर्ने भएकाले आज संभव भएन । भोलि उनी नेपाल आउँछन् ।'

पौडेलले उनलाई ल्याएपछि स्वास्थ्य जाँचलगायतका अन्य प्रक्रियाको पनि तयारी गरिएको बताए ।

हिउँदमा मजदुरी गर्न गएका भट्ट सीमा बन्द भएको पाँच दिनपछि धारचुला आइपुगेका थिए । बलुवाकोटको महाविद्यालयमा क्वारेन्टाइनमा बसिरहेका थिए । मंगलबार उनकी आमाको निधन भएको हो । यो खबर पाएपछि उनले नेपाल आउने निकै प्रयास गरे पनि सफल नभएपछि बुधबारदेखि क्वारेन्टाइनमै उनी कोरा बसेका छन् ।

आफ्नो पहुँच भएका सबै निकायमा बासुदेवलाई स्वदेश ल्याउन पहल भइरहेकाले दोस्रो दिनसम्म आमाको अन्तिम संस्कार रोकेएको थियो । दोस्रो दिन पनि आउने छाँट नदेखिएपछि बाध्य भएर दाहसंस्कार गरिएको बासुदेवका आफन्त प्रकाश भट्टले बताए ।

'आजसम्म बासुदेवका लागि भनेर रोकेका थियौ‌ं,' उनले भने, 'नआउने देखिएपछि त्यउपानी गर्नेहरुले खाना खाए ।' अझै पनि बासुदेव घर फर्कने अवस्था नदेखिएको उनको भनाई छ ।

क्वारेन्टाईन स्थलमै उनलाई कोरामा बस्नका लागि अलग कोठाको व्यवस्था गरेको भए पनि खानाको धेरै समस्या हुने गरेको छ ।